മഹാഭാരതം മൂലം/ശല്യപർവം/അധ്യായം48

മഹാഭാരതം മൂലം/ശല്യപർവം
രചന:വ്യാസൻ
അധ്യായം48

1 [വൈ]
     ഇന്ദ്ര തീർഥം തതോ ഗത്വാ യദൂനാം പ്രവരോ ബലീ
     വിപ്രേഭ്യോ ധനരത്നാനി ദദൗ സ്നാത്വാ യഥാവിധി
2 തത്ര ഹ്യ് അമര രാജോ ഽസാവ് ഈജേ ക്രതുശതേന ഹ
     ബൃഹസ്പതേശ് ച ദേവേശഃ പ്രദദൗ വിപുലം ധനം
3 നിരർഗലാൻ സജാരൂഥ്യാൻ സർവാൻ വിവിധദക്ഷിണാൻ
     ആജഹാര ക്രതൂംസ് തത്ര യഥോക്താൻ വേദപാരഗൈഃ
4 താൻ ക്രതൂൻ ഭരതശ്രേഷ്ഠ ശതകൃത്വോ മഹാദ്യുതിഃ
     പൂരയാം ആസ വിധിവത് തതഃ ഖ്യാതഃ ശതക്രതുഃ
5 തസ്യ നാമ്നാ ച തത് തീർഥം ശിവം പുണ്യം സനാതനം
     ഇന്ദ്ര തീർഥം ഇതി ഖ്യാതം സർവപാപപ്രമോചനം
6 ഉപസ്പൃശ്യ ച തത്രാപി വിധിവൻ മുസലായുധഃ
     ബ്രാഹ്മണാൻ പൂജയിത്വാ ച പാനാച്ഛാദന ഭോജനൈഃ
     ശുഭം തീർഥവരം തസ്മാദ് രാമ തീർഥം ജഗാമ ഹ
7 യത്ര രാമോ മഹാഭാഗോ ഭാർഗവഃ സുമഹാതപാഃ
     അസകൃത് പൃഥിവീം സർവാം ഹതക്ഷത്രിയ പുംഗവാം
8 ഉപാധ്യായം പുരസ്കൃത്യ കശ്യപം മുനിസത്തമം
     അജയദ് വാജപേയേന സോ ഽശ്വമേധ ശതേന ച
     പ്രദദൗ ദക്ഷിണാർഥം ച പൃഥിവീം വൈ സസാഗരാം
9 രാമോ ദത്ത്വാ ധനം തത്ര ദ്വിജേഭ്യോ ജനമേജയ
     ഉപസ്പൃശ്യ യഥാന്യായം പൂജയിത്വാ തഥാ ദ്വിജാൻ
10 പുണ്യേ തീർഥേ ശുഭേ ദേശേ വസു ദത്ത്വാ ശുഭാനനഃ
    മുനീംശ് ചൈവാഭിവാദ്യാഥ യമുനാതീർഥം ആഗമത്
11 യത്രാനയാം ആസ തദാ രാജസൂയം മഹീപതേ
    പുത്രോ ഽദിതേർ മഹാഭാഗോ വരുണോ വൈ സിതപ്രഭഃ
12 തത്ര നിർജിത്യ സംഗ്രാമേ മാനുഷാൻ ദൈവതാംസ് തഥാ
    വരം ക്രതും സമാജഹ്രേ വരുണഃ പരവീരഹാ
13 തസ്മിൻ ക്രതുവരേ വൃത്തേ സംഗ്രാമഃ സമജായത
    ദേവാനാം ദാനവാനാം ച ത്രൈലോക്യസ്യ ക്ഷയാവഹഃ
14 രാജസൂയേ ക്രതുശ്രേഷ്ഠേ നിവൃത്തേ ജനമേജയ
    ജായതേ സുമഹാഘോരഃ സംഗ്രാമഃ ക്ഷത്രിയാൻ പ്രതി
15 സീരായുധസ് തദാ രാമസ് തസ്മിംസ് തീർഥവരേ തദാ
    തത്ര സ്നാത്വാ ച ദത്ത്വാ ച ദ്വിജേഭ്യോ വസു മാധവഃ
16 വനമാലീ തതോ ഹൃഷ്ടഃ സ്തൂയമാനോ ദ്വിജാതിഭിഃ
    തസ്മാദ് ആദിത്യതീർഥം ച ജഗാമ കമലേക്ഷണഃ
17 യത്രേഷ്ട്വാ ഭഗവാഞ് ജ്യോതിർ ഭാസ്കരോ രാജസത്തമ
    ജ്യോതിഷാം ആധിപത്യം ച പ്രഭാവം ചാഭ്യപദ്യത
18 തസ്യാ നദ്യാസ് തു തീരേ വൈ സർവേ ദേവാഃ സവാസവാഃ
    വിശ്വേ ദേവാഃ സമരുതോ ഗന്ധർവാപ്സരസശ് ച ഹ
19 ദ്വൈപായനഃ ശുകശ് ചൈവ കൃഷ്ണശ് ച മധുസൂദനഃ
    യക്ഷാശ് ച രാക്ഷസാശ് ചൈവ പിശാചാശ് ച വിശാം പതേ
20 ഏതേ ചാന്യേ ച ബഹവോ യോഗസിദ്ധാഃ സഹസ്രശഃ
    തസ്മിംസ് തീർഥേ സരസ്വത്യാഃ ശിവേ പുണ്യേ പരന്തപ
21 തത്ര ഹത്വാ പുരാ വിഷ്ണുർ അസുരൗ മധു കൗടഭൗ
    ആപ്ലുതോ ഭരതശ്രേഷ്ഠ തീർഥപ്രവര ഉത്തമേ
22 ദ്വൈപായനശ് ച ധർമാത്മാ തത്രൈവാപ്ലുത്യ ഭാരത
    സമ്പ്രാപ്തഃ പരമം യോഗം സിദ്ധിം ച പരമാം ഗതഃ
23 അസിതോ ദേവലശ് ചൈവ തസ്മിന്ന് ഏവ മഹാതപാഃ
    പരമം യോഗം ആസ്ഥായ ഋഷിർ യോഗം അവാപ്തവാൻ