മഹാഭാരതം മൂലം/വനപർവം/അധ്യായം92
| ←അധ്യായം91 | മഹാഭാരതം മൂലം/വനപർവം രചന: അധ്യായം92 |
അധ്യായം93→ |
1 [യ്]
ന വൈ നിർഗുണം ആത്മാനം മന്യേ ദേവർഷിസത്തമ
തഥാസ്മി ദുഃഖസന്തപ്തോ യഥാ നാന്യോ മഹീപതിഃ
2 പരാംശ് ച നിർഗുണാൻ മന്യേ ന ച ധർമരതാൻ അപി
തേ ച ലോമശ ലോകേ ഽസ്മിന്ന് ഋധ്യന്തേ കേന കേതുനാ
3 [ൽ]
നാത്ര ദുഃഖം ത്വയാ രാജൻ കാര്യം പാർഥ കഥം ചന
യദ് അധർമേണ വർധേരന്ന് അധർമരുചയോ ജനാഃ
4 വർധത്യ് അധർമേണ നരസ് തതോ ഭദ്രാണി പശ്യതി
തതഃ സപത്നാഞ് ജയതി സ മൂലസ് തു വിനശ്യതി
5 മയാ ഹി ദൃഷ്ടാ ദൈതേയാ ദാനവാശ് ച മഹീപതേ
വർധമാനാ ഹ്യ് അധർമേണ ക്ഷയം ചോപഗതാഃ പുനഃ
6 പുരാ ദേവയുഗേ ചൈവ ദൃഷ്ടം സർവം മയാ വിഭോ
അരോചയൻ സുരാ ധർമം ധർമം തത്യജിരേ ഽസുരാഃ
7 തീർഥാനി ദേവാ വിവിശുർ നാവിശൻ ഭാരതാസുരാഃ
താൻ അധർമകൃതോ ദർപഃ പൂർവം ഏവ സമാവിശത്
8 ദർപാൻ മാനഃ സമഭവൻ മാനാത് ക്രോധോ വ്യജായത
ക്രോധാദ് അഹ്രീസ് തതോ ഽലജ്ജാ വൃത്തം തേഷാം തതോ ഽനശത്
9 താൻ അലജ്ജാൻ ഗതഹ്രീകാൻ ഹീനവൃത്താൻ വൃഥാ വ്രതാൻ
ക്ഷമാ ലക്ഷ്മീശ് ച ധർമശ് ച നചിരാത് പ്രജഹുസ് തതഃ
ലക്ഷ്മീസ് തു ദേവാൻ അഗമദ് അലക്ഷ്മീർ അസുരാൻ നൃപ
10 താൻ അലക്ഷ്മീ സമാവിഷ്ടാൻ ദർപോപഹത ചേതസഃ
ദൈതേയാൻ ദാനവാംശ് ചൈവ കലിർ അപ്യ് ആവിശത് തതഃ
11 താൻ അലക്ഷ്മീ സമാവിഷ്ടാൻ ദാനവാൻ കലിനാ തഥാ
ദർപാഭിഭൂതാൻ കൗന്തേയ ക്രിയാ ഹീനാൻ അചേതസഃ
12 മാനാഭിഭൂതാൻ അചിരാദ് വിനാശഃ പ്രത്യപദ്യത
നിര്യശസ്യാസ് തതോ ദൈത്യാഃ കൃത്സ്നശോ വിലയം ഗതാഃ
13 ദേവാസ് തു സാഗരാംശ് ചൈവ സരിതശ് ച സരാംസി ച
അഭ്യഗച്ഛൻ ധർമശീലാഃ പുണ്യാന്യ് ആയതനാനി ച
14 തപോഭിഃ ക്രതുഭിർ ദാനൈർ ആശീർവാദൈശ് ച പാണ്ഡവ
പ്രജഹുഃ സർവപാപാണി ശ്രേയശ് ച പ്രതിപേദിരേ
15 ഏവം ഹി ദാനവന്തശ് ച ക്രിയാവന്തശ് ച സർവശഃ
തീർഥാന്യ് അഗച്ഛൻ വിബുധാസ് തേനാപുർ ഭൂതിം ഉത്തമാം
16 തഥാ ത്വം അപി രാജേന്ദ്ര സ്നാത്വാ തീർഥേഷു സാനുജഃ
പുനർ വേത്സ്യസി താം ലക്ഷ്മീം ഏഷ പന്ഥാഃ സനാതനഃ
17 യഥൈവ ഹി നൃഗോ രാജാ ശിബിർ ഔശീനരോ യഥാ
ഭഗീരഥോ വസു മനാ ഗയഃ പൂരുഃ പുരൂരവഃ
18 ചരമാണാസ് തപോനിത്യം സ്പർശനാദ് അംഭസശ് ച തേ
തീർഥാഭിഗമനാത് പൂതാ ദർശനാച് ച മഹാത്മനാം
19 അലഭന്ത യശഃ പുണ്യം ധനാനി ച വിശാം പതേ
തഥാ ത്വം അപി രാജേന്ദ്ര ലബ്ധാസി വിപുലാം ശ്രിയം
20 യഥാ ചേക്ഷ്വാകുർ അചരത് സപുത്രജനബാന്ധവഃ
മുചുകുന്ദോ ഽഥ മാന്ധാതാ മരുത്തശ് ച മഹീപതിഃ
21 കീർതിം പുണ്യാം അവിന്ദന്ത യഥാ ദേവാസ് തപോബലാത്
ദേവർഷയശ് ച കാർത്സ്ന്യേന തഥാ ത്വം അപി വേത്സ്യസേ
22 ധാർതരാഷ്ട്രാസ് തു ദർപേണ മോഹേന ച വശീകൃതാഃ
നചിരാദ് വിനശിഷ്യന്തി ദൈത്യാ ഇവ ന സംശയഃ