മഹാഭാരതം മൂലം/ഉദ്യോഗപർവം/അധ്യായം148

മഹാഭാരതം മൂലം/ഉദ്യോഗപർവം
രചന:വ്യാസൻ
അധ്യായം148

1 [വാസു]
     ഏവം ഉക്തേ തു ഭീഷ്മേണ ദ്രോണേന വിദുരേണ ച
     ഗാന്ധാര്യാ ധൃതരാഷ്ട്രേണ ന ച മന്ദോ ഽന്വബുധ്യത
2 അവധൂയോത്ഥിതഃ ക്രുദ്ധോ രോഷാത് സംരക്തലോചനഃ
     അന്വദ്രവന്ത തം പശ്ചാദ് രാജാനസ് ത്യക്തജീവിതാഃ
3 അജ്ഞാപയച് ച രാജ്ഞസ് താൻ പാർഥിവൻ ദുഷ്ടചേതസഃ
     പ്രയാധ്വം വൈ കുരുക്ഷേത്രം പുഷ്യോ ഽദ്യേതി പുനഃ പുനഃ
4 തതസ് തേ പൃഥിവീപാലാഃ പ്രയയുഃ സഹ സൈനികാഃ
     ഭീഷ്മം സേനാപതിം കൃത്വാ സംഹൃഷ്ടാഃ കാലചോദിതാഃ
5 അക്ഷൗഹിണ്യോ ദശൈകാ ച പാർഥിവാനാം സമാഗതാഃ
     താസാം പ്രമുഖതോ ഭീഷ്മസ് താലകേതുർ വ്യരോചത
     യദ് അത്ര യുക്തം പ്രാപ്തം ച തദ് വിധത്സ്വ വിശാം പതേ
6 ഉക്തം ഭീഷ്മേണ യദ് വാക്യം ദ്രോണേന വിദുരേണ ച
     ഗാന്ധാര്യാ ധൃതരാഷ്ട്രേണ സമക്ഷം മമ ഭാരത
     ഏതത് തേ കഥിതം രാജൻ യദ്വൃത്തം കുരുസംസദി
7 സാമ ദാദൗ പ്രയുക്തം മേ രാജൻ സൗഭ്രാത്രം ഇച്ഛതാ
     അഭേദാത് കുരുവംശസ്യ പ്രജാനാം ച വിവൃദ്ധയേ
8 പുനർ ഭേദശ് ച മേ യുക്തോ യദാ സാമ ന ഗൃഹ്യതേ
     കർമാനുകീർതനം ചൈവ ദേവ മാനുഷസംഹിതം
9 യദാ നാദ്രിയതേ വാക്യം സാമപൂർവം സുയോധനഃ
     തദാ മയാ സമാനീയ ഭേദിതാഃ സർവപാർഥിവാഃ
10 അദ്ഭുതാനി ച ഘോരാണി ദാരുണാനി ച ഭാരത
    അമാനുഷാണി കർമാണി ദർശിതാനി ച മേ വിഭോ
11 ഭർത്സയിത്വാ തു രാജ്ഞസ് താംസ് തൃണീ കൃത്യസുയോധനം
    രാധ്യേയം ഭീഷയിത്വാ ച സൗബലം ച പുനഃ പുനഃ
12 ന്യൂനതാം ധാർതരാഷ്ട്രാണാം നിന്ദാം ചൈവ പുനഃ പുനഃ
    ഭേദയിത്വാ നൃപാൻ സർവാൻ വാഗ്ഭിർ മന്ത്രേണ ചാസകൃത്
13 പുനഃ സാമാഭിസംയുക്തം സമ്പ്രദാനം അഥാബ്രുവം
    അഭേദാത് കുരുവംശസ്യ കാര്യയോഗാത് തഥൈവ ച
14 തേ ബാലാ ധൃതരാഷ്ട്രസ്യ ഭീഷ്മസ്യ വിദുരസ്യ ച
    തിഷ്ഠേയുഃ പാണ്ഡവാഃ സർവേ ഹിത്വാ മാനം അധശ് ചരാഃ
15 പ്രയച്ഛന്തു ച തേ രാജ്യം അനീശാസ് തേ ഭവന്തു ച
    യഥാഹ രാജാ ഗാംഗേയോ വിദുരശ് ച തഥാസ്തു തത്
16 സർവം ഭവതു തേ രാജ്യം പഞ്ച ഗ്രാമാൻ വിസർജയ
    അവശ്യം ഭരണീയാ ഹി പിതുസ് തേ രാജസത്തമ
17 ഏവം ഉക്തസ് തു ദുഷ്ടാത്മാ നൈവ ഭാവം വ്യമുഞ്ചത
    ദണ്ഡം ചതുർഥം പശ്യാമി തേഷു പാപേഷു നാന്യഥാ
18 നിര്യാതാശ് ച വിനാശായ കുരുക്ഷേത്രം നരാധിപാഃ
    ഏതത് തേ കഥിതം സർവം യദ്വൃത്തം കുരുസംസദി
19 ന തേ രാജ്യം പ്രയച്ഛന്തി വിനാ യുദ്ധേന പാണ്ഡവ
    വിനാശഹേതവഃ സർവേ പ്രത്യുപസ്ഥിത മൃത്യവഃ