മഹാഭാരതം മൂലം/ആദിപർവം/അധ്യായം23
| ←അധ്യായം22 | മഹാഭാരതം മൂലം/ആദിപർവം രചന: അധ്യായം 23 |
അധ്യായം24→ |
1 [സൂ]
സുപർണേനോഹ്യമാനാസ് തേ ജഗ്മുസ് തം ദേശം ആശു വൈ
സാഗരാംബുപരിക്ഷിപ്തം പക്ഷിസംഘ നിനാദിതം
2 വിചിത്രഫലപുഷ്പാഭിർ വനരാജിഭിർ ആവൃതം
ഭവനൈർ ആവൃതം രമ്യൈസ് തഥാ പദ്മാകരൈർ അപി
3 പ്രസന്നസലിലൈശ് ചാപി ഹ്രദൈശ് ചിത്രൈർ വിഭൂഷിതം
ദിവ്യഗന്ധവഹൈഃ പുണ്യൈർ മാരുതൈർ ഉപവീജിതം
4 ഉപജിഘ്രദ്ഭിർ ആകാശം വൃക്ഷൈർ മലയജൈർ അപി
ശോഭിതം പുഷ്പവർഷാണി മുഞ്ചദ്ഭിർ മാരുതോദ്ധുതൈഃ
5 കിരദ്ഭിർ ഇവ തത്രസ്ഥാൻ നാഗാൻ പുഷ്പാംബുവൃഷ്ടിഭിഃ
മനഃ സംഹർഷണം പുണ്യം ഗന്ധർവാപ്സരസാം പ്രിയം
നാനാപക്ഷിരുതം രമ്യം കദ്രൂ പുത്ര പ്രഹർഷണം
6 തത് തേ വനം സമാസാദ്യ വിജഹ്രുഃ പന്നഗാ മുദാ
അബ്രുവംശ് ച മഹാവീര്യം സുപർണം പതഗോത്തമം
7 വഹാസ്മാൻ അപരം ദ്വീപം സുരമ്യം വിപുലോദകം
ത്വം ഹി ദേശാൻ ബഹൂൻ രമ്യാൻ പതൻ പശ്യസി ഖേചര
8 സ വിചിന്ത്യാബ്രവീത് പക്ഷീ മാതരം വിനതാം തദാ
കിം കാരണം മയാ മാതഃ കർതവ്യം സർപഭാഷിതം
9 [വി]
ദാസീ ഭൂതാസ്മ്യ് അനാര്യായാ ഭഗിന്യാഃ പതഗോത്തമ
പണം വിതഥം ആസ്ഥായ സർപൈർ ഉപധിനാ കൃതം
10 [സൂ]
തസ്മിംസ് തു കഥിതേ മാത്രാ കാരണേ ഗഗനേ ചരഃ
ഉവാച വചനം സർപാംസ് തേന ദുഃഖേന ദുഃഖിതഃ
11 കിം ആഹൃത്യ വിദിത്വാ വാ കിം വാ കൃത്വേഹ പൗരുഷം
ദാസ്യാദ് വോ വിപ്രമുച്യേയം സത്യം ശംസത ലേലിഹാഃ
12 ശ്രുത്വാ തം അബ്രുവൻ സർപാ ആഹരാമൃതം ഓജസാ
തതോ ദാസ്യാദ് വിപ്രമോക്ഷോ ഭവിതാ തവ ഖേചര