മഹാഭാരതം മൂലം/ശല്യപർവം/അധ്യായം25

←അധ്യായം24

മഹാഭാരതം മൂലം/ശല്യപർവം രചന:വ്യാസൻ അധ്യായം25

അധ്യായം26→

1 [സ്]
     ഗജാനീകേ ഹതേ തസ്മിൻ പാണ്ഡുപുത്രേണ ഭാരത
     വധ്യമാനേ ബലേ ചൈവ ഭീമസേനേന സംയുഗേ
 2 ചരന്തം ച തഥാ ദൃഷ്ട്വാ ഭീമസേനം അരിന്ദമം
     ദണ്ഡഹസ്തം യഥാ ക്രുദ്ദ്ധം അന്തകം പ്രാണഹാരിണം
 3 സമേത്യ സമരേ രാജൻ ഹതശേഷാഃ സുതാസ് തവ
     അദൃശ്യമാനേ കൗരവ്യേ പുത്രേ ദുര്യോധനേ തവ
     സോദര്യാഃ സഹിതാ ഭൂത്വാ ഭീമസേനം ഉപാദ്രവൻ
 4 ദുർമർഷണോ മഹാരാജ ജൈത്രോ ഭൂരി ബലോ രവിഃ
     ഇത്യ് ഏതേ സഹിതാ ഭൂത്വാ തത്ര പുത്രാഃ സമന്തതഃ
     ഭീമസേനം അഭിദ്രുത്യ രുരുധുഃ സവതോ ദിശം
 5 തതോ ഭീമോ മഹാരാജ സ്വരഥം പുനർ ആസ്ഥിതഃ
     മുമോച നിശിതാൻ ബാണാൻ പുത്രാണാം തവ മർമസു
 6 തേ കീര്യമാണാ ഭീമേന പുത്രാസ് തവ മഹാരണേ
     ഭീമസേനം അപാസേധൻ പ്രവണാദ് ഇവ കുഞ്ജരം
 7 തതഃ ക്രുദ്ധോ രണേ ഭീമഃ ശിരോ ദുർമർഷണസ്യ ഹ
     ക്ഷുരപ്രേണ പ്രമഥ്യാശു പാതയാം ആസ ഭൂതലേ
 8 തതോ ഽപരേണ ഭല്ലേന സർവാവരണഭേദിനാ
     ശ്രുതാന്തം അവധീദ് ഭീമസ് തവ പുത്രം മഹാരഥഃ
 9 ജയത്സേനം തതോ വിദ്ധ്വാ നാരാചേന ഹസന്ന് ഇവ
     പാതയാം ആസ കൗരവ്യം രഥോപസ്ഥാദ് അരിന്ദമഃ
     സ പപാത രഥാദ് രാജൻ ഭൂമൗ തൂർണം മമാര ച
 10 ശ്രുതർവാ തു തതോ ഭീമം ക്രുദ്ധോ വിവ്യാധ മാരിഷ
    ശതേന ഗൃധ്രവാജാനാം ശരാണാം നതപർവണാം
11 തതഃ ക്രുദ്ധോ രണേ ഭീമോ ജൈത്രം ഭൂരി ബലം രവിം
    ത്രീൻ ഏതാംസ് ത്രിഭിർ ആനർഛദ് ദ്വിഷാഗ്നിപ്രതിമൈഃ ശരൈഃ
12 തേ ഹതാ ന്യപതൻ ഭൂമൗ സ്യന്ദനേഭ്യോ മഹാരഥഃ
    വസന്തേ പുഷ്പശബലാ നികൃത്താ ഇവ കിംശുകാഃ
13 തതോ ഽപരേണ തീക്ഷ്ണേന നാരാച്ചേന പരന്തപഃ
    ദുർവിമോചനം ആഹത്യ പ്രേഷയാം ആസ മൃത്യവേ
14 സ ഹതഃ പ്രാപതദ് ഭൂമൗ സ്വരഥാദ് രഥിനാം വരഃ
    ഗിരേസ് തു കൂടജോ ഭഗ്നോ മാരുതേനേവ പാദപഃ
15 ദുഷ്പ്രധർഷം തതശ് ചൈവ സുജാതം ച സുതൗ തവ
    ഏകൈകം ന്യവധീത് സംഖ്യേ ദ്വാഭ്യാം ദ്വാഭ്യാം ചമൂമുഖേ
    തൗ ശിലീമുഖവിദ്ധാംഗൗ പേതതൂ രഥസത്തമൗ
16 തതോ യതന്തം അപരം അഭിവീക്ഷ്യ സുതം തവ
    ഭല്ലേന യുധി വിവ്യാധ ഭീമോ ദുർവിഷഹം രണേ
    സ പപാത ഹതോ വാഹാത് പശ്യതാം സർവധന്വിനാം
17 ദൃഷ്ട്വാ തു നിഹതാൻ ഭ്രാതൄൻ ബഹൂൻ ഏകേന സംയുഗേ
    അമർഷവശം ആപന്നഃ ശ്രുതർവാ ഭീമം അഭ്യയാത്
18 വിക്ഷിപൻ സുമഹച് ചാപം കാർതസ്വരവിഭൂഷിതം
    വിസൃജൻ സായകാംശ് ചൈവ വിഷാഗ്നിപ്രതിമാൻ ബഹൂൻ
19 സ തു രാജൻ ധനുശ് ഛിത്ത്വാ പാണ്ഡവസ്യ മഹാമൃധേ
    അഥൈനം ഛിന്നധന്വാനം വിംശത്യാ സമവാകിരത്
20 തതോ ഽന്യദ് ധനുർ ആദായ ഭീമസേനോ മഹാരഥഃ
    അവാകിരത് തവ സുതം തിഷ്ഠ തിഷ്ഠേതി ചാബ്രവീത്
21 മഹദ് ആസീത് തയോർ യുദ്ധം ചിത്രരൂപം ഭയാനകം
    യാദൃശം സമരേ പൂർവം ജംഭ വാസവയോർ അഭൂത്
22 തയോസ് തത്ര ശരൈർ മുക്തൈർ യമദണ്ഡനിഭൈഃ ശുഭൈഃ
    സമാച്ഛന്നാ ധരാ സർവാ ഖം ച സർവാ ദിശസ് തഥാ
23 തതഃ ശ്രുതർവാ സങ്ക്രുദ്ധോ ധനുർ ആയമ്യ സായകൈഃ
    ഭീമസേനം രണേ രാജൻ ബാഹ്വോർ ഉരസി ചാർപയത്
24 സോ ഽതിവിദ്ധോ മഹാരാജ തവ പുത്രേണ ധന്വിനാ
    ഭീമഃ സഞ്ചുക്ഷുഭേ ക്രുദ്ധഃ പർവണീവ മഹോദധിഃ
25 തതോ ഭീമോ രുഷാവിഷ്ടഃ പുത്രസ്യ തവ മാരിഷ
    സാരഥിം ചതുരശ് ചാശ്വാൻ ബാണൈർ നിന്യേ യമക്ഷയം
26 വിരഥം തം സമാലക്ഷ്യ വിശിഖൈർ ലോമവാഹിഭിഃ
    അവാകിരദ് അമേയാത്മാ ദർശയൻ പാണിലാഘവം
27 ശ്രുതർവാ വിരഥോ രാജന്ന് ആദദേ ഖഡ്ഗ ചർമണീ
    അഥാസ്യാദദതഃ ഖഡ്ഗം ശതചന്ദ്രം ച ഭാനുമത്
    ക്ഷുരപ്രേണ ശിരഃ കായാത് പാതയാം ആസ പാണ്ഡവഃ
28 ഛിന്നോത്തമാംഗസ്യ തതഃ ക്ഷുരപ്രേണ മഹാത്മനഃ
    പപാത കായഃ സ രഥാദ് വസുധാം അനുനാദയൻ
29 തസ്മിൻ നീപതിതേ വീരേ താവകാ ഭയമോഹിതാഃ
    അഭ്യദ്രവന്ത സംഗ്രാമേ ഭീമസേനം യുയുത്സവഃ
30 താൻ ആപതത ഏവാശു ഹതശേഷാദ് ബലാർണവാത്
    ദംശിതഃ പ്രതിജഗ്രാഹ ഭീമസേനഃ പ്രതാപവാൻ
    തേ തു തം വൈ സമാസാദ്യ പരിവവ്രുഃ സമന്തതഃ
31 തതസ് തു സംവൃതോ ഭീമസ് താവാകൈർ നിശിതൈഃ ശരൈഃ
    പീഡയാം ആസ താൻ സർവാൻ സഹസ്രാക്ഷ ഇവാസുരാൻ
32 തതഃ പഞ്ച ശതാൻ ഹത്വാ സവരൂഥാൻ മഹാരഥാൻ
    ജഘാന കുഞ്ജരാനീകം പുനഃ സപ്തശതം യുധി
33 ഹത്വാ ദശസഹസ്രാണി പത്തീനാം പരമേഷുഭിഃ
    വാജിനാം ച ശതാന്യ് അഷ്ടൗ പാണ്ഡവഃ സ്മ വിരാജതേ
34 ഭീമസേനസ് തു കൗന്തേയോ ഹത്വാ യുദ്ധേ സുതാംസ് തവ
    മേനേ കൃതാർതഹ്ം ആത്മാനം സഫലം ജന്മ ച പ്രഭോ
35 തം തഥാ യുധ്യമാനം ച വിനിഘ്നന്തം ച താവകാൻ
    ഈക്ഷിതും നോത്സഹന്തേ സ്മ തവ സൈന്യാനി ഭാരത
36 വിദ്രാവ്യ തു കുരൂൻ സർവാംസ് താംശ് ച ഹത്വാ പദാനുഗാൻ
    ദോർഭ്യാം ശബ്ദാം തതശ് ചക്രേ ത്രാസയാനോ മഹാദ്വിപാൻ
37 ഹതഭൂയിഷ്ഠ യോധാ തു തവ സേനാ വിശാം പതേ
    കിം ചിച് ഛേഷാ മഹാരാജ കൃപണാ സമപദ്യത