ശ്രീമദ് ഭാഗവതം (മൂലം) / നവമഃ സ്കന്ധഃ (സ്കന്ധം 9) / അദ്ധ്യായം 12

← സ്കന്ധം 9 : അദ്ധ്യായം 11

സ്കന്ധം 9 : അദ്ധ്യായം 13 →

ശ്രീമദ് ഭാഗവതം (മൂലം) / നവമഃ സ്കന്ധഃ (സ്കന്ധം 9) / അദ്ധ്യായം 12

ശ്രീശുക ഉവാച

കുശസ്യ ചാതിഥിസ്തസ്മാന്നിഷധസ്തത്സുതോ നഭഃ ।
പുണ്ഡരീകോഽഥ തത്പുത്രഃ ക്ഷേമധന്വാഭവത്തതഃ ॥ 1 ॥

ദേവാനീകസ്തതോഽനീഹഃ പാരിയാത്രോഽഥ തത്സുതഃ ।
തതോ ബലസ്ഥലസ്തസ്മാദ്‌വജ്രനാഭോഽർക്കസംഭവഃ ॥ 2 ॥

ഖഗണസ്തത്സുതസ്തസ്മാദ്‌വിധൃതിശ്ചാഭവത്സുതഃ ।
തതോ ഹിരണ്യനാഭോഽഭൂദ്‌യോഗാചാര്യസ്തു ജൈമിനേഃ ॥ 3 ॥

ശിഷ്യഃ കൌസല്യ ആധ്യാത്മം യാജ്ഞവൽക്യോഽധ്യഗാദ്യതഃ ।
യോഗം മഹോദയമൃഷിർഹൃദയഗ്രന്ഥിഭേദകം ॥ 4 ॥

പുഷ്യോ ഹിരണ്യനാഭസ്യ ധ്രുവസന്ധിസ്തതോഽഭവത് ।
സുദർശനോഽഥാഗ്നിവർണ്ണഃ ശീഘ്രസ്തസ്യ മരുഃ സുതഃ ॥ 5 ॥

യോഽസാവാസ്തേ യോഗസിദ്ധഃ കലാപഗ്രാമമാശ്രിതഃ ।
കലേരന്തേ സൂര്യവംശം നഷ്ടം ഭാവയിതാ പുനഃ ॥ 6 ॥

തസ്മാത്പ്രസുശ്രുതസ്തസ്യ സന്ധിസ്തസ്യാപ്യമർഷണഃ ।
മഹസ്വാംസ്തത്സുതസ്തസ്മാദ് വിശ്വസാഹ്വോഽന്വജായത ॥ 7 ॥

തതഃ പ്രസേനജിത് തസ്മാത് തക്ഷകോ ഭവിതാ പുനഃ ।
തതോ ബൃഹദ്ബലോ യസ്തു പിത്രാ തേ സമരേ ഹതഃ ॥ 8 ॥

ഏതേ ഹീക്ഷ്വാകുഭൂപാലാ അതീതാഃ ശൃണ്വനാഗതാൻ ।
ബൃഹദ്ബലസ്യ ഭവിതാ പുത്രോ നാമ ബൃഹദ്രണഃ ॥ 9 ॥

ഊരുക്രിയഃ സുതസ്തസ്യ വത്സവൃദ്ധോ ഭവിഷ്യതി ।
പ്രതിവ്യോമസ്തതോ ഭാനുർദ്ദിവാകോ വാഹിനീപതിഃ ॥ 10 ॥

സഹദേവസ്തതോ വീരോ ബൃഹദശ്വോഽഥ ഭാനുമാൻ ।
പ്രതീകാശ്വോ ഭാനുമതഃ സുപ്രതീകോഽഥ തത്സുതഃ ॥ 11 ॥

ഭവിതാ മരുദേവോഽഥ സുനക്ഷത്രോഽഥ പുഷ്കരഃ ।
തസ്യാന്തരിക്ഷസ്തത്പുത്രഃ സുതപാസ്തദമിത്രജിത് ॥ 12 ॥

ബൃഹദ്രാജസ്തു തസ്യാപി ബർഹിസ്തസ്മാത്കൃതഞ്ജയഃ ।
രണഞ്ജയസ്തസ്യ സുതഃ സഞ്ജയോ ഭവിതാ തതഃ ॥ 13 ॥

തസ്മാച്ഛാക്യോഽഥ ശുദ്ധോദോ ലാംഗലസ്തത്സുതഃ സ്മൃതഃ ।
തതഃ പ്രസേനജിത് തസ്മാത്ക്ഷുദ്രകോ ഭവിതാ തതഃ ॥ 14 ॥

രണകോ ഭവിതാ തസ്മാത് സുരഥസ്തനയസ്തതഃ ।
സുമിത്രോ നാമ നിഷ്ഠാന്ത ഏതേ ബാർഹദ്ബലാന്വയാഃ ॥ 15 ॥

ഇക്ഷ്വാകൂണാമയം വംശഃ സുമിത്രാന്തോ ഭവിഷ്യതി ।
യതസ്തം പ്രാപ്യ രാജാനം സംസ്ഥാം പ്രാപ്സ്യതി വൈ കലൌ ॥ 16 ॥