മഹാഭാരതം മൂലം/വിരാടപർവം/അധ്യായം67

മഹാഭാരതം മൂലം/വിരാടപർവം
രചന:വ്യാസൻ
അധ്യായം67

1 [വിരട]
     കിമർഥം പാണ്ഡവശ്രേഷ്ഠ ഭാര്യാം ദുഹിതരം മമ
     പ്രതിഗ്രഹീതും നേമാം ത്വം മയാ ദത്താം ഇഹേച്ഛസി
2 [അർജ്]
     അന്തഃപുരേ ഽഹം ഉഷിതഃ സദാ പശ്യൻ സുതാം തവ
     രഹസ്യം ച പ്രകാശം ച വിശ്വസ്താ പിതൃവൻ മയി
3 പ്രിയോ ബഹുമതശ് ചാഹം നർതകോ ഗീതകോവിദഃ
     ആചാര്യവച് ച മാം നിത്യം മന്യതേ ദുഹിതാ തവ
4 വഹഃ സ്ഥയാ തയാ രാജൻ സഹ സംവത്സരോഷിതഃ
     അതി ശങ്കാ ഭവേത് സ്ഥാനേ തവ ലോകസ്യ ചാഭിഭോ
5 തസ്മാൻ നിമന്ത്രയേ ത്വാഹം ദുഹിതുഃ പൃഥിവീപതേ
     ശുദ്ധോ ജിതേന്ദ്രിയോ ദാന്തസ് തസ്യാഃ ശുദ്ധിഃ കൃതാ മയാ
6 സ്നുഷായാ ദുഹിതുർ വാപി പുത്രേ ചാത്മനി വാ പുനഃ
     അത്ര ശങ്കാം ന പശ്യാമി തേൻ അശുദ്ധിർ ഭവിഷ്യതി
7 അഭിഷംഗാദ് അഹം ഭീതോ മിഥ്യാചാരാത് പരന്തപ
     സ്നുഷാർഥം ഉത്തരാം രാജൻ പ്രതിഗൃഹ്ണാമി തേ സുതാം
8 സ്വസ്രീയോ വാസുദേവസ്യ സാക്ഷാദ് ദേവ ശിശുർ യഥാ
     ദയിതശ് ചക്രഹസ്തസ്യ ബാല ഏവാസ്ത്ര കോവിദഃ
9 അഭിമന്യുർ മഹാബാഹുഃ പുത്രോ മമ വിശാം പതൗ
     ജാമാതാ തവ യുക്തോ വൈ ഭർതാ ച ദുഹിതുസ് തവ
10 [വിരാട]
    ഉപപന്നം കുരുശ്രേഷ്ഠേ കുന്തീപുത്രേ ധനഞ്ജയേ
    യ ഏവം ധർമനിത്യശ് ച ജാതജ്ഞാനശ് ച പാണ്ഡവഃ
11 യത്കൃത്യം മന്യസേ പാർഥ ക്രിയതാം തദനന്തരം
    സർവേ കാമാഃ സമൃദ്ധാ മേ സംബന്ധീ യസ്യ മേ ഽർജുനഃ
12 [വൈ]
    ഏവം ബ്രുവതി രാജേന്ദ്രേ കുന്തീപുത്രോ യുധിഷ്ഠിരഃ
    അന്വജാനാത് സ സംയോഗം സമയേ മത്സ്യപാർഥയോഃ
13 തതോ മിത്രേഷു സർവേഷു വാസുദേവേ ച ഭാരത
    പ്രേഷയാം ആസ കൗന്തേയോ വിരാടശ് ച മഹീപതിഃ
14 തതസ് ത്രയോദശേ വർഷേ നിവൃത്തേ പഞ്ച പാണ്ഡവാഃ
    ഉപപ്ലവ്യേ വിരാടസ്യ സമപദ്യന്ത സർവശഃ
15 തസ്മിൻ വസംശ് ച ബീഭത്സുർ ആനിനായ ജനാർദനം
    ആനർതേഭ്യോ ഽപി ദാശാർഹാൻ അഭിമന്യും ച പാണ്ഡവഃ
16 കാശിരാജശ് ച ശൈബ്യശ് ച പ്രീയമാണൗ യുധിഷ്ഠിരേ
    അക്ഷൗഹിണീഭ്യാം സഹിതാവ് ആഗതൗ പൃഥിവീപതേ
17 അക്ഷൗഹിണ്യാ ച തേജസ്വീ യജ്ഞസേനോ മഹാബലഃ
    ദ്രൗപദ്യാശ് ച സുതാ വീരാഃ ശിഖണ്ഡീ ചാപരാജിതഃ
18 ധൃഷ്ടദ്യുമ്നശ് ച ദുർധർഷഃ സവ ശസ്ത്രഭൃതാം വരഃ
    സമസ്താക്ഷൗഹിണീ പാലാ യജ്വാനോ ഭൂരിദക്ഷിണാഃ
    സർവേ ശസ്ത്രാസ്ത്രസമ്പന്നാഃ സർവേ ശൂരാസ് തനുത്യജഃ
19 താൻ ആഗതാൻ അഭിപ്രേക്ഷ്യ മത്സ്യോ ധർമഭൃതാം വരഃ
    പ്രീതോ ഽഭവദ് ദുഹിതരം ദത്ത്വാ താം അഭിമന്യവേ
20 തതഃ പ്രയുപയാതേഷു പാർഥിവേഷു തതസ് തതഃ
    തത്രാഗമദ് വാസുദേവ വനമാലീ ഹലായുധഃ
    കൃതവർമാ ച ഹാർദിക്യോ യുയുധാനശ് ച സാത്യകിഃ
21 അനാധൃഷ്ടിസ് തഥാക്രൂരഃ സാംബോ നിശഠ ഏവ ച
    അഭിമന്യും ഉപാദായ സഹ മാത്രാ പരന്തപാഃ
22 ഇന്ദ്രസേനാദയശ് ചൈവ രഥൈസ് തൈഃ സുസമാഹിതൈഃ
    ആയയുഃ സഹിതാഃ സർവേ പരിസംവത്സരോഷിതാഃ
23 ദശനാഗസഹസ്രാണി ഹയാനാം ച ശതായുതം
    രഥാനാം അർബുദം പൂർണം നിഖർവം ച പദാതിനാം
24 വൃഷ്ണ്യന്ധകാശ് ച ബഹവോ ഭോജാശ് ച പരമൗജസഃ
    അന്വ്യയുർ വൃഷ്ണിശാർദൂലം വാസുദേവം മഹാദ്യുതിം
25 പാരിബർഹം ദദൗ കൃഷ്ണഃ പാണ്ഡവാനാം മഹാത്മനാം
    സ്ത്രിയോ രത്നാനി വാസാംസി പൃഥക്പൃഥഗ് അനേകശഃ
    തതോ വിവാഹോ വിധിവദ് വവൃതേ മത്സ്യപാർഥയോഃ
26 തതഃ ശംഖാശ് ച ഭേര്യശ് ച ഗോമുഖാഡംബരാസ് തഥാ
    പാർഥൈഃ സംയുജ്യമാനസ്യ നേദുർ മത്സ്യസ്യ വേശ്മനി
27 ഉച്ചാവചാൻ മൃഗാഞ് ജഘ്നുർ മേധ്യാംശ് ച ശതശഃ പശൂൻ
    സുരാ മൈരേയ പാനാനി പ്രഭൂതാന്യ് അഭ്യഹാരയൻ
28 ഗായനാഖ്യാന ശീലാശ് ച നടാ വൈതാലികാസ് തഥാ
    സ്തുവന്തസ് താൻ ഉപാതിഷ്ഠൻ സൂതാശ് ച സഹ മാഗധൈഃ
29 സുദേഷ്ണാം ച പുരസ്കൃത്യ മത്സ്യാനാം ച വരസ്ത്രിയഃ
    ആജഗ്മുശ് ചാരുസർവാംഗ്യഃ സുമൃഷ്ടമണികുണ്ഡലാഃ
30 വർണോപപന്നാസ് താ നാര്യോ രൂപവത്യഃ സ്വലം കൃതാഃ
    സർവാശ് ചാഭ്യഭവത് കൃഷ്ണാ രൂപേണ യശസാ ശ്രിയാ
31 പരിവാര്യോത്തരാം താസ് തു രാജപുത്രീം അലം കൃതാം
    സുതാം ഇവ മഹേന്ദ്രസ്യ പുരസ്കൃത്യോപതസ്ഥിരേ
32 താം പ്രത്യഗൃഹ്ണാത് കൗന്തേയഃ സുതസ്യാർഥേ ധനഞ്ജയഃ
    സൗഭദ്രസ്യാനവദ്യാംഗീം വിരാട തനയാം തദാ
33 തത്രാതിഷ്ഠൻ മഹാരാജോ രൂപം ഇന്ദ്രസ്യ ധാരയൻ
    സ്നുഷാം താം പ്രതിജഗ്രാഹ കുന്തീപുത്രോ യുധിഷ്ഠിരഃ
34 പ്രതിഗൃഹ്യ ച താം പാർഥഃ പുരസ്കൃത്യ ജനാർദനം
    വിവാഹം കാരയാം ആസ സൗഭദ്രസ്യ മഹാത്മനഃ
35 തസ്മൈ സപ്ത സഹസ്രാണി ഹയാനാം വാതരംഹസാം
    ദ്വേ ച നാഗശതേ മുഖ്യേ പ്രാദാദ് ബഹുധനം തദാ
36 കൃതേ വിവാഹേ തു തദാ ധർമപുത്രോ യുധിഷ്ഠിരഃ
    ബ്രാഹ്മണേഭ്യോ ദദൗ വിത്തം യദ് ഉപാഹരദ് അച്യുതഃ
37 ഗോസഹസ്രാണി രത്നാനി വസ്ത്രാണി വിവിധാനി ച
    ഭൂഷണാനി ച മുഖ്യാനി യാനാനി ശയനാനി ച
38 തൻ മഹോത്സവ സങ്കാശം ഹൃഷ്ടപുഷ്ട ജനാവൃതം
    നഗരം മത്സ്യരാജസ്യ ശുശുഭേ ഭരതർഷഭ