മഹാഭാരതം മൂലം/ആദിപർവം/അധ്യായം25
| ←അധ്യായം24 | മഹാഭാരതം മൂലം/ആദിപർവം രചന: അധ്യായം 25 |
അധ്യായം26→ |
1 [സൂ]
തസ്യ കണ്ഠം അനുപ്രാപ്തോ ബ്രാഹ്മണഃ സഹ ഭാര്യയാ
ദഹൻ ദീപ്ത ഇവാംഗാരസ് തം ഉവാചാന്തരിക്ഷഗഃ
2 ദ്വിജോത്തമ വിനിർഗച്ഛ തൂർണം ആസ്യാദ് അപാവൃതാൻ
ന ഹി മേ ബ്രാഹ്മണോ വധ്യഃ പാപേഷ്വ് അപി രതഃ സദാ
3 ബ്രുവാണം ഏവം ഗരുഡം ബ്രാഹ്മണഃ സമഭാഷത
നിഷാദീ മമ ഭാര്യേയം നിർഗച്ഛതു മയാ സഹ
4 [ഗ്]
ഏതാം അപി നിഷാദീം ത്വം പരിഗൃഹ്യാശു നിഷ്പത
തൂർണം സംഭാവയാത്മാനം അജീർണം മമ തേജസാ
5 [സ്]
തതഃ സ വിപ്രോ നിഷ്ക്രാന്തോ നിഷാദീ സഹിതസ് തദാ
വർധയിത്വാ ച ഗരുഡം ഇഷ്ടം ദേശം ജഗാമ ഹ
6 സഹഭാര്യേ വിനിഷ്ക്രാന്തേ തസ്മിൻ വിപ്രേ സ പക്ഷിരാട്
വിതത്യ പക്ഷാവ് ആകാശം ഉത്പപാത മനോജവഃ
7 തതോ ഽപശ്യത് സ പിതരം പൃഷ്ഠശ് ചാഖ്യാതവാൻ പിതുഃ
അഹം ഹി സർപൈഃ പ്രഹിതഃ സോമം ആഹർതും ഉദ്യതഃ
മാതുർ ദാസ്യ വിമോക്ഷാർഥം ആഹരിഷ്യേ തം അദ്യ വൈ
8 മാത്രാ ചാസ്മി സമാദിഷ്ടോ നിഷാദാൻ ഭക്ഷയേതി വൈ
ന ച മേ തൃപ്തിർ അഭവദ് ഭക്ഷയിത്വാ സഹസ്രശഃ
9 തസ്മാദ് ഭോക്തവ്യം അപരം ഭഗവൻ പ്രദിശസ്വ മേ
യദ് ഭുക്ത്വാമൃതം ആഹർതും സമർഥഃ സ്യാം അഹം പ്രഭോ
10 [കഷ്യപ]
ആസീദ് വിഭാവസുർ നാമ മഹർഷിഃ കോപനോ ഭൃശം
ഭ്രാതാ തസ്യാനുജശ് ചാസീത് സുപ്രതീകോ മഹാതപാഃ
11 സ നേച്ഛതി ധനം ഭ്രാത്രാ സഹൈകസ്ഥം മഹാമുനിഃ
വിഭാഗം കീർതയത്യ് ഏവ സുപ്രതീകോ ഽഥ നിത്യശഃ
12 അഥാബ്രവീച് ച തം ഭ്രാതാ സുപ്രതീകം വിഭാവസുഃ
വിഭാഗം ബഹവോ മോഹാത് കർതും ഇച്ഛന്തി നിത്യദാ
തതോ വിഭക്താ അന്യോന്യം നാദ്രിയന്തേ ഽർഥമോഹിതാഃ
13 തതഃ സ്വാർഥപരാൻ മൂഢാൻ പൃഥഗ് ഭൂതാൻ സ്വകൈർ ധനൈഃ
വിദിത്വാ ഭേദയന്ത്യ് ഏതാൻ അമിത്രാ മിത്രരൂപിണഃ
14 വിദിത്വാ ചാപരേ ഭിന്നാൻ അന്തരേഷു പതന്ത്യ് അഥ
ഭിന്നാനാം അതുലോ നാശഃ ക്ഷിപ്രം ഏവ പ്രവർതതേ
15 തസ്മാച് ചൈവ വിഭാഗാർഥം ന പ്രശംസന്തി പണ്ഡിതാഃ
ഗുരു ശാസ്ത്രേ നിബദ്ധാനാം അന്യോന്യം അഭിശങ്കിനാം
16 നിയന്തും ന ഹി ശക്യസ് ത്വം ഭേദനോ ധനം ഇച്ഛസി
യസ്മാത് തസ്മാത് സുപ്രതീക ഹസ്തിത്വം സമവാപ്സ്യസി
17 ശപ്തസ് ത്വ് ഏവം സുപ്രതീകോ വിഭാവസും അഥാബ്രവീത്
ത്വം അപ്യ് അന്തർജലചരഃ കച്ഛപഃ സംഭവിഷ്യസി
18 ഏവം അന്യോന്യശാപാത് തൗ സുപ്രതീക വിഭാവസൂ
ഗജകച്ഛപതാം പ്രാപ്താവ് അർഥാർഥം മൂഢചേതസൗ
19 രോഷദോഷാനുഷംഗേണ തിര്യഗ്യോനിഗതാവ് അപി
പരസ്പരദ്വേഷരതൗ പ്രമാണ ബലദർപിതൗ
20 സരസ്യ് അസ്മിൻ മഹാകായൗ പൂർവവൈരാനുസാരിണൗ
തയോർ ഏകതരഃ ശ്രീമാൻ സമുപൈതി മഹാഗജഃ
21 തസ്യ ബൃംഹിത ശബ്ദേന കൂർമോ ഽപ്യ് അന്തർജലേ ശയഃ
ഉത്ഥിതോ ഽസൗ മഹാകായഃ കൃത്സ്നം സങ്ക്ഷോഭയൻ സരഃ
22 തം ദൃഷ്ട്വാവേഷ്ടിത കരഃ പതത്യ് ഏഷ ഗജോ ജലം
ദന്തഹസ്താഗ്ര ലാംഗൂലപാദവേഗേന വീര്യവാൻ
23 തം വിക്ഷോഭയമാണം തു സരോ ബഹു ഝഷാകുലം
കൂർമോ ഽപ്യ് അഭ്യുദ്യത ശിരാ യുദ്ധായാഭ്യേതി വീര്യവാൻ
24 ഷഡ് ഉച്ഛ്രിതോ യോജനാനി ഗജസ് തദ് ദ്വിഗുണായതഃ
കൂർമസ് ത്രിയോജനോത്സേധോ ദശയോജനമണ്ഡലഃ
25 താവ് ഏതൗ യുദ്ധസംമത്തൗ പരസ്പരജയൈഷിണൗ
ഉപയുജ്യാശു കർമേദം സാധയേപ്സിതം ആത്മനഃ
26 [സൂ]
സ തച് ഛ്രുത്വാ പിതുർ വാക്യം ഭീമവേഗോ ഽന്തരിക്ഷഗഃ
നഖേന ജഗം ഏകേന കൂർമം ഏകേന ചാക്ഷിപത്
27 സമുത്പപാത ചാകാശം തത ഉച്ചൈർ വിഹംഗമഃ
സോ ഽലംബ തീർഥം ആസാദ്യ ദേവ വൃക്ഷാൻ ഉപാഗമത്
28 തേ ഭീതാഃ സമകമ്പന്ത തസ്യ പക്ഷാനിലാഹതാഃ
ന നോ ഭഞ്ജ്യാദ് ഇതി തദാ ദിവ്യാഃ കനകശാഖിനഃ
29 പ്രചലാംഗാൻ സ താൻ ദൃഷ്ട്വാ മനോരഥഫലാങ്കുരാൻ
അന്യാൻ അതുലരൂപാംഗാൻ ഉപചക്രാമ ഖേചരഃ
30 കാഞ്ചനൈ രാജതൈശ് ചൈവ ഫലൈർ വൈഡൂര്യ ശാഖിനഃ
സാഗരാംബുപരിക്ഷിപ്താൻ ഭ്രാജമാനാൻ മഹാദ്രുമാൻ
31 തം ഉവാച ഖഗ ശ്രേഷ്ഠം തത്ര രോഹിണ പാദപഃ
അതിപ്രവൃദ്ധഃ സുമഹാൻ ആപതന്തം മനോജവം
32 യൈഷാ മമ മഹാശാഖാ ശതയോജനം ആയതാ
ഏതാം ആസ്ഥായ ശാഖാം ത്വം ഖാദേമൗ ഗജകച്ഛപൗ
33 തതോ ദ്രുമം പതഗസഹസ്രസേവിതം; മഹീധര പ്രതിമവപുഃ പ്രകമ്പയൻ
ഖഗോത്തമോ ദ്രുതം അഭിപത്യ വേഗവാൻ; ബഭഞ്ജ താം അവിരല പത്രസംവൃതാം