മഹാഭാരതം മൂലം/വിരാടപർവം/അധ്യായം56

മഹാഭാരതം മൂലം/വിരാടപർവം
രചന:വ്യാസൻ
അധ്യായം56

1 [വൈ]
     തതോ വൈകർതനം ജിത്വാ പാർഥോ വൈരാടിം അബ്രവീത്
     ഏതൻ മാം പ്രാപയാനീകം യത്ര താലോ ഹിരണ്മയഃ
2 അത്ര ശാന്തനവോ ഭീഷ്മോ രഥേ ഽസ്മാകം പിതാമഹഃ
     കാങ്ക്ഷമാണോ മയാ യുദ്ധം തിഷ്ഠത്യ് അമര ദർശനഃ
     ആദാസ്യാമ്യ് അഹം ഏതസ്യ ധനുർജ്യാം അപി ചാഹവേ
3 അസ്യന്തം ദിവ്യം അസ്ത്രം മാം ചിത്രം അദ്യ നിശാമയ
     ശതഹ്രദാം ഇവായാന്തീം സ്തനയിത്നോർ ഇവാംബരേ
4 സുവർണപൃഷ്ഠം ഗാണ്ഡീവം ദ്രക്ഷ്യന്തി കുരവോ മമ
     ദക്ഷിണേനാഥ വാമേന കതരേണ സ്വിദ് അസ്യതി
     ഇതി മാം സംഗതാഃ സർവേ തർകയിഷ്യന്തി ശത്രവഃ
5 ശോണിതോദാം രഥാവർതാം നാഗനക്രാം ദുരത്യയാം
     നദീം പ്രസ്യന്ദയിഷ്യാമി പരലോകപ്രവാഹിനീം
6 പാണിപാദശിരഃ പൃഷ്ഠബാഹുശാഖാ നിരന്തരം
     വനം കുരൂണാം ഛേത്സ്യാമി ഭല്ലൈഃ സംനതപർവഭിഃ
7 ജയതഃ കൗരവീം സേനാം ഏകസ്യ മമ ധന്വിനഃ
     ശതം മാർഗാ ഭവിഷ്യന്തി പാവകസ്യേവ കാനനേ
     മയാ ചക്രം ഇവാവിദ്ധം സൈന്യം ദ്രക്ഷ്യസി കേവലം
8 അസംഭ്രാന്തോ രഥേ തിഷ്ഠ സമേഷു വിഷമേഷു ച
     ദിവാം ആവൃത്യ തിഷ്ഠന്തം ഗിരിം ഭേത്സ്യാമി ധാരിഭിഃ
9 അഹം ഇന്ദ്രസ്യ വചനാത് സംഗ്രാമേ ഽഭ്യഹനം പുരാ
     പൗലോമാൻ കാലഖഞ്ജാംശ് ച സഹസ്രാണി ശതാനി ച
10 അഹം ഇന്ദ്രാദ് ദൃഢാം മുഷ്ടിം ബ്രഹ്മണഃ കൃതഹസ്തതാം
    പ്രഗാഢം തുമുലം ചിത്രം അതിവിദ്ധം പ്രജാപതേഃ
11 അഹം പാരേ സമുദ്രസ്യ ഹിരണ്യപുരം ആരുജം
    ജിത്വാ ഷഷ്ടിസഹസ്രാണി രഥിനാം ഉഗ്രധന്വിനാം
12 ധ്വജവൃക്ഷം പത്തിതൃണം രഥസിംഹഗണായുതം
    വനം ആദീപയിഷ്യാമി കുരൂണാം അസ്ത്രതേജസാ
13 താൻ അഹം രഥനീഡേഭ്യഃ ശരൈഃ സംനതപർവഭിഃ
    ഏകഃ സങ്കാലയിഷ്യാമി വജ്രപാണിർ ഇവാസുരാൻ
14 രൗദ്രം രുദ്രാദ് അഹം ഹ്യ് അസ്ത്രം വാരുണം വരുണാദ് അപി
    അസ്ത്രം ആഗ്നേയം അഗ്നേശ് ച വായവ്യം മാതരിശ്വനഃ
    വജ്രാദീനി തഥാസ്ത്രാണി ശക്രാദ് അഹം അവാപ്തവാൻ
15 ധാർതരാഷ്ട്ര വനം ഘോരം നരസിംഹാഭിരക്ഷിതം
    അഹം ഉത്പാടയിഷ്യാമി വൈരാടേ വ്യേതു തേ ഭയം
16 ഏവം ആശ്വാസിതസ് തേന വൈരാടിഃ സവ്യസാചിനാ
    വ്യഗാഹത രഥാനീകം ഭീമം ഭീഷ്മസ്യ ധീമതഃ
17 തം ആയാന്തം മഹാബാഹും ജിഗീഷന്തം രണേ പരാൻ
    അഭ്യവാരയദ് അവ്യഗ്രഃ ക്രൂരകർമാ ധനഞ്ജയം
18 തം ചിത്രമാല്യാഭരണാഃ കൃതവിദ്യാ മനസ്വിനഃ
    ആഗച്ഛൻ ഭീമധന്വാനം മൗർവീം പര്യസ്യ ബാഹുഭിഃ
19 ദുഃശാസനോ വികർണശ് ച ദുഃസഹോ ഽഥ വിവിംശതിഃ
    ആഗത്യ ഭീമധന്വാനം ബീഭത്സും പര്യവാരയൻ
20 ദുഃശാസനസ് തു ഭല്ലേന വിദ്ധ്വാ വൈരാടിം ഉത്തരം
    ദ്വിതീയേനാർജുനം വീരഃ പ്രത്യവിധ്യത് സ്തനാന്തരേ
21 തസ്യ ജിഷ്ണുർ ഉപാവൃത്യ പൃഥു ധാരേണ കാർമുകം
    ചകർത ഗാർധ്രപത്രേണ ജാതരൂപപരിഷ്കൃതം
22 അഥൈനം പഞ്ചഭിഃ പശ്ചാത് പ്രത്യവിധ്യത് സ്തനാന്തരേ
    സോ ഽപയാതോ രണം ഹിത്വാ പാർഥ ബാണപ്രപീഡിതഃ
23 തം വികർണഃ ശരൈസ് തീക്ഷ്ണൈർ ഗാർധ്രപത്രൈർ അജിഹ്മ ഗൈഃ
    വിവ്യാധ പരവീര ഘ്നം അർജുനം ധൃതരാഷ്ട്ര ജഃ
24 തതസ് തം അപി കൗന്തേയഃ ശരേണാനതപർവണാ
    ലലാടേ ഽഭ്യഹനത് തൂർണം സ വിദ്ധഃ പ്രാപതദ് രഥാത്
25 തതഃ പാർഥം അഭിദ്രുത്യ ദുഃസഹഃ സ വിവിംശതിഃ
    അവാകിരച് ഛരൈസ് തീക്ഷ്ണൈഃ പരീപ്സൻ ഭ്രാതരം രണേ
26 താവ് ഉഭൗ ഗാർധ്രപത്രാഭ്യാം നിശിതാഭ്യാം ധനഞ്ജയഃ
    വിദ്ധ്വാ യുഗപദ് അവ്യഗ്രസ് തയോർ വാഹാൻ അസൂദയത്
27 തൗ ഹതാശ്വൗ വിവിദ്ധാംഗൗ ധൃതരാഷ്ട്രാത്മ ജാവ് ഉഭൗ
    അഭിപത്യ രഥൈർ അന്യൈർ അപനീതൗ പദാനുഗൈഃ
28 സർവാ ദിശശ് ചാഭ്യപതദ് ബീഭത്സുർ അപരാജിതഃ
    കിരീടമാലീ കൗന്തേയോ ലബ്ധലക്ഷോ മഹാബലഃ