ശ്രീമദ് ഭാഗവതം/ദ്വിതീയഃ സ്കന്ധഃ/തൃതീയോധ്യായഃ
|
ശ്രീമദ് ഭാഗവതം |
|---|
ശ്രീശുക ഉവാച
ഏവമേതന്നിഗദിതം പൃഷ്ടവാൻ യദ്ഭവാൻ മമ
നൃണാം യന്മ്രിയമാണാനാം മനുഷ്യേഷു മനീഷിണാം ൧
ബ്രഹ്മവർചസകാമസ്തു യജേത ബ്രഹ്മണഃ പതിം
ഇന്ദ്രമിന്ദ്രിയകാമസ്തു പ്രജാകാമഃ പ്രജാപതീൻ ൨
ദേവീം മായാം തു ശ്രീകാമസ്തേജസ്കാമോ വിഭാവസും
വസുകാമോ വസൂൻ രുദ്രാൻ വീര്യകാമോഥ വീര്യവാൻ ൩
അന്നാദ്യകാമസ്ത്വദിതിം സ്വർഗകാമോദിതേഃ സുതാൻ
വിശ്വാന്ദേവാൻ രാജ്യകാമഃ സാധ്യാൻസംസാധകോ വിശാം ൪
ആയുഷ്കാമോശ്വിനൗ ദേവൗ പുഷ്ടികാമ ഇലാം യജേത്
പ്രതിഷ്ഠാകാമഃ പുരുഷോ രോദസീ ലോകമാതരൗ ൫
രൂപാഭികാമോ ഗന്ധർവാൻ സ്ത്രീകാമോപ്സര ഉർവശീം
ആധിപത്യകാമഃ സർവേഷാം യജേത പരമേഷ്ഠിനം ൬
യജ്ഞം യജേദ് യശസ്കാമഃ കോശകാമഃ പ്രചേതസം
വിദ്യാകാമസ്തു ഗിരിശം ദാന്പത്യാർഥ ഉമാം സതീം ൭
ധർമാർഥ ഉത്തമശ്ലോകം തന്തുഃ തന്വൻ പിതൃൻ യജേത്
രക്ഷാകാമഃ പുണ്യജനാനോജസ്കാമോ മരുദ്ഗണാൻ ൮
രാജ്യകാമോ മനൂൻ ദേവാൻ നിരൃതിം ത്വഭിചരൻ യജേത്
കാമകാമോ യജേത് സോമമകാമഃ പുരുഷം പരം ൯
അകാമഃ സർവകാമോ വാ മോക്ഷകാമ ഉദാരധീഃ
തീവ്രേണ ഭക്തിയോഗേന യജേത ഉരുഷം പരം ൧൦
ഏതാവാനേവ യജതാമിഹ നിഃശ്രേയസോദയഃ
ഭഗവത്യചലോ ഭാവോ യദ് ഭാഗവതസങ്ഗതഃ ൧൧
ജ്ഞാനം യദാപ്രതിനിവൃത്തഗുണോർമിചക്രമാത്മപ്രസാദ ഉത യത്ര ഗുണേഷ്വസങ്ഗഃ
കൈവല്യസമ്മതപഥസ്ത്വഥ ഭക്തിയോഗഃ കോ നിർവൃതോ ഹരികഥാസു രതിം ന കുര്യാത് ൧൨
ശൗനക ഉവാച
ഇത്യഭിവ്യാഹൃതം രാജാ നിശമ്യ ഭരതർഷഭഃ
കിമന്യത്പൃഷ്ടവാൻ ഭൂയോ വൈയാസകിമൃഷിം കവിം ൧൩
ഏതച്ഛുശ്രൂഷതാം വിദ്വൻ സൂത നോർഹസി ഭാഷിതും
കഥാ ഹരികഥോദർകാഃ സതാം സ്യുഃ സദസി ധ്രുവം ൧൪
സ വൈ ഭാഗവതോ രാജാ പാണ്ഡവേയോ മഹാരഥഃ
ബാലക്രീഡനകൈഃ ക്രീഡൻ കൃഷ്ണക്രീഡാം യ ആദദേ ൧൫
വൈയാസകിശ്ച ഭഗവാൻ വാസുദേവപരായണഃ
ഉരുഗായഗുണോദാരാഃ സതാം സ്യുർഹി സമാഗമേ ൧൬
ആയുർഹരതി വൈ പുംസാമുദ്യന്നസ്തം ച യന്നസൗ
തസ്യർതേ യത്ക്ഷണോ നീത ഉത്തമശ്ലോകവാർതയാ ൧൭
തരവഃ കിം ന ജീവന്തി ഭസ്ത്രാഃ കിം ന ശ്വസന്ത്യുത
ന ഖാദന്തി ന മേഹന്തി കിം ഗ്രാമേ പശവോപരേ ൧൮
ശ്വവിഡ്വരാഹോഷ്ട്രഖരൈഃ സംസ്തുതഃ പുരുഷഃ പശുഃ
ന യത്കർണപഥോപേതോ ജാതു നാമ ഗദാഗ്രജഃ ൧൯
ബിലേ ബതോരുക്രമവിക്രമാൻ യേ ന ശൃണ്വതഃ കർണപുടേ നരസ്യ
ജിഹ്വാസതീ ദാർദുരികേവ സൂത ന ചോപഗായത്യുരുഗായഗാഥാഃ ൨൦
ഭാരഃ പരം പട്ടകിരീടജുഷ്ടമപ്യുത്തമാങ്ഗം ന നമേന്മുകുന്ദം
ശാവൗ കരൗ നോ കുരുതേ സപര്യാം ഹരേർലസത്കാഞ്ചനകങ്കണൗ വാ ൨൧
ബർഹായിതേ തേ നയനേ നരാണാം ലിങ്ഗാനിവിഷ്ണോർന നിരീക്ഷതോ യേ
പാദൗ നൃണാം തൗ ദ്രുമജന്മഭാജൗ ക്ഷേത്രാണി നാനുവ്രജതോ ഹരേര്യൗ ൨൨
ജീവഞ്ഛവോ ഭാഗവതാങ്ഘ്രിരേണും ന ജാതു മർത്യോഭിലഭേത യസ്തു
ശ്രീവിഷ്ണുപദ്യാ മനുജസ്തുലസ്യാഃ ശ്വസഞ്ഛവോ യസ്തു ന വേദ ഗന്ധം ൨൩
തദശ്മസാരം ഹൃദയം ബതേദം യദ് ഗൃഹ്യമാണൈർഹരിനാമധേയൈഃ
ന വിക്രിയേതാഥ യദാ വികാരോ നേത്രേ ജലം ഗാത്രരുഹേഷു ഹർഷഃ ൨൪
അഥാഭിധേഹ്യങ്ഗ മനോനുകൂലം പ്രഭാഷസേ ഭാഗവതപ്രധാനഃ
യദാഹ വൈയാസകിരാത്മവിദ്യാവിശാരദോ നൃപതിം സാധു പുഷ്ടഃ ൨൫
ഇതി ശ്രീമദ്ഭാഗവതേ മഹാപുരാണേ പാരമഹംസ്യാം സംഹിതായാം ദ്വിതീയസ്കന്ധേ
തൃതീയോധ്യായഃ