മഹാഭാരതം മൂലം/സഭാപർവം/അധ്യായം59
| ←അധ്യായം58 | മഹാഭാരതം മൂലം/സഭാപർവം രചന: അധ്യായം59 |
അധ്യായം60→ |
1 [ദൂഋ]
ഏഹി ക്ഷത്തർ ദ്രൗപദീം ആനയസ്വ; പ്രിയാം ഭാര്യാം സംമതാം പാണ്ഡവാനാം
സംമാർജതാം വേശ്മ പരൈതു ശീഘ്രം; ആനന്ദോ നഃ സഹ ദാസീഭിർ അസ്തു
2 [വ്]
ദുർവിഭാവ്യം ഭവതി ത്വാദൃശേന; ന മന്ദസംബുധ്യസി പാശബദ്ധഃ
പ്രപാതേ ത്വം ലംബമാനോ ന വേത്സി; വ്യാഘ്രാൻ മൃഗഃ കോപയസേ ഽതിബാല്യാത്
3 ആശീവിഷാഃ ശിരസി തേ പൂർണകോശാ മഹാവിഷാഃ
മാ കോപിഷ്ഠാഃ സുമന്ദാത്മൻ മാ ഗമസ് ത്വം യമക്ഷയം
4 ന ഹി ദാസീത്വം ആപന്നാ കൃഷ്ണാ ഭവതി ഭാരത
അനീശേന ഹി രാജ്ഞൈഷാ പണേ ന്യസ്തേതി മേ മതിഃ
5 അയം ധത്തേ വേണുർ ഇവാത്മഘാതീ; ഫലം രാജാ ധൃതരാഷ്ട്രസ്യ പുത്രഃ
ദ്യൂതം ഹി വൈരായ മഹാഭയായ; പക്വോ ന ബുധ്യത്യ് അയം അന്തകാലേ
6 നാരും തുദഃ സ്യാൻ ന നൃശംസവാദീ; ന ഹീനതഃ പരം അഭ്യാദദീത
യയാസ്യ വാചാ പര ഉദ്വിജേത; ന താം വദേദ് രുശതീം പാപലോക്യാം
7 സമുച്ചരന്ത്യ് അതിവാദാ ഹി വക്ത്രാദ്; യൈർ ആഹതഃ ശോചതി രാത്ര്യഹാനി
പരസ്യ നാമർമസു തേ പതന്തി; താൻ പണ്ഡിതോ നാവസൃജേത് പരേഷാം
8 അജോ ഹി ശസ്ത്രം അഖനത് കിലൈകഃ; ശസ്ത്രേ വിപന്നേ പദ്ഭിർ അപാസ്യ ഭൂമിം
നികൃന്തനം സ്വസ്യ കണ്ഠസ്യ ഘോരം; തദ്വദ് വൈരം മാ ഖനീഃ പാണ്ഡുപുത്രൈഃ
9 ന കിം ചിദ് ഈഡ്യം പ്രവദന്തി പാപം; വനേചരം വാ ഗൃഹമേധിനം വാ
തപസ്വിനം സമ്പരിപൂർണ വിദ്യം; ഭഷന്തി ഹൈവം ശ്വനരാഃ സദൈവ
10 ദ്വാരം സുഘോരം നരകസ്യ ജിഹ്മം; ന ബുധ്യസേ ധൃതരാഷ്ട്രസ്യ പുത്ര
ത്വാം അന്വേതാരോ ബഹവഃ കുരൂണാം; ദ്യൂതോദയേ സഹ ദുഃശാസനേന
11 മജ്ജന്ത്യ് അലാബൂനി ശിലാഃ പ്ലവന്തേ; മുഹ്യന്തി നാവോ ഽംഭസി ശശ്വദ് ഏവ
മൂഢോ രാജാ ധൃതരാഷ്ട്രസ്യ പുത്രോ; ന മേ വാചഃ പഥ്യരൂപാഃ ശൃണോതി
12 അന്തോ നൂനം ഭവിതായം കുരൂണാം; സുദാരുണഃ സർവഹരോ വിനാശഃ
വാചഃ കാവ്യാഃ സുഹൃദാം പഥ്യരൂപാ; ന ശ്രൂയന്തേ വർധതേ ലോഭ ഏവ