മഹാഭാരതം മൂലം/വിരാടപർവം/അധ്യായം34

മഹാഭാരതം മൂലം/വിരാടപർവം
രചന:വ്യാസൻ
അധ്യായം34

1 [ഉത്തര]
     അദ്യാഹം അനുഗച്ഛേയം ദൃഢധന്വാ ഗവാം പദം
     യദി മേ സാരഥിഃ കശ് ചിദ് ഭവേദ് അശ്വേഷു കോവിദഃ
2 തം ഏവ നാധിഗച്ഛാമി യോ മേ യന്താ ഭവേൻ നരഃ
     പശ്യധ്വം സാരധിം ക്ഷിപ്രം മമ യുക്തം പ്രയാസ്യതഃ
3 അഷ്ടാവിംശതി രാത്രം വാ മാസം വാ നൂനം അന്തതഃ
     യത് തദ് ആസീ മഹദ് യുദ്ധം തത്ര മേ സാരഥിർ ഹതഃ
4 സ ലഭേയം യദി ത്വ് അന്യം ഹര യാനവിദം നരം
     ത്വരാവാൻ അദ്യ യാത്വാഹം സമുച്ഛ്രിതമഹാധ്വജം
5 വിഗാഹ്യ തത്പരാനീകം ഗജവാജിർ അഥാകുലം
     ശസ്ത്രപ്രതാപ നിർവീര്യാൻ കുരൂഞ് ജിത്വാനയേ പശൂൻ
6 ദുര്യോധനം ശാന്തനവം കർണം വൈകർതനം കൃപം
     ദ്രോണം ച സഹ പുത്രേണ മഹേഷ്വാസാൻ സമാഗതാൻ
7 വിത്രാസയിത്വാ സംഗ്രാമേ ദാനവാൻ ഇവ വജ്രഭൃത്
     അനേനൈവ മുഹൂർതേന പുനഃ പ്രത്യാനയേ പശൂൻ
8 ശൂന്യം ആസാദ്യ കുരവഃ പ്രയാന്ത്യ് ആദായ ഗോധനം
     കിം നു ശക്യം മയാ കർതും യദ് അഹം തത്ര നാഭവം
9 പശ്യേയുർ അദ്യ മേ വീര്യം കുരവസ് തേ സമാഗതാഃ
     കിം നു പാർഥോ ഽർജുനഃ സാക്ഷാദ് അയം അസ്മാൻ പ്രബാധതേ
10 [വൈ]
    തസ്യ തദ് വചനം സ്ത്രീഷു ഭാഷതഃ സ്മ പുനഃ പുനഃ
    നാമർഷയത പാഞ്ചാലീ ബീഭത്സോഃ പരികീർതനം
11 അഥൈനം ഉപസംഗമ്യ സ്ത്രീമധ്യാത് സാ തപസ്വിനീ
    വ്രീഡമാനേവ ശനകൈർ ഇദം വചനം അബ്രവീത്
12 യോ ഽസൗ ബൃഹദ് വാരണാഭോ യുവാ സുപ്രിയ ദർശനഃ
    ബൃഹന്നഡേതി വിഖ്യാതഃ പാർഥസ്യാസീത് സ സാരഥിഃ
13 ധനുഷ്യ് അനവരശ് ചാസീത് തസ്യ ശിഷ്യോ മഹാത്മനഃ
    ദൃഷ്ടപൂർവോ മയാ വീര ചരന്ത്യാ പാണ്ഡവാൻ പ്രതി
14 യദാ തത് പാവകോ ദാവം അദഹത് ഖാണ്ഡവം മഹത്
    അർജുനസ്യ തദാനേന സംഗൃഹീതാ ഹയോത്തമാഃ
15 തേന സാരഥിനാ പാർഥഃ സർവഭൂതാനി സർവശഃ
    അജയത് ഖാണ്ഡവ പ്രസ്ഥേ ന ഹി യന്താസ്തി താദൃശഃ
16 യേയം കുമാരീ സുശ്രോണീ ഭഗിനീ തേ യവീയസീ
    അസ്യാഃ സ വചനം വീരകരിഷ്യതി ന സംശയഃ
17 യദി വൈ സാരഥിഃ സ സ്യാത് കുരൂൻ സർവാൻ അസംശയം
    ജിത്വാ ഗാശ് ച സമാദായ ധ്രുവം ആഗമനം ഭവേത്
18 ഏവം ഉക്തഃ സ സൈരന്ധ്യാ ഭഗിനീം പ്രത്യഭാഷത
    ഗച്ഛ ത്വം അനവദ്യാംഗി താം ആനയ ബൃഹന്നഡാം
19 സാ ഭ്രാത്രാ പ്രേഷിതാ ശീഘ്രം അഗച്ഛൻ നർതനാ ഗൃഹം
    യത്രാസ്തേ സ മഹാബാഹുശ് ഛന്നഃ സത്രേണ പാണ്ഡവഃ