മഹാഭാരതം മൂലം/വിരാടപർവം/അധ്യായം16
| ←അധ്യായം15 | മഹാഭാരതം മൂലം/വിരാടപർവം രചന: അധ്യായം16 |
അധ്യായം17→ |
1 [വൈ]
സാ ഹതാ സൂതപുത്രേണ രാജപുത്രീ സമജ്വലത്
വധം കൃഷ്ണാ പരീപ്സന്തീ സേനാ വാഹസ്യ ഭാമിനീ
ജഗാമാവാസം ഏവാഥ തദാ സാ ദ്രുപദാത്മ ജാ
2 കൃത്വാ ശൗചം യഥാന്യായം കൃഷ്ണാ വൈ തനുമധ്യമാ
ഗത്രാണി വാസസീ ചൈവ പ്രക്ഷാല്യ സലിലേന സാ
3 ചിന്തയാം ആസ രുദതീ തസ്യ ദുഃഖസ്യ നിർണയം
കിം കരോമി ക്വ ഗച്ഛാമി കഥം കാര്യം ഭവേൻ മമ
4 ഇത്യ് ഏവം ചിന്തയിത്വാ സാ ഭീമം വൈ മനസാഗമത്
നാന്യഃ കർതാ ഋതേ ഭീമാൻ മമാദ്യ മനസഃ പ്രിയം
5 തത ഉത്ഥായ രാത്രൗ സാ വിഹായ ശയനം സ്വകം
പ്രാദ്രവൻ നാഥം ഇച്ഛന്തീ കൃഷ്ണാ നാഥവതീ സതീ
ദുഃഖേന മഹതാ യുക്താ മാനസേന മനസ്വിനീ
6 സാ വൈ മഹാനസേ പ്രാപ്യ ഭീമസേനം ശുചിസ്മിതാ
സർവശ്വേതേവ മാഹേയീ വനേ ജാതാ ത്രിഹായനീ
ഉപാതിഷ്ഠത പാഞ്ചാലീ വാശിതേവ മഹാഗജം
7 സാ ലതേവ മഹാശാലം ഫുല്ലം ഗോമതി തീരജം
ബാഹുഭ്യാം പരിരഭ്യൈനം പ്രാബോധയദ് അനിന്ദിതാ
സിംഹം സുപ്തം വനേ ദുർഗേ മൃഗരാജവധൂർ ഇവ
8 വീണേവ മധുരാഭാഷാ ഗാന്ധാരം സാധു മൂർച്ഛിതാ
അഭ്യഭാഷത പാഞ്ചാലീ ഭീമസേനം അനിന്ദിതാ
9 ഉത്തിഷ്ഠോത്തിഷ്ഠ കിം ശേഷേ ഭീമസേന യഥാ മൃതഃ
നാമൃതസ്യ ഹി പാപീയാൻ ഭാര്യാം ആലഭ്യ ജീവതി
10 തസ്മിഞ് ജീവതി പാപിഷ്ഠേ സേനാ വാഹേ മമ ദ്വിഷി
തത് കർമകൃതവത്യ് അദ്യ കഥം നിദ്രാം നിഷേവസേ
11 സ സമ്പ്രഹായ ശയനം രാജപുത്ര്യാ പ്രബോധിതഃ
ഉപാതിഷ്ഠത മേഘാഭഃ പര്യങ്കേ സോപസംഗ്രഹേ
12 അഥാബ്രവീദ് രാജപുത്രീം കൗരവ്യോ മഹിഷീം പ്രിയാം
കേനാസ്യ് അർഥേന സമ്പ്രാപ്താ ത്വരിതേവ മമാന്തികം
13 ന തേ പ്രകൃതിമാൻ വർണഃ കൃശാ പാണ്ഡുശ് ച ലക്ഷ്യസേ
ആചക്ഷ്വ പരിശേഷേണ സർവം വിദ്യാം അഹം യഥാ
14 സുഖം വാ യദി വാ ദുഃഖം ദ്വേഷ്യം വാ യദി വാ പ്രിയം
യഥാവത് സർവം ആചക്ഷ്വ ശ്രുത്വാ ജ്ഞാസ്യാമി യത് പരം
15 അഹം ഏവ ഹി തേ കൃഷ്ണേ വിശ്വാസ്യഃ സർവകർമസു
അഹം ആപത്സു ചാപി ത്വാം മോക്ഷയാമി പുനഃ പുനഃ
16 ശീഘ്രം ഉക്ത്വാ യഥാകാമം യത് തേ കാര്യം വിവക്ഷിതം
ഗച്ഛ വൈ ശയനായൈവ പുരാ നാന്യോ ഽവബുധ്യതേ