ശ്രീമദ് ഭാഗവതം (മൂലം) / നവമഃ സ്കന്ധഃ (സ്കന്ധം 9) / അദ്ധ്യായം 17

← സ്കന്ധം 9 : അദ്ധ്യായം 16

സ്കന്ധം 9 : അദ്ധ്യായം 18 →

ശ്രീമദ് ഭാഗവതം (മൂലം) / നവമഃ സ്കന്ധഃ (സ്കന്ധം 9) / അദ്ധ്യായം 17

ശ്രീശുക ഉവാച

യഃ പുരൂരവസഃ പുത്ര ആയുസ്തസ്യാഭവൻ സുതാഃ ।
നഹുഷഃ ക്ഷത്രവൃദ്ധശ്ച രജീ രംഭശ്ച വീര്യവാൻ ॥ 1 ॥

അനേനാ ഇതി രാജേന്ദ്ര ശൃണു ക്ഷത്രവൃധോഽന്വയം ।
ക്ഷത്രവൃദ്ധസുതസ്യാസൻ സുഹോത്രസ്യാത്മജാസ്ത്രയഃ ॥ 2 ॥

കാശ്യഃ കുശോ ഗൃത്സമദ ഇതി ഗൃത്സമദാദഭൂത് ।
ശുനകഃ ശൌനകോ യസ്യ ബഹ്വൃചപ്രവരോ മുനിഃ ॥ 3 ॥

കാശ്യസ്യ കാശിസ്തത്പുത്രോ രാഷ്ട്രോ ദീർഘതമഃപിതാ ।
ധന്വന്തരിർദ്ദൈർഘ(തമ ആയുർവ്വേദപ്രവർത്തകഃ ॥ 4 ॥

യജ്ഞഭുഗ് വാസുദേവാംശഃ സ്മൃതമാത്രാർത്തിനാശനഃ ।
തത്പുത്രഃ കേതുമാനസ്യ ജജ്ഞേ ഭീമരഥസ്തതഃ ॥ 5 ॥

ദിവോദാസോ ദ്യുമാംസ്തസ്മാത്പ്രതർദ്ദന ഇതി സ്മൃതഃ ।
സ ഏവ ശത്രുജിദ് വത്സ ഋതധ്വജ ഇതീരിതഃ ।
തഥാ കുവലയാശ്വേതി പ്രോക്തോഽലർക്കാദയസ്തതഃ ॥ 6 ॥

ഷഷ്ടിവർഷസഹസ്രാണി ഷഷ്ടിവർഷശതാനി ച ।
നാളർക്കദപരോ രാജൻ മേദിനീം ബുഭുജേ യുവാ ॥ 7 ॥

അളർക്കാത് സന്തതിസ്തസ്മാത് സുനീഥോഽഥ സുകേതനഃ ।
ധർമ്മകേതുഃ സുതസ്തസ്മാത് സത്യകേതുരജായത ॥ 8 ॥

ധൃഷ്ടകേതുഃ സുതസ്തസ്മാത് സുകുമാരഃ ക്ഷിതീശ്വരഃ ।
വീതിഹോത്രസ്യ ഭർഗ്ഗോഽതോ ഭാർഗ്ഗഭൂമിരഭൂന്നൃപഃ ॥ 9 ॥

ഇതീമേ കാശയോ ഭൂപാഃ ക്ഷത്രവൃദ്ധാന്വയായിനഃ ।
രംഭസ്യ രഭസഃ പുത്രോ ഗംഭീരശ്ചാക്രിയസ്തതഃ ॥ 10 ॥

തസ്യ ക്ഷേത്രേ ബ്രഹ്മ ജജ്ഞേ ശൃണു വംശമനേനസഃ ।
ശുദ്ധസ്തതഃ ശുചിസ്തസ്മാത്ത്രികകുദ്ധർമ്മസാരഥിഃ ॥ 11 ॥

തതഃ ശാന്തരയോ ജജ്ഞേ കൃതകൃത്യഃ സ ആത്മവാൻ ।
രജേഃ പഞ്ചശതാന്യാസൻ പുത്രാണാമമിതൌജസാം ॥ 12 ॥

ദേവൈരഭ്യർത്ഥിതോ ദൈത്യാൻ ഹത്വേന്ദ്രായാദദാദ് ദിവം ।
ഇന്ദ്രസ്തസ്മൈ പുനർദ്ദത്ത്വാ ഗൃഹീത്വാ ചരണൌ രജേഃ ॥ 13 ॥

ആത്മാനമർപ്പയാമാസ പ്രഹ്ളാദാദ്യരിശങ്കിതഃ ।
പിതര്യുപരതേ പുത്രാ യാചമാനായ നോ ദദുഃ ॥ 14 ॥

ത്രിവിഷ്ടപം മഹേന്ദ്രായ യജ്ഞഭാഗാൻ സമാദദുഃ ।
ഗുരുണാ ഹൂയമാനേഽഗ്നൌ ബലഭിത്തനയാൻ രജേഃ ॥ 15 ॥

അവധീദ്ഭ്രംശിതാൻ മാർഗ്ഗാന്ന കശ്ചിദവശേഷിതഃ ।
കുശാത്പ്രതിഃ ക്ഷാത്രവൃദ്ധാത് സഞ്ജയസ്തത്സുതോ ജയഃ ॥ 16 ॥

തതഃ കൃതഃ കൃതസ്യാപി ജജ്ഞേ ഹര്യവനോ നൃപഃ ।
സഹദേവസ്തതോ ഹീനോ ജയസേനസ്തു തത്സുതഃ ॥ 17 ॥

സങ്കൃതിസ്തസ്യ ച ജയഃ ക്ഷത്രധർമ്മാ മഹാരഥഃ ।
ക്ഷത്രവൃദ്ധാന്വയാ ഭൂപാ ശൃണു വംശം ച നാഹുഷാത് ॥ 18 ॥