മഹാഭാരതം മൂലം/ആദിപർവം/അധ്യായം48

മഹാഭാരതം മൂലം/ആദിപർവം
രചന:വ്യാസൻ
അധ്യായം 48

1 [ഷ്]
     സർപസത്രേ തദാ രാജ്ഞഃ പാണ്ഡവേയസ്യ ധീമതഃ
     ജനമേജയസ്യ കേ ത്വ് ആസന്ന് ഋത്വിജഃ പരമർഷയഃ
2 കേ സദസ്യാ ബഭൂവുശ് ച സർപസത്രേ സുദാരുണേ
     വിഷാദജനനേ ഽത്യർഥം പന്നഗാനാം മഹാഭയേ
3 സർവം വിസ്തരതസ് താത ഭവാഞ് ശംസിതും അർഹതി
     സർപസത്ര വിധാനജ്ഞാ വിജ്ഞേയാസ് തേ ഹി സൂതജ
4 [സൂത]
     ഹന്ത തേ കഥയിഷ്യാമി നാമാനീഹ മനീഷിണാം
     യേ ഋത്വിജഃ സദസ്യാശ് ച തസ്യാസൻ നൃപതേസ് തദാ
5 തത്ര ഹോതാ ബഭൂവാഥ ബ്രാഹ്മണശ് ചണ്ഡഭാർഗവഃ
     ച്യവനസ്യാന്വയേ ജാതഃ ഖ്യാതോ വേദവിദാം വരഃ
6 ഉദ്ഗാതാ ബ്രാഹ്മണോ വൃദ്ധോ വിദ്വാൻ കൗത്സാര്യ ജൈമിനിഃ
     ബ്രഹ്മാഭവച് ഛാർമ്ഗ രവോ അധ്വര്യുർ ബോധ പിംഗലഃ
7 സദസ്യശ് ചാഭവദ് വ്യാസഃ പുത്ര ശിഷ്യസഹായവാൻ
     ഉദ്ദാലകഃ ശമഠകഃ ശ്വേതകേതുശ് ച പഞ്ചമഃ
8 അസിതോ ദേവലശ് ചൈവ നാരദഃ പർവതസ് തഥാ
     ആത്രേയഃ കുണ്ഡ ജഠരോ ദ്വിജഃ കുടി ഘടസ് തഥാ
9 വാത്സ്യഃ ശ്രുതശ്രവാ വൃദ്ധസ് തപഃസ്വാധ്യായശീലവാൻ
     കഹോഡോ ദേവ ശർമാ ച മൗദ്ഗല്യഃ ശമ സൗഭരഃ
10 ഏതേ ചാന്യേ ച ബഹവോ ബ്രാഹ്മണാഃ സംശിതവ്രതാഃ
    സദസ്യാ അഭവംസ് തത്ര സത്രേ പാരിക്ഷിതസ്യ ഹ
11 ജുഹ്വത്സ്വ് ഋത്വിക്ഷ്വ് അഥ തദാ സർപസത്രേ മഹാക്രതൗ
    അഹയഃ പ്രാപതംസ് തത്ര ഘോരാഃ പ്രാണിഭയാവഹാഃ
12 വസാ മേദോ വഹാഃ കുല്യാ നാഗാനാം സമ്പ്രവർതിതാഃ
    വവൗ ഗന്ധശ് ച തുമുലോ ദഹ്യതാം അനിശം തദാ
13 പതതാം ചൈവ നാഗാനാം ധിഷ്ഠിതാനാം തഥാംബരേ
    അശ്രൂയതാനിശം ശബ്ദഃ പച്യതാം ചാഗ്നിനാ ഭൃശം
14 തക്ഷകസ് തു സ നാഗേന്ദ്രഃ പുരന്ദര നിവേശനം
    ഗതഃ ശ്രുത്വൈവ രാജാനം ദീക്ഷിതം ജനമേജയം
15 തതഃ സർവം യഥാവൃത്തം ആഖ്യായ ഭുജഗോത്തമഃ
    അഗച്ഛച് ഛരണം ഭീത ആഗഃ കൃത്വാ പുരന്ദരം
16 തം ഇന്ദ്രഃ പ്രാഹ സുപ്രീതോ ന തവാസ്തീഹ തക്ഷക
    ഭയം നാഗേന്ദ്ര തസ്മാദ് വൈ സർപസത്രാത് കഥം ചന
17 പ്രസാദിതോ മയാ പൂർവം തവാർഥായ പിതാമഹഃ
    തസ്മാത് തവ ഭയം നാസ്തി വ്യേതു തേ മാനസോ ജ്വരഃ
18 ഏവം ആശ്വാസിതസ് തേന തതഃ സ ഭുജഗോത്തമഃ
    ഉവാസ ഭവനേ തത്ര ശക്രസ്യ മുദിതഃ സുഖീ
19 അജസ്രം നിപതത്സ്വ് അഗ്നൗ നാഗേഷു ഭൃശദുഃഖിതഃ
    അൽപശേഷ പരീവാരോ വാസുകിഃ പര്യതപ്യത
20 കശ്മലം ചാവിശദ് ഘോരം വാസുകിം പന്നഗേശ്വരം
    സ ഘൂർണമാന ഹൃദയോ ഭഗിനീം ഇദം അബ്രവീത്
21 ദഹ്യന്തേ ഽംഗാനി മേ ഭദ്രേ ദിശോ ന പ്രതിഭാന്തി ച
    സീദാമീവ ച സംമോഹാദ് ഘൂർണതീവ ച മേ മനഃ
22 ദൃഷ്ടിർ ഭ്രമതി മേ ഽതീവ ഹൃദയം ദീര്യതീവ ച
    പതിഷ്യാമ്യ് അവശോ ഽദ്യാഹം തസ്മിൻ ദീപ്തേ വിഭാവസൗ
23 പാരിക്ഷിതസ്യ യജ്ഞോ ഽസൗ വർതതേ ഽസ്മജ് ജിഘാംസയാ
    വ്യക്തം മയാപി ഗന്തവ്യം പിതൃരാജ നിവേശനം
24 അയം സ കാലഃ സമ്പ്രാപ്തോ യദർഥം അസി മേ സ്വസഃ
    ജരത്കാരോഃ പുരാ ദത്താ സാ ത്രാഹ്യ് അസ്മാൻ സബാന്ധവാൻ
25 ആസ്തീകഃ കില യജ്ഞം തം വർതന്തം ഭുജഗോത്തമേ
    പ്രതിഷേത്സ്യതി മാം പൂർവം സ്വയം ആഹ പിതാമഹഃ
26 തദ് വത്സേ ബ്രൂഹി വത്സം സ്വം കുമാരം വൃദ്ധസംമതം
    മമാദ്യ ത്വം സഭൃത്യസ്യ മോക്ഷാർഥം വേദ വിത്തമം