മഹാഭാരതം മൂലം/സ്വർഗാരോഹണപർവം/അധ്യായം1

മഹാഭാരതം മൂലം/സ്വർഗാരോഹണപർവം
രചന:വ്യാസൻ
അധ്യായം1

1 [ജ്]
     സ്വർഗം ത്രിവിഷ്ടപം പ്രാപ്യ മമ പൂർവപിതാമഹാഃ
     പാണ്ഡവാ ധാർതരാഷ്ട്രാശ് ച കാനി സ്ഥാനാനി ഭേജിരേ
2 ഏതദ് ഇച്ഛാമ്യ് അഹം ശ്രോതും സർവവിച് ചാസി മേ മതഃ
     മഹർഷിണാഭ്യനുജ്ഞാതോ വ്യാസേനാദ്ഭുത കർമണാ
3 [വൈ]
     സ്വർഗം ത്രിവിഷ്ടപം പ്രാപ്യ തവ പൂർവപിതാമഹാഃ
     യുധിഷ്ഠിരപ്രഭൃതയോ യദ് അകുർവത തച് ഛൃണു
4 സ്വർഗം ത്രിവിഷ്ടപം പ്രാപ്യ ധർമരാജോ യുധിഷ്ഠിരഃ
     ദുര്യോധനം ശ്രിയാ ജുഷ്ടം ദദർശാസീനം ആസനേ
5 ഭ്രാജമാനാം ഇവാദിത്യം വീര ലക്ഷ്മ്യാഭിസംവൃതം
     ദേവൈർ ഭ്രാജിഷ്ണുഭിഃ സാധ്യൈഃ സഹിതം പുണ്യകർമഭിഃ
6 തതോ യുധിഷ്ഠിരോ ദൃഷ്ട്വ ദുര്യോധനം അമർഷിതഃ
     സഹസാ സംനിവൃത്തോ ഽഭൂച് ഛ്രിയം ദൃഷ്ട്വാ സുയോധനേ
7 ബ്രുവന്ന് ഉച്ചൈർ വചസ് താൻ വൈ നാഹം ദുര്യോധനേന വൈ
     സഹിതഃ കാമയേ ലോകാംൽ ലുബ്ധേനാദീർഘ ദർശിനാ
8 യത്കൃതേ പൃഥിവീ സർവാ സുഹൃദോ ബാന്ധവാസ് തഥാ
     ഹതാസ്മാഭിഃ പ്രസഹ്യാജൗ ക്ലിഷ്ടൈഃ പൂർവം മഹാവനേ
9 ദ്രൗപദീ ച സഭാമധ്യേ പാഞ്ചാലീ ധർമചാരിണീ
     പരിക്ലിഷ്ടാനവദ്യാംഗീ പത്നീ നോ ഗുരുസംനിധൗ
10 സ്വസ്തി ദേവാ ന മേ കാമഃ സുയോധനം ഉദീക്ഷിതും
    തത്രാഹം ഗന്തും ഇച്ഛാമി യത്ര തേ ഭ്രാതരോ മമ
11 മൈവം ഇത്യ് അബ്രവീത് തം തു നാരദഃ പ്രഹസന്ന് ഇവ
    സ്വർഗേ നിവാസോ രാജേന്ദ്ര വിരുദ്ധം ചാപി നശ്യതി
12 യുധിഷ്ഠിര മഹാബാഹോ മൈവം വോചഃ കഥം ചന
    ദുര്യോധനം പ്രതി നൃപം ശൃണു ചേദം വചോ മമ
13 ഏഷ ദുര്യോധനോ രാജാ പൂജ്യതേ ത്രിദശൈഃ സഹ
    സദ്ഭിശ് ച രാജപ്രവരൈർ യ ഇമേ സ്വർഗവാസിനഃ
14 വീരലോകഗതിം പ്രാപ്തോ യുദ്ധേ ഹുത്വാത്മനസ് തനും
    യൂയം സ്വർഗേ സുരസമാ യേനാ യുദ്ധേ സമാസിതാഃ
15 സ ഏഷ ക്ഷത്രധർമേണ സ്ഥാനം ഏതദ് അവാപ്തവാൻ
    ഭയേ മഹതി യോ ഽഭീതോ ബഭൂവ പൃഥിവീപതിഃ
16 ന തൻ മനസി കർതവ്യം പുത്ര യദ് ദ്യൂതകാരിതം
    ദ്രൗപദ്യാശ് ച പരിക്ലേശം ന ചിന്തയതും അർഹസി
17 യേ ചാന്യേ ഽപി പരിക്ലേശാ യുഷ്മാകം ദ്യൂതകാരിതാഃ
    സംഗ്രാമേഷ്വ് അഥ വാന്യാത്ര ന താൻ സംസ്മർതും അർഹസി
18 സമാഗച്ഛ യഥാന്യായം രാജ്ഞാ ദുര്യോധനേന വൈ
    സ്വർഗോ ഽയം നേഹ വൈരാണി ഭവന്തി മനുജാധിപ
19 നാരദേനൈവം ഉക്തസ് തു കുരുരാജോ യുധിഷ്ഠിരഃ
    ഭ്രാതൄൻ പപ്രച്ഛ മേധാവീ വാക്യം ഏതദ് ഉവാച ഹ
20 യദി ദുര്യോധനസ്യൈതേ വീരലോകഃ സനാതനാഃ
    അധർമജ്ഞസ്യ പാപസ്യ പൃഥിവീ സുഹൃദ് അദ്രുഹഃ
21 യത്കൃതേ പൃഥിവീ നഷ്ടാ സഹയാ സരഥ ദ്വിപാ
    വയം ച മന്യുനാ ദഗ്ധാ വൈരം പ്രതിചികീർഷവഃ
22 യേ തേ വീരാ മഹാത്മാനോ ഭ്രാതരോ മേ മഹാവ്രതാഃ
    സത്യപ്രതിജ്ഞാ ലോകസ്യ ശൂരാ വൈ സത്യവാദിനഃ
23 തേഷാം ഇദാനീം കേ ലോകാ ദ്രഷ്ടും ഇച്ഛാമി താൻ അഹം
    കർണം ചൈവ മഹാത്മാനം കൗന്തേയം സത്യസംഗരം
24 ധൃഷ്ടദ്യുമ്നം സാത്യകിം ച ധൃഷ്ടദ്യുമ്നസ്യ ചാത്മജാൻ
    യേ ച ശസ്ത്രൈർ വധം പ്രാപ്താഃ ക്ഷത്രധർമേണ പാർഥിവാഃ
25 ക്വ നു തേ പാർഥിവാ ബ്രഹ്മന്ന് ഏതാൻ പശ്യാമി നാരദ
    വിരാടദ്രുപദൗ ചൈവ ധൃഷ്ടകേതുമുഖാംശ് ച താൻ
26 ശിഖണ്ഡിനം ച പാഞ്ചാല്യം ദ്രൗപദേയാംശ് ച സർവശഃ
    അഭിമന്യും ച ദുർധർഷം ദ്രഷ്ടും ഇച്ഛാമി നാരദ