മഹാഭാരതം മൂലം/വനപർവം/അധ്യായം251
| ←അധ്യായം250 | മഹാഭാരതം മൂലം/വനപർവം രചന: അധ്യായം251 |
അധ്യായം252→ |
1 [വൈ]
അഥാസീനേഷു സർവേഷു തേഷു രാജസു ഭാരത
കോടികാശ്യ വചോ ശ്രുത്വാ ശൈബ്യം സൗവീരകോ ഽബ്രവീത്
2 യദാ വാചം വ്യാഹരന്ത്യാം അസ്യാം മേ രമതേ മനഃ
സീമന്തിനീനാം മുഖ്യായാം വിനിവൃത്തഃ കഥം ഭവാൻ
3 ഏതാം ദൃഷ്ട്വാ സ്ത്രിയോ മേ ഽന്യാ യഥാ ശാഖാമൃഗസ്ത്രിയഃ
പ്രതിഭാന്തി മഹാബാഹോ സത്യം ഏതദ് ബ്രവീമി തേ
4 ദർശനാദ് ഏവ ഹി മനസ് തയാ മേ ഽപഹൃതം ഭൃശം
താം സമാചക്ഷ്വ കല്യാണീം യദി സ്യാച് ഛൈബ്യ മാനുഷീ
5 [കോടി]
ഏഷാ വൈ ദ്രൗപദീ കൃഷ്ണാ രാജപുത്രീ യശസ്വിനീ
പഞ്ചാനാം പാണ്ഡുപുത്രാണാം മഹിഷീ സംമതാ ഭൃശം
6 സർവേഷാം ചൈവ പാർഥാനാം പ്രിയാ ബഹുമതാ സതീ
തയാ സമേത്യ സൗവീര സുവീരാൻ സുസുഖീ വ്രജ
7 [വൈ]
ഏവം ഉക്തഃ പ്രത്യുവാച പശ്യാമോ ദ്രൗപദീം ഇതി
പതിഃ സൗവീരസിന്ധൂനാം ദുഷ്ടഭാവോ ജയദ്രഥഃ
8 സ പ്രവിശ്യാശ്രമം ശൂന്യം സിംഹഗോഷ്ഠം വൃകോ യഥാ
ആത്മനാ സപ്തമഃ കൃഷ്ണാം ഇദം വചനം അബ്രവീത്
9 കുശലം തേ വരാരോഹേ ഭർതാരസ് തേ ഽപ്യ് അനാമയാഃ
യേഷാം കുശലകാമാസി തേ ഽപി കച് ചിദ് അനാമയാഃ
10 [ദ്രൗ]
കൗരവ്യഃ കുശലീ രാജാ കുന്തീപുത്രോ യുധിഷ്ഠിരഃ
അഹം ച ഭ്രാതരശ് ചാസ്യ യാംശ് ചാന്യാൻ പരിപൃച്ഛസി
11 പാദ്യം പ്രതിഗൃഹാണേദം ആസനം ച നൃപാത്മജ
മൃഗാൻ പഞ്ചാശതം ചൈവ പ്രാതർ ആശം ദദാനി തേ
12 ഐണേയാൻ പൃഷതാൻ ന്യങ്കൂൻ ഹരിണാഞ് ശരഭാഞ് ശശാൻ
ഋശ്യാൻ രുരൂഞ് ശംബരാംശ് ച ഗവയാംശ് ച മൃഗാൻ ബഹൂൻ
13 വരാഹാൻ മഹിഷാംശ് ചൈവ യാശ് ചാന്യാ മൃഗജാതയഃ
പ്രദാസ്യതി സ്വയം തുഭ്യം കുന്തീപുത്രോ യുധിഷ്ഠിരഃ
14 [ജയദ്]
കുശലം പ്രാതർ ആശസ്യ സർവാ മേ ഽപചിതിഃ കൃതാ
ഏഹി മേ രഥം ആരോഹ സുഖം ആപ്നുഹി കേവലം
15 ഗതശ്രീകാംശ് ച്യുതാൻ രാജ്യാത് കൃപണാൻ ഗതചേതസഃ
അരണ്യവാസിനഃ പാർഥാൻ നാനുരോദ്ധും ത്വം അർഹസി
16 ന വൈ പ്രജ്ഞാ ഗതശ്രീകം ഭർതാരം ഉപയുഞ്ജതേ
യുഞ്ജാനം അനുയുഞ്ജീത ന ശ്രിയഃ സങ്ക്ഷയേ വസേത്
17 ശ്രിയാ വിഹീനാ രാജ്യാച് ച വിനഷ്ടാഃ ശാശ്വതീഃ സമാഃ
അലം തേ പാണ്ഡുപുത്രാണാം ഭക്ത്യാ ക്ലേശം ഉപാസിതും
18 ഭാര്യാ മേ ഭവ സുശ്രോണി ത്യജൈനാൻ സുഖം ആപ്നുഹി
അഖിലാൻ സിന്ധുസൗവീരാൻ അവാപ്നുഹി മയാ സഹ
19 [വൈ]
ഇത്യ് ഉക്താ സിന്ധുരാജേന വാക്യം ഹൃദയകമ്പനം
കൃഷ്ണാ തസ്മാദ് അപാക്രാമദ് ദേശാത് സഭ്രുകുടീ മുഖീ
20 അവമത്യാസ്യ തദ് വാക്യം ആക്ഷിപ്യ ച സുമധ്യമാ
മൈവം ഇത്യ് അബ്രവീത് കൃഷ്ണാ ലജ്ജസ്വേതി ച സൈന്ധവം
21 സാ കാങ്ക്ഷമാണാ ഭർതൄണാം ഉപയാനം അനിന്ദിതാ
വിലോഭയാം ആസ പരം വാക്യൈർ വാക്യാനി യുഞ്ജതീ