മഹാഭാരതം മൂലം/വിരാടപർവം/അധ്യായം35

മഹാഭാരതം മൂലം/വിരാടപർവം
രചന:വ്യാസൻ
അധ്യായം35

1 [വൈ]
     സ താം ദൃഷ്ട്വാ വിശാലാക്ഷീം രാജപുത്രീം സഖീം സഖാ
     പ്രഹസന്ന് അബ്രവീദ് രാജൻ കുത്രാഗമനം ഇത്യ് ഉത
2 തം അബ്രവീദ് രാജപുത്രീ സമുപേത്യ നരർഷഭം
     പ്രണയം ഭാവയന്തീ സ്മ സഖീമധ്യ ഇദം വചഃ
3 ഗാവോ രാഷ്ട്രസ്യ കുരുഭിഃ കാല്യന്തേ നോ ബൃഹന്നഡേ
     താൻ വിജേതും മമ ഭ്രാതാ പ്രയാസ്യതി ധനുർധരഃ
4 നചിരം ച ഹതസ് തസ്യ സംഗ്രാമേ രഥസാരഥിഃ
     തേന നാസ്തി സമഃ സൂതോ യോ ഽസ്യ സാരഥ്യം ആചരേത്
5 തസ്മൈ പ്രയതമാനായ സാരഥ്യർഥം ബൃഹന്നഡേ
     ആചചക്ഷേ ഹയജ്ഞാനേ സൈരന്ധ്രീ കൗശലം തവ
6 സാ സാരഥ്യം മമ ഭ്രാതുഃ കുരു സാധു ബൃഹന്നഡേ
     പുരാ ദൂരതരം ഗാവോ ഹ്രിയന്തേ കുരുഭിർ ഹി നഃ
7 അഥൈതദ് വചനം മേ ഽദ്യ നിയുക്താ ന കരിഷ്യസി
     പ്രണയാദ് ഉച്യമാനാ ത്വം പരിത്യക്ഷ്യാമി ജീവിതം
8 ഏവം ഉക്തസ് തു സുശ്രോണ്യാ തയാ സഖ്യാ പരന്തപഃ
     ജഗാമ രാജപുത്രസ്യ സകാശം അമിതൗജസഃ
9 തം സാ വ്രജന്തം ത്വരിതം പ്രഭിന്നം ഇവ കുഞ്ജരം
     അന്വഗച്ഛദ് വിശാലാക്ഷീ ശിശുർ ഗജവധൂർ ഇവ
10 ദൂരാദ് ഏവ തു തം പ്രേക്ഷ്യ രാജപുത്രാഭ്യഭാഷത
    ത്വയാ സാരഥിനാ പാർഥഃ ഖാണ്ഡവേ ഽഗ്നിം അതർപയത്
11 പൃഥിവീം അജയത് കൃത്സ്നാം കുന്തീപുത്രോ ധനഞ്ജയഃ
    സൈരന്ധ്രീ ത്വാം സമാചഷ്ട സാ ഹി ജാനാതി പാണ്ഡവാൻ
12 സംയച്ഛ മാമകാൻ അശ്വാംസ് തഥൈവ ത്വം ബൃഹന്നഡാ
    കുരുഭിർ യോത്സ്യമാനസ്യ ഗോധനാനി പരീപ്സതഃ
13 അർജുനസ്യ കിലാസീസ് ത്വം സാരഥിർ ദയിതഃ പുരാ
    ത്വയാജയത് സഹായേന പൃഥിവീം പാണ്ഡവർഷഭഃ
14 ഏവം ഉക്താ പ്രത്യുവാച രാജപുത്രം ബൃഹന്നഡാ
    കാ ശക്തിർ മമ സാരഥ്യം കർതും സംഗ്രാമമൂർധനി
15 ഗീതം വാ യദി വാ നൃത്തം വാദിത്രം വാ പൃഥഗ്വിധം
    തത് കരിഷ്യാമി ഭദ്രം തേ സാരഥ്യം തു കുതോ മയി
16 [ഉത്തര]
    ബൃഹന്നഡേ ഗായനോ വാ നർതനോ വാ പുനർ ഭവ
    ക്ഷിപ്രം മേ രഥം ആസ്ഥായ നിഗൃഹ്ണീഷ്വ ഹയോത്തമാൻ
17 [വൈ]
    സ തത്ര നർമ സംയുക്തം അകരോത് പാണ്ഡവോ ബഹു
    ഉത്തരായാഃ പ്രമുഖതഃ സർവം ജാനന്ന് അരിന്ദമ
18 ഊർധ്വം ഉത്ക്ഷിപ്യ കവചം ശരീരേ പ്രത്യമുഞ്ചത
    കുമാര്യസ് തത്ര തം ദൃഷ്ട്വാ പ്രാഹസൻ പൃഥുലോചനാഃ
19 സ തു ദൃഷ്ട്വാ വിമുഹ്യന്തം സ്വയം ഏവോത്തരസ് തതഃ
    കവചേന മഹാർഹേണ സമനഹ്യദ് ബൃഹന്നഡാം
20 സ ബിഭ്രത് കവചം ചാഗ്ര്യം സ്വയം അപ്യ് അംശുമത് പ്രഭം
    ധ്വജം ച സിംഹം ഉച്ഛ്രിത്യ സാരഥ്യേ സമകൽപയത്
21 ധനൂംഷി ച മഹാർഹാണി ബാണാംശ് ച രുചിരാൻ ബഹൂൻ
    ആദായ പ്രയയൗ വീരഃ സ ബൃഹന്നഡ സാരഥിഃ
22 അഥോത്തരാ ച കന്യാശ് ച സഖ്യസ് താം അബ്രുവംസ് തദാ
    ബൃഹന്നഡേ ആനയേഥാ വാസാംസി രുചിരാണി നഃ
23 പാഞ്ചാലി കാര്യം സൂക്ഷ്മാണി ചിത്രാണി വിവിധാനി ച
    വിജിത്യ സംഗ്രാമഗതാൻ ഭീഷ്മദ്രോണമുഖാൻ കുരൂൻ
24 അഥ താ ബ്രുവതീഃ കന്യാഃ സഹിതാഃ പാണ്ഡുനന്ദനഃ
    പ്രത്യുവാച ഹസൻ പാർഥോ മേഘദുന്ദുഭി നിഃസ്വനഃ
25 യദ്യ് ഉത്തരോ ഽയം സംഗ്രാമേ വിജേഷ്യതി മഹാരഥാൻ
    അഥാഹരിഷ്യേ വാസാംസി ദിവ്യാനി രുചിരാണി ച
26 ഏവം ഉക്ത്വാ തു ബീഭത്സുസ് തതഃ പ്രാചോദയദ് ധയാൻ
    കുരൂൻ അഭിമുഖാഞ് ശൂരോ നാനാ ധ്വജപതാകിനഃ