മഹാഭാരതം മൂലം/വിരാടപർവം/അധ്യായം3
| ←അധ്യായം2 | മഹാഭാരതം മൂലം/വിരാടപർവം രചന: അധ്യായം3 |
അധ്യായം4→ |
1 [വൈ]
കിം ത്വം നകുല കുർവാണസ് തത്ര താത ചരിഷ്യസി
സുകുമാരശ് ച ശൂരശ് ച ദർശനീയഃ സുഖോചിതഃ
2 അശ്വബന്ധോ ഭവിഷ്യാമി വിരാട നൃപതേർ അഹം
ഗ്രന്ഥികോ നാമ നാമ്നാഹം കർമൈതത് സുപ്രിയം മമ
3 കുശലോ ഽസ്മ്യ് അശ്വശിക്ഷായാം തഥൈവാശ്വചികിത്സിതേ
പ്രിയാശ് ച സതതം മേ ഽശ്വാഃ കുരുരാജ യഥാ തവ
4 യേ മാം ആമന്ത്രയിഷ്യന്തി വിരാടനഗരേ ജനാഃ
തേഭ്യ ഏവം പ്രവക്ഷ്യാമി വിഹരിഷ്യാമ്യ് അഹം യഥാ
5 സഹദേവ കഥം തസ്യ സമീപേ വിഹരിഷ്യസി
കിം വാ ത്വം താത കുർവാണഃ പ്രച്ഛന്നോ വിചരിഷ്യസി
6 ഗോസംഖ്യാതാ ഭവിഷ്യാമി വിരാടസ്യ മഹീപതേഃ
പ്രതിഷേദ്ധാ ച ദോഗ്ധാ ച സംഖ്യാനേ കുശലോ ഗവാം
7 തന്തിപാല ഇതി ഖ്യാതോ നാമ്നാ വിദിതം അസ്തു തേ
നിപുണം ച ചരിഷ്യാമി വ്യേതു തേ മാനസോ ജ്വരഃ
8 അഹം ഹി ഭവതാ ഗോഷു സതതം പ്രകൃതഃ പുരാ
തത്ര മേ കൗശലം കർമ അവബുദ്ധം വിശാം പതേ
9 ലക്ഷണം ചരിതം ചാപി ഗവാം യച് ചാപി മംഗലം
തത് സർവം മേ സുവിദിതം അന്യച് ചാപി മഹീപതേ
10 വൃഷഭാൻ അപി ജാനാമി രാജൻ പൂജിത ലക്ഷണാൻ
യേഷാം മൂത്രം ഉപാഘ്രായ അപി വന്ധ്യാ പ്രസൂയതേ
11 സോ ഽഹം ഏവം ചരിഷ്യാമി പ്രീതിർ അത്ര ഹി മേ സദാ
ന ച മാം വേത്സ്യതി പരസ് തത് തേ രോചതു പാർഥിവ
12 ഇയം തു നഃ പ്രിയാ ഭാര്യാ പ്രാണേഭ്യോ ഽപി ഗരീയസീ
മാതേവ പരിപാല്യാ ച പൂജ്യാ ജ്യേഷ്ഠേവ ച സ്വസാ
13 കേന സ്മ കർമണാ കൃഷ്ണാ ദ്രൗപദീ വിചരിഷ്യതി
ന ഹി കിം ചിദ് വിജാനാതി കർമ കർതും യഥാ സ്ത്രിയഃ
14 സുകുമാരീ ച ബാലാ ച രാജപുത്രീ യശസ്വിനീ
പതിവ്രതാ മഹാഭാഗാ കഥം നു വിചരിഷ്യതി
15 മാല്യഗന്ധാൻ അലങ്കാരാൻ വസ്ത്രാണി വിവിധാനി ച
ഏതാന്യ് ഏവാഭിജാനാതി യതോ ജാതാ ഹി ഭാമിനീ
16 സൈരന്ധ്ര്യോ ഽരക്ഷിതാ ലോകേ ഭുജിഷ്യാഃ സന്തി ഭാരത
നൈവം അന്യാഃ സ്ത്രിയോ യാന്തി ഇതി ലോകസ്യ നിശ്ചയഃ
17 സാഹം ബ്രുവാണാ സൈരന്ധ്രീ കുശലാ കേശകർമണി
ആത്മഗുപ്താ ചരിഷ്യാമി യൻ മാം ത്വം അനുപൃച്ഛസി
18 സുദേഷ്ണാം പ്രത്യുപസ്ഥാസ്യേ രാജഭാര്യാം യശസ്വിനീം
സാ രക്ഷിഷ്യതി മാം പ്രാപ്താം മാ തേ ഭൂദ് ദുഃഖം ഈദൃശം
19 [യ്]
കല്യാണം ഭാഷസേ കൃഷ്ണേ കുലേ ജാതാ യഥാ വദേത്
ന പാപം അഭിജാനാസി സാധു സാധ്വീ വ്രതേ സ്ഥിതാ