ശ്രീമദ് ഭാഗവതം (മൂലം) / ഏകാദശഃ സ്കന്ധഃ (സ്കന്ധം 11) / അദ്ധ്യായം 27

← സ്കന്ധം 11 : അദ്ധ്യായം 26

സ്കന്ധം 11 : അദ്ധ്യായം 28 →

ശ്രീമദ് ഭാഗവതം (മൂലം) / ഏകാദശഃ സ്കന്ധഃ (സ്കന്ധം 11) / അദ്ധ്യായം 27

ഉദ്ധവ ഉവാച

ക്രിയായോഗം സമാചക്ഷ്വ ഭവദാരാധനം പ്രഭോ ।
യസ്മാത്ത്വാം യേ യഥാർച്ചന്തി സാത്വതാഃ സാത്വതർഷഭ ॥ 1 ॥

ഏതദ്വദന്തി മുനയോ മുഹുർന്നിശ്രേയസം നൃണാം ।
നാരദോ ഭഗവാൻ വ്യാസ ആചാര്യോഽങ്ഗിരസഃ സുതഃ ॥ 2 ॥

നിഃസൃതം തേ മുഖാംഭോജാദ്യദാഹ ഭഗവാനജഃ ।
പുത്രേഭ്യോ ഭൃഗുമുഖ്യേഭ്യോ ദേവ്യൈ ച ഭഗവാൻ ഭവഃ ॥ 3 ॥

ഏതദ്വൈ സർവ്വവർണാനാമാശ്രമാണാം ച സമ്മതം ।
ശ്രേയസാമുത്തമം മന്യേ സ്ത്രീശൂദ്രാണാം ച മാനദ ॥ 4 ॥

ഏതത്കമലപത്രാക്ഷ കർമ്മബന്ധവിമോചനം ।
ഭക്തായ ചാനുരക്തായ ബ്രൂഹി വിശ്വേശ്വരേശ്വര ॥ 5 ॥

ശ്രീഭഗവാനുവാച

ന ഹ്യന്തോഽനന്തപാരസ്യ കർമ്മകാണ്ഡസ്യ ചോദ്ധവ ।
സങ്ക്ഷിപ്തം വർണയിഷ്യാമി യഥാവദനുപൂർവ്വശഃ ॥ 6 ॥

വൈദികസ്താന്ത്രികോ മിശ്ര ഇതി മേ ത്രിവിധോ മഖഃ ।
ത്രയാണാമീപ്സിതേനൈവ വിധിനാ മാം സമർച്ചയേത് ॥ 7 ॥

യദാ സ്വനിഗമേനോക്തം ദ്വിജത്വം പ്രാപ്യ പൂരുഷഃ ।
യഥാ യജേത മാം ഭക്ത്യാ ശ്രദ്ധയാ തന്നിബോധ മേ ॥ 8 ॥

അർച്ചായാം സ്ഥണ്ഡിലേഽഗ്നൌ വാ സൂര്യേ വാപ്സു ഹൃദി ദ്വിജേ ।
ദ്രവ്യേണ ഭക്തിയുക്തോഽർച്ചേത് സ്വഗുരും മാമമായയാ ॥ 9 ॥

പൂർവ്വം സ്നാനം പ്രകുർവ്വീത ധൌതദന്തോഽങ്ഗശുദ്ധയേ ।
ഉഭയൈരപി ച സ്നാനം മന്ത്രൈർമ്മൃദ്ഗ്രഹണാദിനാ ॥ 10 ॥

സന്ധ്യോപാസ്ത്യാദി കർമ്മാണി വേദേനാചോദിതാനി മേ ।
പൂജാം തൈഃ കൽപയേത് സമ്യക് സങ്കൽപഃ കർമ്മപാവനീം ॥ 11 ॥

ശൈലീ ദാരുമയീ ലൌഹീ ലേപ്യാ ലേഖ്യാ ച സൈകതീ ।
മനോമയീ മണിമയീ പ്രതിമാഷ്ടവിധാ സ്മൃതാ ॥ 12 ॥

ചലാചലേതി ദ്വിവിധാ പ്രതിഷ്ഠാ ജീവമന്ദിരം ।
ഉദ്വാസാവാഹനേ ന സ്തഃ സ്ഥിരായാമുദ്ധവാർച്ചനേ ॥ 13 ॥

അസ്ഥിരായാം വികൽപഃ സ്യാത് സ്ഥണ്ഡിലേ തു ഭവേദ് ദ്വയം ।
സ്നപനം ത്വവിലേപ്യായാമന്യത്ര പരിമാർജ്ജനം ॥ 14 ॥

ദ്രവ്യൈഃ പ്രസിദ്ധൈർമ്മദ് യാഗഃ പ്രതിമാദിഷ്വമായിനഃ ।
ഭക്തസ്യ ച യഥാ ലബ്ധൈർഹൃദി ഭാവേന ചൈവ ഹി ॥ 15 ॥

സ്നാനാലങ്കരണം പ്രേഷ്ഠമർച്ചയാമേവ തൂദ്ധവ ।
സ്ഥണ്ഡിലേ തത്ത്വവിന്യാസോ വഹ്നാവാജ്യപ്ലുതം ഹവിഃ ॥ 16 ॥

സൂര്യേ ചാഭ്യർഹണം പ്രേഷ്ഠം സലിലേ സലിലാദിഭിഃ ।
ശ്രദ്ധയോപാഹൃതം പ്രേഷ്ഠം ഭക്തേന മമ വാര്യപി ॥ 17 ॥

ഭൂര്യപ്യഭക്തോപാഹൃതം ന മേ തോഷായ കൽപതേ ।
ഗന്ധോ ധൂപഃ സുമനസോ ദീപോഽന്നാദ്യം ച കിം പുനഃ ॥ 18 ॥

ശുചിഃ സംഭൃതസംഭാരഃ പ്രാഗ് ദർഭൈഃ കൽപിതാസനഃ ।
ആസീനഃ പ്രാഗുദഗ്വാർച്ചേദർച്ചായാമഥ സമ്മുഖഃ ॥ 19 ॥

കൃതന്യാസഃ കൃതന്യാസാം മദർച്ചാം പാണിനാ മൃജേത് ।
കലശം പ്രോക്ഷണീയം ച യഥാവദുപസാധയേത് ॥ 20 ॥

തദദ്ഭിർദ്ദേവയജനം ദ്രവ്യാണ്യാത്മാനമേവ ച ।
പ്രോക്ഷ്യ പാത്രാണി ത്രീണ്യദ്ഭിസ്തൈസ്തൈർദ്രവ്യൈശ്ച സാധയേത് ॥ 21 ॥

പാദ്യാർഘ്യാചമനീയാർത്ഥം ത്രീണി പാത്രാണി ദൈശികഃ ।
ഹൃദാ ശീർഷ്ണാഥ ശിഖയാ ഗായത്ര്യാ ചാഭിമന്ത്രയേത് ॥ 22 ॥

പിണ്ഡേ വായ്വഗ്നിസംശുദ്ധേ ഹൃത്പദ്മസ്ഥാം പരാം മമ ।
അണ്വീം ജീവകലാം ധ്യായേന്നാദാന്തേ സിദ്ധഭാവിതാം ॥ 23 ॥

തയാഽഽത്മഭൂതയാ പിണ്ഡേ വ്യാപ്തേ സമ്പൂജ്യ തൻമയഃ ।
ആവാഹ്യാർച്ചാദിഷു സ്ഥാപ്യ ന്യസ്താങ്ഗം മാം പ്രപൂജയേത് ॥ 24 ॥

പാദ്യോപസ്പർശാർഹണാദീനുപചാരാൻ പ്രകൽപയേത് ।
ധർമ്മാദിഭിശ്ച നവഭിഃ കൽപയിത്വാഽഽസനം മമ ॥ 25 ॥

പദ്മമഷ്ടദലം തത്ര കർണ്ണികാകേസരോജ്ജ്വലം ।
ഉഭാഭ്യാം വേദതന്ത്രാഭ്യാം മഹ്യം തൂഭയസിദ്ധയേ ॥ 26 ॥

സുദർശനം പാഞ്ചജന്യം ഗദാസീഷുധനുർഹലാൻ ।
മുസലം കൌസ്തുഭം മാലാം ശ്രീവത്സം ചാനുപൂജയേത് ॥ 27 ॥

നന്ദം സുനന്ദം ഗരുഡം പ്രചണ്ഡം ചണ്ഡമേവ ച ।
മഹാബലം ബലം ചൈവ കുമുദം കമുദേക്ഷണം ॥ 28 ॥

ദുർഗ്ഗാം വിനായകം വ്യാസം വിഷ്വക്സേനം ഗുരൂൻ സുരാൻ ।
സ്വേ സ്വേ സ്ഥാനേ ത്വഭിമുഖാൻ പൂജയേത്പ്രോക്ഷണാദിഭിഃ ॥ 29 ॥

ചന്ദനോശീരകർപ്പൂരകുങ്കുമാഗുരുവാസിതൈഃ ।
സലിലൈഃ സ്നാപയേൻമന്ത്രൈർന്നിത്യദാ വിഭവേ സതി ॥ 30 ॥

സ്വർണ്ണഘർമ്മാനുവാകേന മഹാപുരുഷവിദ്യയാ ।
പൌരുഷേണാപി സൂക്തേന സാമഭീ രാജനാദിഭിഃ ॥ 31 ॥

വസ്ത്രോപവീതാഭരണപത്രസ്രഗ്ഗന്ധലേപനൈഃ ।
അലങ്കുർവ്വീത സപ്രേമ മദ്ഭക്തോ മാം യഥോചിതം ॥ 32 ॥

പാദ്യമാചമനീയം ച ഗന്ധം സുമനസോഽക്ഷതാൻ ।
ധൂപദീപോപഹാര്യാണി ദദ്യാൻമേ ശ്രദ്ധയാർച്ചകഃ ॥ 33 ॥

ഗുഡപായസസർപ്പീംഷി ശഷ്കുല്യാപൂപമോദകാൻ ।
സംയാവദധിസൂപാംശ്ച നൈവേദ്യം സതി കൽപയേത് ॥ 34 ॥

അഭ്യംഗോൻമർദ്ദനാദർശദന്തധാവാഭിഷേചനം ।
അന്നാദ്യഗീതനൃത്യാദി പർവ്വണി സ്യുരുതാന്വഹം ॥ 35 ॥

വിധിനാ വിഹിതേ കുണ്ഡേ മേഖലാഗർത്തവേദിഭിഃ ।
അഗ്നിമാധായ പരിതഃ സമൂഹേത്പാണിനോദിതം ॥ 36 ॥

പരിസ്തീര്യാഥ പര്യുക്ഷേദന്വാധായ യഥാവിധി ।
പ്രോക്ഷണ്യാസാദ്യ ദ്രവ്യാണി പ്രോക്ഷ്യാഗ്നൌ ഭാവയേത മാം ॥ 37 ॥

തപ്തജാംബൂനദപ്രഖ്യം ശങ്ഖചക്രഗദാംബുജൈഃ ।
ലസച്ചതുർഭുജം ശാന്തം പദ്മകിഞ്ജൽകവാസസം ॥ 38 ॥

സ്ഫുരത്കിരീടകടകകടിസൂത്രവരാംഗദം ।
ശ്രീവത്സവക്ഷസം ഭ്രാജത്കൌസ്തുഭം വനമാലിനം ॥ 39 ॥

ധ്യായന്നഭ്യർച്ച്യ ദാരൂണി ഹവിഷാഭിഘൃതാനി ച ।
പ്രാസ്യാജ്യഭാഗാവാഘാരൌ ദത്ത്വാ ചാജ്യപ്ലുതം ഹവിഃ ॥ 40 ॥

ജുഹുയാൻമൂലമന്ത്രേണ ഷോഡശർച്ചാവദാനതഃ ।
ധർമ്മാദിഭ്യോ യഥാ ന്യായം മന്ത്രൈഃ സ്വിഷ്ടികൃതം ബുധഃ ॥ 41 ॥

അഭ്യർച്ച്യാഥ നമസ്കൃത്യ പാർഷദേഭ്യോ ബലിം ഹരേത് ।
മൂലമന്ത്രം ജപേദ്ബ്രഹ്മ സ്മരൻ നാരായണാത്മകം ॥ 42 ॥

ദത്ത്വാചമനമുച്ഛേഷം വിഷ്വക്സേനായ കൽപയേത് ।
മുഖവാസം സുരഭിമത്താംബൂലാദ്യമഥാർഹയേത് ॥ 43 ॥

ഉപഗായൻ ഗൃണൻ നൃത്യൻ കർമ്മാണ്യഭിനയൻ മമ ।
മത്കഥാഃ ശ്രാവയൻ ശൃണ്വൻ മുഹൂർത്തം ക്ഷണികോ ഭവേത് ॥ 44 ॥

സ്തവൈരുച്ചാവചൈഃ സ്തോത്രൈഃ പൌരാണൈഃ പ്രാകൃതൈരപി ।
സ്തുത്വാ പ്രസീദ ഭഗവന്നിതി വന്ദേത ദണ്ഡവത് ॥ 45 ॥

ശിരോ മത്പാദയോഃ കൃത്വാ ബാഹുഭ്യാം ച പരസ്പരം ।
പ്രപന്നം പാഹി മാമീശ ഭീതം മൃത്യുഗ്രഹാർണ്ണവാത് ॥ 46 ॥

ഇതി ശേഷാം മയാ ദത്താം ശിരസ്യാധായ സാദരം ।
ഉദ്വാസയേച്ചേദുദ്വാസ്യം ജ്യോതിർജ്യോതിഷി തത്പുനഃ ॥ 47 ॥

അർച്ചാദിഷു യദാ യത്ര ശ്രദ്ധാ മാം തത്ര ചാർച്ചയേത് ।
സർവ്വഭൂതേഷ്വാത്മനി ച സർവ്വാത്മാഹമവസ്ഥിതഃ ॥ 48 ॥

ഏവം ക്രിയായോഗപഥൈഃ പുമാൻ വൈദികതാന്ത്രികൈഃ ।
അർച്ചന്നുഭയതഃ സിദ്ധിം മത്തോ വിന്ദത്യഭീപ്സിതാം ॥ 49 ॥

മദർച്ചാം സംപ്രതിഷ്ഠാപ്യ മന്ദിരം കാരയേദ് ദൃഢം ।
പുഷ്പോദ്യാനാനി രമ്യാണി പൂജായാത്രോത്സവാശ്രിതാൻ ॥ 50 ॥

പൂജാദീനാം പ്രവാഹാർത്ഥം മഹാപർവ്വസ്വഥാന്വഹം ।
ക്ഷേത്രാപണപുരഗ്രാമാൻ ദത്ത്വാ മത്സാർഷ്ടിതാമിയാത് ॥ 51 ॥

പ്രതിഷ്ഠയാ സാർവ്വഭൌമം സദ്മനാ ഭുവനത്രയം ।
പൂജാദിനാ ബ്രഹ്മലോകം ത്രിഭിർമ്മത്സാംയതാമിയാത് ॥ 52 ॥

മാമേവ നൈരപേക്ഷ്യേണ ഭക്തിയോഗേന വിന്ദതി ।
ഭക്തിയോഗം സ ലഭത ഏവം യഃ പൂജയേത മാം ॥ 53 ॥

യഃ സ്വദത്താം പരൈർദ്ദത്താം ഹരേത സുരവിപ്രയോഃ ।
വൃത്തിം സ ജായതേ വിഡ് ഭുഗ് വർഷാണാമയുതായുതം ॥ 54 ॥

കർത്തുശ്ച സാരഥേർഹേതോരനുമോദിതുരേവ ച ।
കർമ്മണാം ഭാഗിനഃ പ്രേത്യ ഭൂയോ ഭൂയസി തത്ഫലം ॥ 55 ॥