മഹാഭാരതം മൂലം/വനപർവം/അധ്യായം91
| ←അധ്യായം90 | മഹാഭാരതം മൂലം/വനപർവം രചന: അധ്യായം91 |
അധ്യായം92→ |
1 [വ്]
തതഃ പ്രയാന്തം കൗന്തേയം ബ്രാഹ്മണാ വനവാസിനഃ
അഭിഗമ്യ തദാ രാജന്ന് ഇദം വചനം അബ്രുവൻ
2 രാജംസ് തീർഥാനി ഗന്താസി പുണ്യാനി ഭ്രാതൃഭിഃ സഹ
ദേവൈഷിണാ ച സഹിതോ ലോമശേന മഹാത്മനാ
3 അസ്മാൻ അപി മഹാരാജൻ നേതും അർഹസി പാണ്ഡവ
അസ്മാഭിർ ഹി ന ശക്യാനി ത്വദൃതേ താനി കൗരവ
4 ശ്വാപദൈർ ഉപസൃഷ്ടാനി ദുർഗാണി വിഷമാണി ച
അഗമ്യാനി നരൈർ അൽപൈസ് തീർഥാനി മനുജേശ്വര
5 ഭവന്തോ ഭ്രാതരഃ ശൂരാ ധനുർധര വരാഃ സദാ
ഭവദ്ഭിഃ പാലിതാഃ ശൂരൈർ ഗച്ഛേമ വയം അപ്യ് ഉത
6 ഭവത്പ്രസാദാദ് ധി വയം പ്രാപ്നുയാമ ഫലം ശുഭം
തീർഥാനാം പൃഥിവീപാല വ്രതാനാം ച വിശാം പതൗ
7 തവ വീര്യപരിത്രാതാഃ ശുദ്ധാസ് തീർഥപരിപ്ലുതാഃ
ഭവേമ ധൂതപാപ്മാനസ് തീർഥസന്ദർശനാൻ നൃപ
8 ഭവാൻ അപി നരേന്ദ്രസ്യ കാർതവീര്യസ്യ ഭാരത
അഷ്ടകസ്യ ച രാജർഷേർ ലോമ പാദസ്യ ചൈവ ഹ
9 ഭാരതസ്യ ച വീരസ്യ സാർവഭൗമസ്യ പാർഥിവ
ധ്രുവം പ്രാപ്സ്യസി ദുഷ്പ്രാപാംൽ ലോകാംസ് തീർഥപരിപ്ലുതഃ
10 പ്രഭാസാദീനി തീർഥാനി മഹേന്ദ്രാദീംശ് ച പർവതാൻ
ഗംഗാദ്യാഃ സരിതശ് ചൈവ പ്ലക്ഷാദീംശ് ച വനസ്പതീൻ
ത്വയാ സഹ മഹീപാല ദ്രഷ്ടും ഇച്ഛാമഹേ വയം
11 യദി തേ ബ്രാഹ്മണേഷ്വ് അസ്തി കാ ചിത് പ്രീതിർ ജനാധിപ
കുരു ക്ഷിപ്രം വചോ ഽസ്മാകം തതഃ ശ്രേയോ ഽഭിപത്സ്യസേ
12 തീർഥാനി ഹി മഹാബാഹോ തപോവിഘ്നകരൈഃ സദാ
അനുകീർണാനി രക്ഷോഭിസ് തേഭ്യോ നസ് ത്രാതും അർഹസി
13 തീർഥാന്യ് ഉക്താനി ധൗമ്യേന നാരദേന ച ധീമതാ
യാന്യ് ഉവാച ച ദേവർഷിർ ലോമശഃ സുമഹാതപാഃ
14 വിധിവത് താനി സർവാണി പര്യടസ്വ നരാധിപ
ധൂതപാപ്മാ സഹാസ്മാഭിർ ലോമശേന ച പാലിതഃ
15 സ തഥാ പൂജ്യമാനസ് തൈർ ഹർഷാദ് അശ്രുപരിപ്ലുതഃ
ഭീമസേനാദിഭിർ വീരൈർ ഭ്രാതൃഭിഃ പരിവാരിതഃ
ബാഢം ഇത്യ് അബ്രവീത് സർവാംസ് താൻ ഋഷീൻ പാണ്ഡവർഷഭഃ
16 ലോമശം സമനുജ്ഞാപ്യ ധൗമ്യം ചൈവ പുരോഹിതം
തതഃ സ പാണ്ഡവശ്രേഷ്ഠോ ഭ്രാതൃഭിഃ സഹിതോ വശീ
ദ്രൗപദ്യാ ചാനവദ്യാംഗ്യാ ഗമനായ മനോ ദധേ
17 അഥ വ്യാസോ മഹാഭാഗസ് തഥാ നാരദ പർവതൗ
കാമ്യകേ പാണ്ഡവം ദ്രഷ്ടും സമാജഗ്മുർ മനീഷിണഃ
18 തേഷാം യുധിഷ്ഠിരോ രാജാ പൂജാം ചക്രേ യഥാവിധി
സത്കൃതാസ് തേ മഹാഭാഗാ യുധിഷ്ഠിരം അഥാബ്രുവൻ
19 യുധിഷ്ഠിര യമൗ ഭീമ മനസാ കുരുതാർജവം
മനസാ കൃതശൗചാ വൗ ശുദ്ധാസ് തീർഥാനി ഗച്ഛത
20 ശരീരനിയമം ഹ്യ് ആഹുർ ബ്രാഹ്മണാ മാനുഷം വ്രതം
മനോവിശുദ്ധാം ബുദ്ധിം ച ദൈവം ആഹുർ വ്രതം ദ്വിജാഃ
21 മനോ ഹ്യ് അദുഷ്ടം ശൂരാണാം പര്യാപ്തം വൈ നരാധിപ
മൈത്രീം ബുദ്ധിം സമാസ്ഥായ ശുദ്ധാസ് തീർഥാനി ഗച്ഛത
22 തേ യൂയം മാനസൈഃ ശുദ്ധാഃ ശരീരനിയമ വ്രതൈഃ
ദൈവം വ്രതം സമാസ്ഥായ യഥോക്തം ഫലം ആപ്സ്യഥ
23 തേ തഥേതി പ്രതിജ്ഞായ കൃഷ്ണയാ സഹ പാണ്ഡവാഃ
കൃതസ്വസ്ത്യയനാഃ സർവേ മുനിഭിർ ദിവ്യമാനുഷൈഃ
24 ലോമശസ്യോപസംഗൃഹ്യ പാദൗ ദ്വൈപായനസ്യ ച
നാരദസ്യ ച രാജേന്ദ്ര ദേവർഷേഃ പർവതസ്യ ച
25 ധൗമ്യേന സഹിതാ വീരാസ് തഥാന്യൈർ വനവാസിഭിഃ
മാർഗശീർഷ്യാം അതീതായാം പുഷ്യേണ പ്രയയുസ് തതഃ
26 കഠിനാനി സമാദായ ചീരാജിനജടാധരാഃ
അഭേദ്യൈഃ കവചൈർ യുക്താസ് തീർഥാന്യ് അന്വചരംസ് തദാ
27 ഇന്ദ്രസേനാദിഭിർ ഭൃത്യൈ രഥൈഃ പരിചതുർദശൈഃ
മഹാനസ വ്യാപൃതൈശ് ച തഥാന്യൈഃ പരിചാരകൈഃ
28 സായുധാ ബദ്ധനിഷ്ട്രിംശാസ് തൂണവന്തഃ സ മാർഗണാഃ
പ്രാങ് മുഖാഃ പ്രയയുർ വീരാഃ പാണ്ഡവാ ജനമേജയ