മഹാഭാരതം മൂലം/വിരാടപർവം/അധ്യായം55

മഹാഭാരതം മൂലം/വിരാടപർവം
രചന:വ്യാസൻ
അധ്യായം55

1 [അർജ്]
     കർണ യത് തേ സഭാമധ്യേ ബഹു വാചാ വികത്ഥിതം
     ന മേ യുധി സമോ ഽസ്തീതി തദ് ഇദം പ്രത്യുപസ്ഥിതം
2 അവോചഃ പരുഷാ വാചോ ധർമം ഉത്സൃജ്യ കേവലം
     ഇദം തു ദുഷ്കരം മന്യേ യദ് ഇദം തേ ചികീർഷിതം
3 യത് ത്വയാ കഥിതം പൂർവം മാം അനാസാദ്യ കിം ചന
     തദ് അദ്യ കുരു രാധേയ കുരുമധ്യേ മയാ സഹ
4 യത് സഭായാം സ്മ പാഞ്ചാലീം ലിശ്യമാനാം ദുരാത്മഭിഃ
     ദൃഷ്ടവാൻ അസി തസ്യാദ്യ ഫലം ആപ്നുഹി കേവലം
5 ധർമപാശനിബദ്ധേന യൻ മയാ മർഷിതം പുരാ
     തസ്യ രാധേയ കോപസ്യ വിജയം പശ്യ മേ മൃധേ
6 ഏഹി കർണ മയാ സാർധം പ്രതിപദ്യസ്വ സാഗരം
     പ്രേക്ഷകാഃ കുരവഃ സർവേ ഭവന്തു സഹ സൈനികാഃ
7 [കർണ]
     ബ്രവീഷി വാചാ യത് പാർഥ കർമണാ തത് സമാചര
     അതിശേതേ ഹി വൈ വാചം കർമേതി പ്രഥിതം ഭുവി
8 യത് ത്വയാ മർഷിതം പൂർവം തദ് അശക്തേന മർഷിതം
     ഇതി ഗൃഹ്ണാമി തത് പാർഥ തവ ദൃഷ്ട്വാപരാക്രമം
9 ധർമപാശനിബദ്ധേന യദി തേ മർഷിതം പുരാ
     തഥൈവ ബദ്ധം ആത്മാനം അബദ്ധം ഇവ മന്യസേ
10 യദി താവദ് വനേവാസാ യഥോക്തശ് ചരിതസ് ത്വയാ
    തത് ത്വം ധർമാർഥവിത് ക്ലിഷ്ടഃ സമയം ഭേത്തും ഇച്ഛസി
11 യദി ശക്രഃ സ്വയം പാർഥ യുധ്യതേ തവ കാരണാത്
    തഥാപി ന വ്യഥാ കാ ചിൻ മമ സ്യാദ് വിക്രമിഷ്യതഃ
12 അയം കൗന്തേയ കാമസ് തേ നചിരാത് സമുപസ്ഥിതഃ
    യോത്സ്യസേ ത്വം മയാ സാർധം അദ്യ ദ്രക്ഷ്യസി മേ ബലം
13 [അർജ്]
    ഇദാനീം ഏവ താവത് ത്വം അപയാതോ രണാൻ മമ
    തേന ജീവസി രാധേയനിഹതസ് ത്വ് അനുജസ് തവ
14 ഭ്രാതരം ഘാതയിത്വാ ച ത്യക്ത്വാ രണശിരശ് ച കഃ
    ത്വദന്യഃ പുരുഷഃ സത്സു ബ്രൂയാദ് ഏവം വ്യവസ്ഥിതഃ
15 [വൈ]
    ഇതി കർണം ബ്രുവന്ന് ഏവ ബീഭത്സുർ അപരാജിതഃ
    അഭ്യയാദ് വിസൃജൻ ബാണാൻ കായാവരണ ഭേദിനഃ
16 പ്രതിജഗ്രാഹ താൻ കർണഃ ശരാൻ അഗ്നിശിഖോപമാൻ
    ശരവർഷേണ മഹതാ വർഷമാണ ഇവാംബുദഃ
17 ഉത്പേതുഃ ശരജാലാനി ഘോരരൂപാണി സർവശഃ
    അവിധ്യദ് അശ്വാൻ ബാഹോശ് ച ഹസ്താവാപം പൃഥക് പൃഥക്
18 സോ ഽമൃഷ്യമാണഃ കർണസ്യ നിഷംഗസ്യാവലംബനം
    ചിച്ഛേദ നിശിതാഗ്രേണ ശരേണ നതപർവണാ
19 ഉപാസംഗാദ് ഉപാദായ കർണോ ബാണാൻ അഥാപരാൻ
    വിവ്യാധ പാണ്ഡവം ഹസ്തേ തസ്യ മുഷ്ടിർ അശീര്യത
20 തതഃ പാർഥോ മഹാബാഹുഃ കർണസ്യ ധനുർ അച്ഛിനത്
    സ ശക്തിം പ്രാഹിണോത് തസ്മൈ താം പാർഥോ വ്യധമച് ഛരൈഃ
21 തതോ ഽഭിപേതുർ ബഹവോ രാധേയസ്യ പദാനുഗാഃ
    താംശ് ച ഗാണ്ഡീവനിർമുക്തൈഃ പ്രാഹിണോദ് യമസാദനം
22 തതോ ഽസ്യാശ്വാഞ് ശരൈസ് തീക്ഷ്ണൈർ ബീഭത്സുർ ഭാരസാധനൈഃ
    ആ കർണ മുക്തൈർ അഭ്യഘ്നംസ് തേ ഹതാഃ പ്രാപതൻ ഭുവി
23 അഥാപരേണ ബാണേന ജ്വലിതേന മഹാഭുജഃ
    വിവ്യാധ കർണം കൗന്തേയസ് തീക്ഷ്ണേനോരസി വീര്യവാൻ
24 തസ്യ ഭിത്ത്വാ തനുത്രാണം കായം അഭ്യപതച് ഛിരഃ
    തതഃ സ തമസാവിഷ്ടോ ന സ്മ കിം ചിത് പ്രജജ്ഞിവാൻ
25 സ ഗാഢവേദനോ ഹിത്വാ രണം പ്രായാദ് ഉദങ്മുഖഃ
    തതോ ഽർജുന ഉപാക്രോശദ് ഉത്തരശ് ച മഹാരഥഃ