കാർത്തവീര്യാർജ്ജുനവിജയം
(കാർത്തവീര്യാർജുനവിജയം എന്ന താളിൽ നിന്നും തിരിച്ചുവിട്ടതു പ്രകാരം)
| കാർത്തവീര്യാർജുനവിജയം (തുള്ളൽ കഥ) രചന: |
[ 1 ]
- അക്കാലങ്ങളിലതിഭുജവിക്രമ-
- ധിക്കൃതശക്രപരാക്രമനാകിയ
- നക്തഞ്ചരപതി രാവണനെന്നൊരു
- ശക്തൻ വന്നു പിറന്നു ധരായാം;
- പത്തു മുഖങ്ങളുമിരുപതു കൈകളു-
- മത്യുന്നതഗിരി സന്നിഭമാകിയ
- ഗാത്രവുമുരുതരഭീഷണമിരുപതു-
- നേത്രവുമുൽക്കടദംഷ്ട്രാനികരം
- എത്ര ഭയങ്കരമാകൃതി കണ്ടാൽ
- മിത്രതനൂജനുമാശു ഭയപ്പെടു-
- മത്ര മഹാബലനാകിയ ദശമുഖ-
- നത്തൽ വെടിഞ്ഞു തപംചെയ്തുടനെ
- പങ്കജഭവനൊടു വരവും വാങ്ങി-
- ക്കിങ്കരസംഘസമേതം വിരവൊടു
- ലങ്കാനഗരമടക്കിവസിച്ചഥ
- ശങ്കാരഹിതം ധനപതിതന്നുടെ
- ഹുങ്കാരത്തെയടക്കിജയിച്ചൊര-
- ഹങ്കാരങ്ങൾ നിലയ്ക്കാഞ്ഞമ്പൊടു
- ശങ്കരഭഗവാൻ വാണരുളുന്ന ഭ-
- യങ്കരമാകിയ കൈലാസത്തെ-
- ക്കുത്തിയെടുത്തു കരങ്ങളിലാക്കി-
- സ്സത്വരമമ്മാനക്കളിയാടി
- പത്തിരുപതുകുറി പൊക്കിയെറിഞ്ഞും
- ശക്തിപെരുത്ത കരങ്ങളിലേറ്റും,
- മുപ്പുരവൈരിക്കതുകൊണ്ടവനൊടൊ-
- രപ്രിയമുണ്ടായില്ല വിശേഷി-
- ച്ചദ്ഭുതമായൊരു വാളും നല്കി
- ക്ഷിപ്രമനുഗ്രഹമേകിയയച്ചു,
- പുഷ്പകമായ വിമാനവുമേറി
- പുഷ്പശരാരിയെ വന്ദിച്ചുടനേ.
- ഭൂതലവും പാതാളം സ്വർഗ്ഗം
- വീതഭയേന ജയിച്ചു ദശാസ്യൻ [ 2 ]
- സമരാങ്കണമതിലമരാധിപനുടെ
- സമരാടോപവുമാശു ശമിപ്പി-
- ച്ചമരാംഗനമാരേക്കൊണ്ടഥ വെൺ-
- ചാമരവ്യജനം വീശിപ്പിച്ചു;
- നന്ദനവിപിനേ കല്പദ്രുമ ഹരി-
- ചന്ദ്രന മന്ദാരാദി മരങ്ങടെ
- വൃന്ദമശേഷം പിഴുതു പതുക്കെ
- സ്യന്ദനമേറ്റിക്കൊണ്ടു തിരിച്ചഥ
- കുണ്ഠേതരഭുജവിക്രമനാം ദശ-
- കണ്ഠൻതന്നുടെ ലങ്കാനഗരേ-
- കൊണ്ടിഹ വന്നുടനുദ്യാനങ്ങളു-
- മുണ്ടാക്കിപ്പുനരത്ര വസിച്ചു;
- ശാരദനീരദസന്നിഭനാകിയ
- നാരദമാമുനി വീണയുമായി
- ചാരുദയാനിധി കലഹപ്രീതിവി-
- ശാരദനാകിയ ഭഗവാനൊരുനാൾ
- ധീരനതാകിയ നക്തഞ്ചരപതി-
- വീരനിരിക്കും മണിമാളികമേൽ
- ചാരുദയാഘനമോദമൊടങ്ങനെ
- പാരാതങ്ങെഴുനള്ളി തദാനീം:
- ഉന്നതനാകിയ രാവണനപ്പോ-
- ളുത്ഥാനംചെയ്താശു വണങ്ങി
- ഭക്തിപുരസ്സരമർഗ്ഘ്യാദികൾകൊ-
- ണ്ടത്യാദരമാരാധനചെയ്തു
- ഭദ്രാസനവും നൽകിയിരുത്തി
- ഭദ്രതരം കുശലപ്രശ്നാദികൾ
- സമുദാചാരംചെയ്തു പതുക്കെ
- സംസൽക്കരണവുമാശു കഴിച്ചു;
- "കമലാസനസുതനാകിയ മുനിവര-
- വിമലഗുണാലയ നാരദഭഗവൻ!
- ഭവദാഗമനംകൊണ്ടു മദീയം
- ഭവനം പാവനമായി വിശേഷാൽ;
- ഭുവനം മൂന്നിലുമുള്ള ജനാനാ-
- മവനംചെയ്യും നിന്തിരുവടിയെ-
- ക്കണ്ടതുകൊണ്ടിഹ കളിയല്ല ദശ-
- കണ്ഠനു മനസി മഹാസന്തോഷം;
- കുണ്ഠിതസുകൃതൻമാർക്കു ഭവാനെ
- ക്കണ്ടു രസിപ്പാനെളുതല്ലേതും; [ 3 ]
- നമ്മുടെ വിക്രമമല്പമതല്ലൊര-
- ഹമ്മതി ഞാൻ പറകല്ല മുനീന്ദ്ര!
- നമ്മെക്കൊണ്ടു ജഗത്ത്രയവാസികൾ
- ചെമ്മേ കിമപി പറഞ്ഞീടുന്നു
- ധാർമ്മികരാകിയ നിങ്ങൾക്കെന്തിഹ
- ധാരണയില്ലതു ബോധിച്ചാലും;
- ത്രിഭുവനവാസികളെല്ലാം നമ്മുടെ
- വിഭുതത കൊണ്ടുപുകഴ്ത്തുന്നില്ലേ?
- "സുഭഗൻ ദശമുഖ'നെന്നൊരു നാണയ-
- മഹഹോ! ദിശി ദിശി കേൾക്കുന്നില്ലേ?
- മന്നിലിരിക്കും മാനിനിമാർ പുന-
- രെന്നെക്കൊണ്ടു പുകഴ്ത്തുന്നില്ലേ?
- എന്നെക്കാണാഞ്ഞംഗനമാരഥ
- ഖിന്നതപൂണ്ടു വസിക്കുന്നില്ലേ?
- നമ്മുടെ ഗുണമിതു മറ്റൊരു കൂട്ടർ-
- ക്കങ്ങു ലഭിപ്പാനതിവൈഷമ്യം;
- ഉള്ളിലസൂയ നിറഞ്ഞു കവിഞ്ഞഥ
- തുള്ളിനടക്കും കുസൃതിക്കാരതു
- കൊള്ളരുതെന്നു ദുഷിക്കുന്നതുകൊ-
- ണ്ടെള്ളോളം ഭയമില്ല നമുക്കു
- ഭള്ളുപറഞ്ഞു ഫലിപ്പിക്കയുമ-
- ല്ലുള്ളതുതന്നെ കഥിച്ചീടുന്നേൻ;
- തീർത്തുരചെയ്യാമിന്നിഹ നമ്മൊടു
- നേർത്തുവരുന്നവരൊക്കെ മടങ്ങും;
- ധൂർത്തുകൾ നമ്മൊടു കൂടുകയില്ലെ-
- ന്നോർത്തു മഹേന്ദ്രനടങ്ങിപ്പാർത്തു,
- ജംഭാന്തകനുടെ കുംഭിപ്രവരൻ
- കൊമ്പുകൾ നാലുമുയർത്തിക്കൊണ്ടഥ
- തുമ്പിക്കരമതിൽ മുസലവുമേന്തി
- ജൃംഭിച്ചാശു വരുന്നേരം ഞാൻ
- മുമ്പിൽ ചെന്നഥ കൊമ്പുപിടിച്ചു ത-
- രിമ്പു വിടാതെ കരിമ്പുകണക്കേ
- കൊമ്പുകൾ നാലുമൊരമ്പതു ഖണ്ഡി-
- ച്ചമ്പൊടു കുംഭമടിച്ചു പിളർന്ന്
- ഇമ്പമകന്നതി കമ്പമിയന്നുട-
- നുമ്പർകുലങ്ങളിൽ മുമ്പനതാകിയ
- വമ്പൻ മണ്ടി നിലിമ്പപുരത്തിന-
- കംപുക്കാനതി സംഭ്രമസരസൻ; [ 4 ]
- കുംഭമുലച്ചികളാകിയ സുരകുല-
- ശംഭളിമാരെ വിളിച്ചുവരുത്തി
- സംഭോഗാദി സുഖത്തെ ലഭിച്ചിതു
- സരസം ഞാനതു ബോധിച്ചാലും!
- വെള്ളിക്കുന്നു പറിച്ചു കരത്തിൽ
- തുള്ളിക്കുന്നൊരു നേരമതിന്മേൽ
- പള്ളിയുറങ്ങും പരമേശ്വരനുടെ
- പുള്ളിമൃഗാക്ഷി മൃഡാനീദേവി-
- ക്കുള്ളിലിരിക്കും കലഹം തീർപ്പാ-
- നുള്ളൊരു സംഗതി വന്നതുമൂലം
- കൊള്ളാമിവനുടെ തൊഴിലെന്നൊരു തിരു-
- വുള്ളം ഭഗവാനെങ്കലുറച്ചു;
- ശക്രനുമഗ്നിയുമന്തകവീരന-
- രക്കൻ വരുണൻ വായു ധനേശൻ
- മുക്കണ്ണരുമിവരെട്ടു വസുക്കളു-
- മൊക്കെക്കപ്പമെനിക്കു തരുന്നു;
- സർവ്വസുരാംഗനമാരിൽ മികച്ചോ-
- രുർവ്വശി മേനക രംഭ തിലോത്തമ
- നിത്യവുമിവർ വന്നെന്നുടെ ലങ്കയി-
- ലച്ചികളായവർ വേലയെടുപ്പാൻ;
- നമ്മുടെ ഭവനം തൂക്ക തളിക്ക പ-
- ടിക്കമെടുക്ക പടിപ്പുര മെഴുകുക
- മണ്ഡോദരിയുടെ തലമുടിയിൽപ്പുന-
- രെണ്ണ കുളുർക്കെത്തേപ്പിപ്പാനും
- താളിയുമിഞ്ചയുമുണ്ടാക്കാനും,
- ആളികളെപ്പരിപാലിപ്പാനും,
- മാളികമേൽ മണിമെത്ത വിരിപ്പാൻ
- കേളീഗൃഹങ്ങളടിച്ചു തളിപ്പാൻ
- ഇങ്ങനെ വിടുപണിയൊക്കെയെടുപ്പാ-
- നിന്ദ്രസുരാംഗനമാരാകുന്നു
- അങ്ങനെ നമ്മുടെ കല്പനയായതി-
- നെങ്ങുമൊരല്പം കുറവുമതില്ല;
- ഇന്ദ്രജിദാഖ്യൻ നമ്മുടെ നന്ദന-
- നിന്ദ്രനെ യുദ്ധംചെയ്തു ജയിച്ചു
- എന്നല്ലവനെബ്ബന്ധിച്ചുംകൊ[ 5 ]
- ണ്ടെന്നുടെ മുമ്പിൽ കൊണ്ടിഹവന്നു;
- 'ലങ്കാപുരിയുടെ തോരണമൂലേ
- ശൃംഖലകൊണ്ടു തളച്ചേച്ചാലും'!
- ഇങ്ങനെ നമ്മുടെ കല്പന കേട്ടവ-
- നങ്ങനെ ചെയ്താനുണ്ണി സമർത്ഥൻ;
- കണ്ണുകളായിരമുള്ളവനവിടെ-
- ക്കണ്ണീർകൊണ്ടൊരു നദിയുണ്ടാക്കി.
- വിണ്ണവർനാടു വെടിഞ്ഞുവരുന്നൊരു
- പെണ്ണുങ്ങൾക്കു കുളിപ്പാൻ കൊള്ളാം;
- ഇക്കഥയും ഭുവനത്രയവാസിക-
- ളൊക്കെപ്പരിചൊടു ബോധിക്കുന്നു
- ഭുവനതലങ്ങൾ ജയിച്ച വിശേഷം
- മാമുനിപുംഗവനറിയുന്നില്ലേ?
- പുഷ്ടി പെരുത്തൊരു നരവരവീര-
- ശ്രേഷ്ഠൻമാരുടെ നാടും നഗരവു-
- മൊക്കെച്ചുട്ടുപൊടിച്ചും പിന്നെ
- കിട്ടുന്നവരെയടിച്ചുമുടിച്ചും
- ഒട്ടും കൃപയില്ലാത്ത നിശാചര
- ദുഷ്ടൻമാരുടെ കരുമനമൂലം
- നഷ്ടമതായി മഹീതല മത്തൊഴിൽ
- ചട്ടമിതെന്നു നമുക്കില്ലേതും;
- ദുഷ്ടൻമാരാമവരു ദിനംപ്രതി
- കഷ്ടമിതോർത്താലദ്‌ഭുതമല്ലോ
- പട്ടിണിയിട്ടു വരുന്ന ജനത്തി-
- ന്നഷ്ടികൊടുക്കാത്തവനീശൻമാർ
- കെട്ടിസ്വരൂപിക്കുന്നു സുവർണ്ണം
- പട്ടും പൊന്നും പണവുമിതെല്ലാം
- പെട്ടന്നാശു പിടിച്ചുപറിപ്പാ-
- നൊട്ടും ഭൂഷണമില്ല നമുക്ക്;
- പട്ടൻമാരൊടു കടവുംകൊണ്ടവ-
- രഷ്ടികഴിച്ചു കിടന്നീടുന്നു;
- ഗാന്ധാരകപതിതന്നുടെ രാജ്യം
- കാന്താരത്തിനു സദൃശമതായി;
- സിംഹളഭൂപതിതന്നുടെ നാട്ടിൽ
- സിംഹം പുലിയും ചെന്നു നിറഞ്ഞു;
- ചേരനരാധിപനങ്ങു വനത്തിൽ
- താളും തകരയുമശനമതായീ!
- ചോളമഹീശനു കൊറ്റിനു കമ്പ[ 6 ]
- ച്ചോളമതല്ലാതില്ലൊരു വസ്തു;
- കുരുരാജാക്കന്മാർക്കിഹ ചക്ക-
- ക്കുരുവല്ലാതില്ലൊന്നു ഭുജിപ്പാൻ
- കാശ്മീരാവനിവല്ലഭനിപ്പോൾ
- കൂശ്മം തിന്നു കിടന്നീടുന്നു;
- ചാമ്പേയാവനി വല്ലഭനിപ്പോൾ
- ചേമ്പുകിഴങ്ങും പഴയരിയായി;
- കൊങ്കണരാജൻ തൻ പ്രിയമാരുടെ
- കൊങ്കകളോർത്തു മരിപ്പാറായി
- കൊങ്കണഭൂപതി പണമുള്ളവരുടെ
- അങ്കണദേശേ ശയനംപോടി.
- ഭോജനരാധിപതിക്കുമിദാനീം
- ഭോജനമെങ്ങും കിടയാതായി
- അംഗമഹേശനുമഷ്ടി ലഭിക്കാ-
- ഞ്ഞംഗമശേഷം കൃശതമമായി;
- കാലിംഗേശനുമേറ്റുനടപ്പാൻ
- കാലിനു ശക്തി കുറഞ്ഞുതുടങ്ങി;
- കാശിനരേന്ദ്രനുമിക്കാലത്തൊരു
- കാശിനു മുതലില്ലാതെ ചമഞ്ഞു
- കുന്തളനരപതി കുത്തിക്കവരാൻ
- കുന്തവുമേന്തി നടന്നുതുടങ്ങി;
- എന്തിനു പലവിധമുരചെയ്യുന്നു
- പംക്തിഗളന്റെ പരാക്രമപുഷ്ടികൾ
- ചിന്തിച്ചാലവസാനവുമില്ല;
- നിന്തിരുവടിയറിയാത്തതുമല്ല;
- ഭൂതലവും സ്വർഗ്ഗം പാതാളം
- ഭുവനം മൂന്നിലുമിന്നിഹ പാർത്താൽ
- രാവണനോടു സമാനപരാക്രമ-
- നേവനൊരധിപതിയുള്ളു മുനീന്ദ്ര!
- എങ്ങാനൊരു ദിശി മത്സമനൊരുവൻ
- തുഗാഹംകൃതിഭാവത്തോടേ
- സംഗരശൂരനതുണ്ടെന്നാല-
- ച്ചങ്ങാതിക്കുമനർത്ഥമടുത്തു;
- ഉണ്ടെന്നാലതുമരുൾചെയ്യേണം
- ചെണ്ടക്കാരൻ മരണത്തിന്നൊരു
- രണ്ടോ നാലോ ദിവസം താമസ-
- മുണ്ടാമായതിലേറ്റം വേണ്ടാ;
- കുണ്ഠതരപ്രാണന്മാരൊടു ദശ[ 7 ]
- കണ്ഠനു പൊരുവാനാഗ്രഹമില്ല
- കുണ്ഠന്മാരിവരയ്യോ! നമ്മുടെ
- രണ്ടടി കൊൾവാനാരും പോരാ;"
- ഉരത്താനന്നേരം നാരദ-
- "നൊരുത്തൻ നിന്നോടു പോരിനു
- സമർത്ഥനില്ലെന്നോ രാവണ!
- മരുത്തൻ മന്നവൻ നിന്നുടെ
- മദത്തെ ശമിപ്പിച്ചില്ലേ?
- തരത്തിൽ ജയിച്ചുവെന്നതു
- വരുത്തിപ്പോന്നില്ലേ നീ? അതി-
- സമർത്ഥൻ പൗരുഷമിങ്ങനെ
- കിമർത്ഥം ഘോഷിക്കുന്നു ബത!
- അനർത്ഥം നിന്നുടെ വാക്കുകൾ
- സമസ്തം നിന്ദിച്ചു ചൊന്നാൽ;
- എങ്കിൽ പറയാം, നിന്നുടെ ഹുംകൃതി-
- ലംഘിപ്പതിനിഹ മതിയായുള്ള ഭ-
- യങ്കരഭുജബലമുള്ളൊരു പുരുഷൻ*
- ലങ്കാധിപതേ! കേട്ടാലും നീ;
- ഹേഹയനൃവരന്മാർക്കു വസിപ്പാൻ
- മാഹിഷ്മതിയെന്നുണ്ടൊരു നഗരി
- കൃതവീര്യാത്മജനർജ്ജുനനെന്നൊരു
- മതിമാൻ ഭൂപതിതത്ര ജനിച്ചു:
- നീണ്ടു തടിച്ച ഭുജങ്ങളൊരായിര-
- മുണ്ടർജ്ജുനനതു ബോധിച്ചാലും
- വമ്പനതാകിയ നിന്റെ ഭുജങ്ങളി-
- ലൊൻപതു ശതവുമൊരെൺപതുമേറും;
- നിന്നെക്കാൾ ഭുജവിക്രമമേറും.
- നിന്നെക്കാൾ ഭുജശക്തിയുമേറും
- പിന്നെയുമുണ്ടു വിശേഷമതോർത്താൽ!
- സജ്ജനദൂഷണമർജ്ജുനനില്ല;
- അവനുടെ ജനവും നിന്നുടെ ജനവും
- ശിവ ശിവ! വളരെ വിശേഷമതോർത്താൽ:
- അവനിയിലുള്ള മനുഷ്യരെയെല്ലാം
- അവികലമവനിഹ രക്ഷിക്കുന്നു;
- തവ ഭൃത്യന്മാരവനിയിലുള്ള മ-
- നുഷ്യരെയെല്ലാം ഭക്ഷിക്കുന്നു;
- അക്കൂട്ടം പുനരവനിസുരന്മാർ[ 8 ]
- ക്കില്ലം വളരെപ്പണിയിക്കുന്നു;
- ഇക്കൂട്ടം പുനരന്തരണവരരുടെ
- ഇല്ലം ചുട്ടു മുടിച്ചീടുന്നു,
- അജ്ജനമിഷ്ടി തുടങ്ങിക്കുന്നു
- ഇജ്ജനമിഷ്ടി മുടക്കിക്കുന്നു
- അവർ ബഹു ധർമ്മം സാധിക്കുന്നു
- ഇവർ ബഹുധർമ്മം ബാധിക്കുന്നു
- അർജ്ജുനനും രാവണനും തമ്മിൽ
- ആനയുമാടും പോലെ വിശേഷം;
- അജ്ജനമിങ്ങനെ പറയിക്കുന്നു
- ലജ്ജ നിനക്കു തരിമ്പുണ്ടെങ്കിൽ
- അർജ്ജുനനൃപനെ വധിക്കണമെന്നേ-
- ദുർജ്ജനദൂഷണവാക്കു ശമിപ്പൂ;
- നിന്നെ സ്നേഹമെനിക്കുണ്ടതുകൊ-
- ണ്ടെന്നൊടു വൈരമവർക്കെല്ലാർക്കും;
- കേവലമിന്നിഹ ലങ്കാപതിയുടെ
- സേവകനായതു നാരദനെന്ന്
- ദേവകൾ ഋഷികൾ മനുഷ്യജനങ്ങളു-
- മേവരുമെന്നെ ദുഷിച്ചീടുന്നു
- ഏഷണികൂട്ടും നാരദനെന്നൊരു
- ദൂഷണമുണ്ടു നമുക്കിഹ പണ്ടേ
- ഭോഷന്മാരതു പറയും ചെറ്റു വി-
- ശേഷജ്ഞന്മാർ പറകയുമില്ല;
- അതുകൊണ്ടേതും ഖേദമെനിക്കി-
- ല്ലിതുകൊണ്ടധികവിഷാദവുമുണ്ട്
- കശ്മലനാകിയ കൃതവീര്യസുതൻ
- വിശ്വപ്രഭുവാകുന്ന ഭവാനെ
- പുല്ക്കൊടിപോലേ നിന്ദിക്കുന്നതെ-
- നിക്കു സഹിക്കുന്നില്ല ദശാസ്യ!
- ബാഹുജവംശംതന്നിലധീശൻ
- ബാഹുസഹസ്രം കൊണ്ടു പ്രസിദ്ധൻ
- ഹേഹയമന്നവനുന്നതവീര്യൻ
- ആഹവശൂരൻ അതിഗംഭീരൻ
- ഇങ്ങനെ സർവ്വജനങ്ങൾ പുകഴ്ത്തി
- ത്തിങ്ങിന ഗർവ്വു മുഴുത്തു ചമഞ്ഞു;
- അങ്ങനെയുള്ള മഹാമന്നവനെ
- സംഗരസീമനി സപദി ജയിച്ചാൽ [ 9 ]
- തുംഗമതാകിന കീർത്തിവിജൃംഭണ-
- മങ്ങു ഭവാനു ലഭിക്കും നിയതം
- ഭംഗംവരികയുമില്ല ഭവാനിഹ
- സംഗതിയുണ്ടാം ബോധിപ്പാനും,"
- നാരദന്റെ ഗിരമമ്പൊടു കേട്ടഥ-
- ഘോരഘോരതര ഭാവമിയന്നു
- ആരവേണ ഭുവനങ്ങൾ മുഴക്കി
- ക്രൂരദൃഷ്ടികൾ തുറിച്ചു മിഴിച്ചഥ
- ചന്ദ്രഹാസവുമെടുത്തു കരത്തില-
- മന്ദവേഗമെഴുന്നേറ്റു ദശാസ്യൻ
- ഇന്ദ്രവൈരി ദശകണ്ഠനുമങ്ങര-
- വിന്ദവാസസുതനോടുരചെയ്തു:
- "ജംഭവൈരിയുടെ വാഹനമാകിയ
- കുംഭിരാജനുടെ കുംഭതടം ദൃഢ-
- മിമ്പമോടുടനടിച്ചു പൊടിച്ചൊരു
- കുംഭകർണ്ണഗുരു രാവണനെന്നൊരു
- വമ്പനിങ്ങു നിവസിക്കയുമങ്ങൊരു
- ഡംഭമാനുഷകുലാധമനിങ്ങനെ
- ഡംഭുകാട്ടി വിളയാടുകയും ഭുവി
- സംഭവിപ്പതിഹ കഷ്ടമഹോ! ബത!
- കുന്നിൻമകളുടെ നാഥനിരിക്കും
- കുന്നെടുത്തുടനെറിഞ്ഞു പിടിക്കാം
- ഇന്ദ്രനാദി സുരവൃന്ദമശേഷം
- മന്ദിരേ മമ പിടിച്ചു തളയ്ക്കാം
- ചണ്ഡദണ്ഡമുടനന്തകദണ്ഡം
- ദണ്ഡമെന്നിയെ വലിച്ചു മുറിക്കാം
- വമ്പനാമമരകുംഭിവരന്റെ
- കൊമ്പു നാലുമഥ തല്ലിയൊടിക്കാം;
- ഇത്ഥമദ്ഭുതമനേകമെടുപ്പാൻ
- ശക്തനായൊരു ദശാനനനിപ്പോൾ
- മർത്ത്യമൂഢനിധനത്തിനുമാത്രം
- പാത്രമല്ല കൃശനെന്നു വരാമോ?
- കണ്ടുകൊൾക മമ വിക്രമമിപ്പോൾ
- രണ്ടുപക്ഷമതിനില്ല മുനീന്ദ്ര!
- രണ്ടുനാലു ദിവസത്തിനകത്താ-
- ത്തണ്ടുതപ്പിയുടെ ഡംഭു ശമിക്കും: [ 10 ]
- അർജ്ജുനന്റെ ഭുജദണ്ഡസഹസ്രം
- രജ്ജുകൊണ്ടഥ വരിഞ്ഞു മുറുക്കി
- പുഷ്പകക്കൊടിമത്തൊടു കെട്ടി
- ദുഷ്പ്രഭുത്വമുടയോരവനെ ദ്രുത-
- മത്ര കൊണ്ടുവരവേണമതിന്നിഹ
- ചിത്രയോധി മമ മന്ത്രിവരിഷ്ഠനു-
- മത്രമാത്രമമരാരിയുമായൊരു-
- മാത്രകൊണ്ടുടനൊരുങ്ങി വരേണം;"
- ഇത്തരം മൊഴി പറഞ്ഞു ദശാസ്യൻ
- തത്ര നിന്നു നിജ പുഷ്പകമേറി
- ചിത്രയോധിയെ വിളിച്ചു വരുത്തി
- ചിത്രമോടുടനെ യാത്ര തുടങ്ങി;
- ചന്ദ്രഹാസവുമെടുത്തു പിടിച്ച
- ങ്ങിന്ദ്രവൈരി സഹ നാരദനോടും
- ചന്തമോടുടനുയർന്നു തിരിച്ചാ-
- നന്ധനായ ദശകന്ധരവീരൻ.
- സത്വരമമ്പൊടു പുഷ്പകമപ്പോൾ
- ഉത്തരദിക്കിനു ധാവതി ചെയ്തു;
- ചിത്തംകൊണ്ടു ചിരിച്ചഥ നാരദ-
- നിത്ഥം നിന്നു പറഞ്ഞുതുടങ്ങി:
- "അർജ്ജുനനൃപനെക്കൊടിമരമൂലേ
- രജ്ജുവെടുത്തു വരിഞ്ഞുമുറുക്കി-
- ക്കൊണ്ടുവരുന്ന മഹോത്സവഘോഷം
- കണ്ടുരസിപ്പാനഹമിഹ മാർഗേ
- ഗൂഢമതായി വസിച്ചീടുന്നേൻ;
- കൂടെപ്പോന്നിട്ടെന്തൊരു കാര്യം?
- മൂഢന്മാരിവരേഷണി കൂട്ടാൻ
- കൂടെ നടക്കുന്നെന്നു കഥിക്കും;
- ഹേഹയനരവരപുരമതു സുരവര-
- ഗേഹസമാനം ഭുവി വിലസിതമാം
- മാഹിഷ്മതിയെന്നതിനുടെ പേർ ബഹു
- മാഹാത്മ്യം ബഹു മഹനീയം ബഹു
- രമണീയം ബഹു കമനീയം ബഹു
- രമണീയം ബഹു കമനീയം ബഹു
- കമനീകുലമണിമണിമാടങ്ങളും;
- അമലസലിലനവകമലവിമലതര
- ശമലഹരണജനപടുതമമിതരുചി;
- നർമ്മദയാകിയ തീർത്ഥവിശേഷം
- ശർമ്മദമാകിന പുളിനവിശേഷം [ 11 ]
- ധർമ്മദയാനിധിനൃപതിവിശേഷം
- ധർമ്മപരായണ പുരുഷവിശേഷം
- രജതവിശേഷം രത്നവിശേഷം;
- കമനിവിശേഷം കാന്തിവിശേഷം
- സുകൃതിവിശേഷം സൂത്രവിശേഷം
- സുമതിവിശേഷം സൂക്തിവിശേഷം
- ഇങ്ങനെയുള്ള പുരത്തിലിറങ്ങി
- സംഗതിപോലെ സമീഹിതകാര്യം
- സാധിച്ചീടുക! സാഹസമരുത്
- ബോധിച്ചീടുക ലങ്കാധിപതേ."
- ഇത്തരമരുൾചെയ്തീടിന നാരദ-
- നത്ര മറഞ്ഞൊരു ശേഷം ദശമുഖ-
- നുത്തരനരവരപത്തനദേശേ
- സത്വരമവിടെയിറങ്ങി വിമൂഢൻ
- നർമ്മദതന്നുടെ പുളിനതന്നിൽ
- ദുർമ്മദശാലി ദശാനനവീരൻ
- ചത്രയോധിയൊടു കൂടിയതങ്ങനെ
- തത്ര നല്ല മണലുള്ള പ്രദേശേ
- വസ്ത്രംകൊണ്ടൊരു പാളയമവിടെ-
- ച്ചിത്രമതാക്കിത്തീർത്തു ദശാസ്യൻ;
- രേവാസലിലേ ചെന്നു കുളിച്ചു
- ദേവാരാധനകോപ്പുകൾ കൂട്ടി
- ശിവലിംഗത്തെയെടുത്തു നിരത്തി
- ശിവപൂജയ്ക്കു തുടങ്ങി പതുക്കെ;
- ജലഗന്ധാക്ഷതപുഷ്പാദികളും
- ഫലമൂലം പുനരവിലും മലരും
- ഗുളവും കദളിപ്പഴവും പങ്കജ-
- ദളവും ഗുൽഗുലുധൂപം ദീപം
- വെള്ളിവിളക്കുകൾ പൊന്നിൻതളികകൾ
- വെള്ളിക്കുടവും മണിതാലങ്ങളിൽ-
- വെള്ളരി വെറ്റില പാക്കും വെളുവെളെ-
- യുള്ള പളുങ്കിൻമാലകളനവധി
- മുല്ലപ്പൂമലർ ചെത്തിപ്പൂവും
- വില്വദളങ്ങളെരിക്കിൻപൂവും
- ചെമ്പകമലർ ചേമന്തിപ്പൂവും
- വെൺതുളസിപ്പൂ തുമ്പപ്പൂവും
- മണമിയലും കളഭം കർപ്പൂരം
- തണുതണമലയജകുങ്കുമഗന്ധം [ 12 ]
- ഘണഘണ ഘോഷം മണിയുടെ ഘോഷം
- ഗണപതിബിംബം ഫണിപതിബിംബം
- ഗുണമിയലുന്ന ഷഡാനനബിംബം
- ശങ്കരശങ്കരിമാരുടെ വിഗ്രഹ-
- സംഘവുമവിടെ നിരത്തിപ്പരിചൊടു
- പുഷ്പാഞ്ജലിയും മന്ത്രജപങ്ങളു-
- മീവക പൂജകൾ ചെയ്തു വസിച്ചാ-
- നവികലഭക്തൻ നക്തഞ്ചരപതി,
- ചിത്രയോധിയെ വിളിച്ചുരചെയ്തു;
- "തത്ര ചെന്നു കൃതവീര്യജനാകും
- ക്ഷത്രിയാധമനെ വേറെ വിളിച്ചഥ*
- വർത്തമാനമറിയിച്ചു വരേണം;
- 'ഇപ്പടി നിന്നുടെ താന്തോന്നിത്തമ-
- തിപ്പൊഴിതിവിടെ നടക്കയുമില്ല;
- ചൊൽപ്പൊങ്ങും ദശകണ്ഠമഹേന്ദ്രൻ
- കല്പിക്കുന്നതു കേട്ടേ പോവൂ
- കപ്പം തരണം നമ്മുടെ നാട്ടിലി-
- രിപ്പാനാഗ്രഹമുണ്ടെന്നാകിൽ
- മുപ്പറയും പുനരെട്ടൊന്നും പല-
- വൈപ്പുകളുണ്ടതു തന്നില്ലെങ്കിൽ
- വെക്കം നിന്നുടെ നാടുംനഗരവു-
- മൊക്കെപ്പാടെയടക്കും നിന്നുടെ
- ധിക്കാരങ്ങളഹങ്കാരങ്ങളു-
- മിക്കാലങ്ങളിൽ നമ്മൊടു കൂടാ;
- യുദ്ധംചെയ്തു ജയിക്കാമെന്നൊരു
- ബുദ്ധി നിനക്കു തരിമ്പുണ്ടങ്കിൽ
- പത്തുശതം കരമുള്ളതിൽ വില്ലുമെ-
- ടുത്തു പടയ്ക്കു പുറപ്പെട്ടാലും!'
- ഇപ്രകാരമവനോടുരചെയ്തുട-
- നല്പബുദ്ധിയുടെ ഭാവമറിഞ്ഞിഹ
- സത്വരം വരിക സാധുമതേ! നീ!'
- ചിത്രയോധിസചിവൻ സഹസാ ദശ-
- വക്ത്രനെത്തൊഴുതുകൊണ്ടു നടന്നു;
- തത്ര ഹേഹയനരേന്ദ്രനിരിക്കും
- ചിത്രകാഞ്ചനമഹാപുരിപുക്കാൻ;
- ധാർമ്മികനാകിയ നരവരനപ്പോൾ
- നർമ്മദനദിയുടെ സലിലം തന്നിൽ
- പെണ്മണിമാരോടൊരുമിച്ചമ്പൊടു [ 13 ]
- വെണ്മ കലർന്നു കളിച്ചീടുന്നു;
- നാരിമാരുമവരർജ്ജുനനൃപതി-
- ക്കായിരമുണ്ടു മഹാസുന്ദരിമാർ
- ആയിരമുണ്ടു കരങ്ങളുമതിസുഖ-
- മായി രമിപ്പാനതുമനുകൂലം;
- മുഴുകിപ്പൊങ്ങും കാമിനിമാരെ-
- ത്തഴുകിക്കൊണ്ടു രമിക്കും മുലകളി-
- ലിഴുകും കുങ്കുമകളഭം നാടൻ-
- പുഴുകും നർമ്മദതന്നിൽ ദ്രുതതര-
- മിഴുകും തലമുടി വടിവിലഴിഞ്ഞും
- മലർനിര പയസി പൊഴിഞ്ഞതൊഴിഞ്ഞും
- ചലമിഴിമാരുടെ തലയും മുലയും
- തടഭുവി വാരി വഴിഞ്ഞു കവിഞ്ഞും
- കമനികൾ തമ്മിലിടഞ്ഞു തടഞ്ഞും
- മുഴികിത്തത്തി മറിഞ്ഞു വലഞ്ഞും
- നീന്തിവലഞ്ഞും തിരയിലുലഞ്ഞും
- താലി കളഞ്ഞും തദനു തിരഞ്ഞും
- തങ്ങൾ പിരിഞ്ഞും തോണികളിച്ചും
- താണു കുളിച്ചും നാണമിളച്ചും
- വേണിയഴിഞ്ഞും പാണി കുഴഞ്ഞും
- ക്ഷോണീപതിയുടെ പാണിപിടിച്ചഥ
- ചലമിഴിമാരുടെ മാർവ്വിലണച്ചും
- ജലമൊഴുകീടിന മുലകൾ പുണർന്നും
- മുഖചുംബനവും പലപല വിലസിത
- കലിതലളിത കളികളുമതിചതുരം.
- അമല കമലമുഖിമാരൊടുകൂടി
- ബഹുവിധ മാരമഹോത്സവമാടി*
- നരപതിവീരൻ ക്രീഡിച്ചങ്ങനെ
- കനിവൊടു പയസി കുളിക്കുന്നേരം
- രാത്രിഞ്ചരവരദൂതനതാകിയ
- ചിത്രയോധി വിരവോടു തിരഞ്ഞഥ
- തത്ര ചെന്നു തടിനീതടഭാഗേ
- മുക്തശങ്കമുരചെയ്തുതുടങ്ങി:
- "ഈരേഴുലകിനുമീശനതാകിയ
- വീരൻ വാരാന്നിധിയുടെ മദ്ധ്യേ
- ലങ്കാനഗരേ സ്വൈരമതായി
- വാണരുളും ദശകണ്ഠപ്പെരുമാൾ [ 14 ]
- ഹേഹയനൃപതേ! നിന്നെക്കണ്മാൻ
- മാഹിഷ്മതിയിലെഴുന്നരുളുന്നു;
- സാഹസമെന്തിപ്പെണ്ണുങ്ങളുമായ്
- മോഹമിയന്നു കളിക്കുന്നെന്തിഹ!*
- ഝടിതി ഭവാൻ ചെന്നമ്പൊടു തന്തിരു-
- വടിയുടെ ചണസരോജേ ബഹുധന-
- മടിയറയും വച്ചാശു വണങ്ങുക
- മുടിയരുതേ തവ നാടും നഗരവു-
- മടിയാർ കുടിയാരങ്കം ചുങ്കം
- പടയും കുടയും പ്രജകളുമൊന്നും
- മുടിയരുതാകിലശങ്കം നിന്നുടെ
- മുടിയിൽ തന്തിരുവടിയുടെയടിമലർ-
- പൊടിയേറ്റവിടെ വസിച്ചീടുക നീ!
- പിടിപാടില്ലാത്തെന്തൊരു കഷ്ടം!
- പിടിയാത്തവരൊടു പടവെട്ടിച്ചില
- പിടിയാനകളും പിടികുതിരകളു1
- മുടനേ കിട്ടിയതോർത്തു തിമർത്തിഹ
- പടുഭാവത്തെ നടിച്ചീടുന്നൊരു
- വിടുഭോഷൻ നീ, ദശമുഖചരിതം
- വിരവൊടു ബോധിച്ചില്ലേ നിയതം?
- ചടുലവിലോചനമാരുടെ തടമുല
- ഉടലിലണച്ചു പുണർന്നുംകൊണ്ടിഹ
- നന്നം ചെയ്യും കാമിജനം മറു-
- നാട്ടിലെ വാർത്തകളെന്തറിയുന്നു?
- മടുമലർശരനെച്ചുട്ടുപൊടിച്ചൊരു
- നിടിലതടത്തോൻ വാണരുളുന്നൊരു
- കുലഗിരിവരനെക്കുത്തിയെടുത്തു കു-
- ലുക്കിയിളക്കിയെറിഞ്ഞു പിടിച്ചൊരു
- കരബലജലനിധിയാകും രാവണ-
- നുലകു ജയിച്ചജഗത്ത്രയമന്നൻ
- ശ്രീമദുദാരശ്രീദശകണ്ഠ-
- സ്വാമി ഭവാനോടരുൾചെയ്യുന്നു
- കല്പനയെന്തെന്നതുമുരചെയ്യാം:
- 'കപ്പം തരണം കാലന്തോറും
- വിളവിൽ പാതി നമുക്കു തരേണം
- മുളകു സമസ്തവുമേല്പിക്കേണം; [ 15 ]
- തെങ്ങു കവുങ്ങുകൾ മാവും പ്ലാവും
- എങ്ങുമെനിക്കിഹ കണ്ടെഴുതേണം;
- മടമ്പികളുടെ പദവികളൊന്നും
- കൂടുകയില്ലാ നമ്മുടെ നാട്ടിൽ
- വീടന്മാരും വിളവുകൾ നെല്ലുകൾ
- വിത്തിലിരട്ടി നമുക്കു തരേണം;
- നാട്ടിലിരിക്കും പട്ടന്മാരും
- നാലാലൊന്നു നമുക്കു തരേണം;
- വീട്ടിലിരിക്കും നായന്മാർ പട-
- വില്ലും കുന്തവുമേന്തിച്ചൊല്ലും-
- വേലയെടുത്തു പൊറുക്കണമെല്ലാ-
- നാളും പാർത്താ ദശമുഖഭവനേ;
- കള്ളുകുടിക്കും നായന്മാർക്കടി-
- കൊള്ളും താനുമതോർത്തീടേണം;
- ഉള്ളിൽ കൂറില്ലാത ജനത്തെ-
- കൊല്ലിക്കുന്നെജമാനന്മാരൊരു-
- കൊള്ളിക്കും വിലപിടിയാതവരെ
- ത്തുള്ളിക്കും ദശകണ്ഠപ്പെരുമാൾ;
- ഇങ്ങനെയുള്ള ജളപ്രഭുമന്ത്രിക-
- ളെങ്ങും ചേരുകയില്ലതുകൊണ്ട്
- ഹേഹയനൃപതേ! നിന്നുടെ മന്ത്രിക-
- ളാഹവശൂരന്മാരായുള്ളവ-
- രെല്ലാമുടനേ ലങ്കാപുരിയിൽ-
- ച്ചെല്ലാനരുളിച്ചെയ്തു; ദശാസ്യനു
- നെല്ലും പണവും പൊന്നും പാത്രവു-
- മുള്ളതശേഷവുമങ്ങു കൊടുത്താൽ
- തെല്ലും ദുർഘടമില്ല നിനക്കത്;
- വല്ല നൃപന്മാർക്കിക്കാലങ്ങളിൽ1
- വല്ലാതുള്ളൊരു ശഠത തുടർന്നാൽ
- വല്ലന്തിയുമിഹ വന്നു ഭവിക്കും;
- നല്ലൊരു പെരുവഴി ഞാനിഹ നിന്നൊടു-
- ചൊല്ലുന്നതു നീ മാനിക്കാഞ്ഞാൽ
- പെട്ടെന്നിവിടെക്കാണാമനവധി
- ദുഷ്ടന്മാർ ദശകണ്ഠഭടന്മാർ
- വട്ടക്കണ്ണും ചെമ്പൻതലയും
- വായിൽ നിറഞ്ഞുവളഞ്ഞൊരു പല്ലും
- അഞ്ജനശൈലംപോലെ ശരീരവു-
- മതിതീവ്രം നഖമുഖവും കണ്ടാൽ [ 16 ]
- മർത്ത്യന്മാരുമമർത്ത്യന്മാരും
- മൃത്യുഭയത്തെ പ്രാപിച്ചീടും;
- യൂപാക്ഷൻ മകരാക്ഷൻ പിന്നെ വി-
- രൂപാക്ഷൻ ധൂമ്രാക്ഷൻ ദുർമ്മുഖ-
- നതികായൻ പ്രതികായൻ പ്രഹരൻ
- വരദൻ പിന്നെ നികുംഭൻ നിരദൻ
- കുംഭൻ കുംഭോദരനും പുനരഥ
- വമ്പു പെരുത്ത മഹാപാർശ്വകനുമ-
- കമ്പനു മീവക രാക്ഷസവൃന്ദം
- വന്നുകരേറി മനുഷ്യരെയെല്ലാം
- കൊന്നും തിന്നും ചോര കുടിച്ചും
- സുന്ദരിമാരുടെ തലമുടി പിടിപെ-
- ട്ടൊന്നൊഴിയാതവർ കൊണ്ടുതിരിച്ചും
- അമ്പലകമൊക്കെത്തീണ്ടിത്തൊട്ടും
- നമ്പൂരാരുടെ ഭനം ചുട്ടും
- എമ്പ്രാന്തിരിയെത്താഡിച്ചും പുന-
- രമ്പലവാസികളെക്കൊലചെയ്തും
- കലശലു പലതും കൂട്ടും നിന്നുടെ
- കുലനാശത്തെ വരുത്തും നൃപതേ!
- ഇങ്ങനെ വളരെയനർത്ഥം വരുമതു
- നിങ്ങൾ നിനച്ചാലൊഴികയുമില്ല;
- അത്തൊഴിലൊന്നും കൂടാതിവിടെ
- സ്വസ്ഥതയോടു വസിക്കണമെങ്കിൽ
- ചൊൽപ്പൊങ്ങും ദശകണ്ഠമഹേന്ദ്രനു
- കപ്പം തരണം കാലംതോറും,
- കല്പന കേട്ടു വസിച്ചെന്നാൽ പുന-
- രല്പമൊരല്ലൽ ഭവിക്കയുമില്ല"
- ഇത്ഥം ഘോഷിച്ചു ചിത്രയോധി പറയുന്നൊര-
- ബദ്ധവചനമതു കേട്ടു ഹേഹയനൃപൻ
- പെട്ടെന്നു കൈകളെല്ലാം കൊട്ടിച്ചിരിച്ചുകൊണ്ടു
- മട്ടോലുംമൊഴിമാരെക്കെട്ടിത്തഴുകിക്കൊണ്ടും
- ഉത്തരമൊന്നുമുരിയാടാതെ വാരിധിയിൽ
- സത്വരമങ്ങിറങ്ങി ക്രീഡതുടങ്ങി മെല്ലെ;
- മുങ്ങുമങ്ങൊരു ദിക്കിൽ പൊങ്ങുമങ്ങൊരു ദിക്കിൽ
- മാനിനിയെ വിളിക്കും ആഴത്തിലങ്ങൊളിക്കും
- മെല്ലെ മെല്ലെക്കുളിക്കും ഓളത്തിൽ ചെന്നു ചാടും
- മേളത്തിലാട്ടമാടും സുന്ദരിമാരെത്തേടും
- ക്രീഡകളൊന്നുമൂക്കും വാരിയിലങ്ങു നോക്കും [ 17 ]
- മുഞ്ഞിയും മഗ്നമാക്കും വെറ്റില നല്ല പാക്കും
- നുകർന്നു കളിവാക്കും പറഞ്ഞങ്ങു തമ്മിൽ നോക്കും
- തിരയതിൽ ചാടി നീന്തും നെറ്റിമേൽ കുറിച്ചാന്തും;
- തഴുകി കാമഭ്രാന്തുപിടിച്ചപോലങ്ങു കാന്താ-
- നാരീജനങ്ങളോടു വാരിയിൽ ക്രീഡകളും;
- നേരമ്പോക്കല്ലാതൊരു നേരമിളക്കമില്ല;
- ചിത്രയോധി പുനരിത്തൊഴിലെല്ലാം
- തത്രനിന്നു ബത കണ്ടു കയർത്തും-
- കൊണ്ടു പോന്നു ദശകണ്ഠനിരിക്കും
- പാളയത്തിലഥ പുക്കു വണങ്ങി;
- വർത്തമാനമറിയിച്ചൊരു നേരം
- ക്രുദ്ധനാകിയ ദശാനനവീരൻ
- ഭഷകൊണ്ടു ശിവപൂജനമദ്ധ്യേ-
- ഭാഷണം വലിയ ദൂഷണമിങ്ങനെ
- ചിത്രയോധിയൊടു സംസ്കൃതമായി-
- ട്ടത്രമാത്രമരുൾചെയ്തു ദശാസ്യൻ;
- "അർജ്ജുനസ്യ മയി കിം ബഹുമാനം
- നാസ്തി തസ്യ ബഹുകഷ്ടമിദാനീം
- ദുർജ്ജനസ്യ ഗുണദോഷവിചാരം
- ദുല്ലഭം ജഗതി കിം കഥനീയം!
- ശാസനം മമ നിശമ്യ ദുരാത്മാ
- ഹസമേവ കൃതവാനവിവേകീ
- അസ്തു തസ്യ ഭവനാദി സമസ്തം
- വസ്തുനാശമുപയാസ്യതി നൂനം
- പാകശാസനമുഖന്തദമന്ദം
- നാകവാസി നിഖിലാസുരവൃന്ദം
- യേന ഹസ്തവിദിതം സ ദശാസ്യോ
- മാനുഷാദപി ച കിന്നു ബിഭേതി?
- താം സമർപ്യ പരമേശ്വരപൂജാം
- തൽസമീപമുപഗമ്യ ച ശീഘ്രം
- ചന്ദ്രഹാസഭുജഗാമിഷമേനം
- കല്പയാമി നഹി സംശയമദ്യ"
- ഇങ്ങനെ സംസ്കൃതവാക്കു പറഞ്ഞും
- തിങ്ങിനഭക്ത്യാ പൂജകൾ ചെയ്തും
- കണ്ണുമടച്ചു ജപിച്ചു വസിക്കും
- പൊണ്ണനിരിക്കും പടുകുഴിതന്നിൽ
- വെള്ളം വന്നു കടന്നു തുടങ്ങി
- വെള്ളപ്പട്ടു നനഞ്ഞു തുടങ്ങി; [ 18 ]
- വെള്ളിവിളക്കുകൾ പൊന്നിന്തളികക-
- ളുള്ളതശേഷവുമൊഴികി പതുക്കെ
- മുങ്ങി സമസ്തം ശിവലിംഗാദികൾ
- പൊങ്ങിയൊലിച്ചിതു പുഷ്പാദികളും
- കെട്ടു വിളക്കുകളവിലും മലരും
- കൊട്ടത്തേങ്ങാ കദളിപ്പഴവും
- പെട്ടെന്നിട്ടു നിറച്ചൊരു വെള്ളി-
- ത്തട്ടുകൾ മുഴുകീ പെട്ടികളൊഴുകി,
- ആറു നിറഞ്ഞു ജലങ്ങൾ കവിഞ്ഞു
- കാറും മഴയും കാണ്മാനില്ല;
- ആറ്റിലെ വെള്ളം പൊങ്ങിവരുന്നൊരു-
- കാറ്റുമതില്ലതിനെന്തൊരു ബന്ധം
- ഏറ്റം വന്നാലിത്ര വരാമോ?
- ഊറ്റമൊഴുക്കും നിലയില്ലാതായ്;
- തള്ളിവരുന്നൊരു വെള്ളത്തിരയിൽ
- തുള്ളിയലഞ്ഞു വലഞ്ഞു ദശാസ്യൻ;
- വെള്ളവുമൊട്ടു കുടിച്ചു തടിച്ചു
- പള്ളയുമൻപൊടു വീർത്തു തുടങ്ങീ;
- ഇരുപതു കൈകൊണ്ടാഞ്ഞു തുഴഞ്ഞു
- കരപറ്റാഞ്ഞു കരങ്ങൾ കുഴഞ്ഞു;
- ഇരുപതു തണ്ടുകൾ വച്ചുമുറുക്കിയ-
- പെരിയൊരു വഞ്ചികണക്കേ രാവണ-
- നൊരുവണ്ണം കര പറ്റിക്കയറി-
- ത്തെരുതെരെ മണ്ടി ദൂരെച്ചെന്നഥ
- നോക്കുന്നേരം കാണായ്‌വന്നു
- നരപതി കൃതവീര്യാത്മജവീരൻ
- തിറവിയ ബാഹു സഹസ്രംകൊണ്ടൊരു
- ചിറയും കെട്ടിയുറപ്പിച്ചങ്ങനെ
- കുത്തിയൊലിച്ചു വരും ജലമങ്ങു ത-
- ടുത്തുംകൊണ്ടാ നദിയുടെ മദ്ധ്യേ
- മട്ടോലുമൊഴിമാരെത്തന്നുടെ
- അരികിൽ നിറുത്തിക്കൊണ്ടു കളിച്ചും
- സ്വസ്ഥതയിൽ ചില വാക്കു പറഞ്ഞു കൃ-
- താർത്ഥത പൂണ്ടഥ മരുവീടുന്നു;
- ഇടവും വലവുമൊരഞ്ഞൂറഞ്ഞൂ-
- റിടതിങ്ങീടിന കൈകളശേഷം
- തടികൾകണക്കെ നിരത്തിക്കൊണ്ടഥ
- നടുവിൽത്താനൊരു കുറ്റികണക്കെ [ 19 ]
- തടവുവരുത്തിത്തത്ര വസിക്കും
- പടുമതിയാകിയ പാർത്ഥിവവരനെ
- തടമുലകൊണ്ടഥ മടവാർമണിമാർ
- വടിവൊടവൻമുൻപിടചേർന്നങ്ങനെ
- ദൃഢതരമാലിംഗനവും ചെയ്തു
- ചടുലവിലാസേ മരുവീടുന്നു;
- ഇത്തൊഴിൽ കണ്ടു കയർത്തു ദശാസ്യൻ
- ഇത്ഥം നിന്നു പറഞ്ഞു തുടങ്ങി:
- "നോക്കെട മൂഢാ! നിന്നുടെ വികൃതിക-
- ളാർക്കു സഹിക്കു! മെനിക്കിതു കണ്ടാൽ-
- ഖഡ്ഗമെടുത്തു കരങ്ങളശേഷം
- ഖണ്ഡിക്കാതെയിരിപ്പാൻ മേലാ;
- ചിറ കെട്ടീടിന പാണികൾ വെട്ടി
- കറുകറനെന്നു മുറിക്കുന്നേരം
- ചിറകറ്റീടിന ശൈലംപോലിഹ
- മറിയും നീയെട! മാനുഷകീടാ!
- പിറകിലിരിക്കും പെൺകൂട്ടത്തിനു
- വിറകിനു കൊള്ളാം നിന്റെ കരങ്ങൾ!
- ഉള്ളംതന്നിൽ കള്ളം ബഹുവിധ-
- മുള്ളൊരു നീ ദശകണ്ഠനെയിങ്ങനെ
- വെള്ളംതന്നിൽ ചാടിച്ചതു ഞാ-
- നുള്ളംതന്നിൽ മറന്നീടുവനോ?
- പോടാ! നിന്നുടെ വികൃതികൾ നമ്മൊടു
- കൂടാ കേളെട മാനുഷകീടാ!
- നിന്നുടെ നാടായുള്ളതശേഷം
- വലിയൊരു കാടായ്‌വരുമതിമൂഢാ!
- വാട കിടങ്ങുകളങ്ങാടികളും
- മേടകൾ നാടകശാലകളെന്നിവ
- ദൃഢതരമിടിപൊടിയാക്കി മുടിപ്പാൻ
- പടുത നമുക്കുണ്ടർജ്ജുന കീടാ!
- മത്തഗജങ്ങടെ മദജലമിയലിന-
- മസ്തകഭാരമടിച്ചു പിളർന്നതിൽ
- മുത്തുകളുള്ളതു കുത്തിയെടുത്തൊരു
- മാല ചമച്ചങ്ങതിശയമായ ക-
- ളത്രമതാകിയ മണ്ഡോദരിയുടെ
- കുത്തുമുലത്തടയിടയിലണച്ചൊരു
- നക്തഞ്ചരപതിതിലകൻ ഞാനതി-
- ശക്തൻ സാധുവിരക്തൻ ഭുജബല[ 20 ]
- യുക്തൻ വിധുരവിയുക്തൻ സംഗര-
- ശക്തൻ നിന്നുടെ പത്തുശതം കര-
- മുള്ളതശേഷവുമൊത്തുതകർത്തലി-
- വില്ലാതങ്ങു മുടിച്ചീടുന്നതു
- കണ്ടു വിരഞ്ഞു കരഞ്ഞു പിരിഞ്ഞിഹ
- മണ്ടും നിൻ മഹിഷികളെല്ലാം ദശ-
- കണ്ഠനു ചേതസി കനിവെന്നുള്ളതു
- പണ്ടേയില്ലതു ബോധിച്ചാലും;
- തന്നെപ്പോലും കനിവില്ലാതൊരു
- സന്നദ്ധൻ ഞാൻ വളരെക്കാലം
- നിന്നു തപംചെയ്തിട്ടും നാന്മുഖ-
- നെന്നുടെ മുമ്പിൽ വരാഞ്ഞതുമൂലം
- അമ്പൊടു ഖഡ്ഗമെടുത്തു ശിരസ്സുക-
- ളൊമ്പതുമുടനേ ഖണ്ഡിച്ചീടിന
- വമ്പൻ ധീരതയുള്ള ജനങ്ങളിൽ-
- മുമ്പൻ ഞാന, തിധൂർത്ത! മദാൽ നീ
- കിം പുനരെന്നൊടു കാട്ടുമെനിക്കു ത-
- രിമ്പു ഭയം നഹിയെന്നതുമറിക;
- പലപല മീശക്കൊമ്പന്മാരെ-
- ക്കൊന്നൊരു യാതുകുലാധീശൻ ഞാൻ;
- ഹേഹയ മാനുഷകീടാ! നമ്മൊടു
- നേരേ നിന്നിഹ പോരാടീടുക
- ദൂരേ മാനിനമാരുടെ നടുവിൽ
- പ്രിയമിയലുന്നതു കണ്ടെന്നാകിൽ
- ഭീരുജനങ്ങളിൽ മൂത്തവനെന്നൊരു
- പേരു നിനക്കുണ്ടെന്നതുതോന്നും.
- ഓരായിരമിക്കൈകൾ നിനക്കൊരു
- മാരായുധമായ്ത്തീർന്നുചമഞ്ഞു
- നാരിജനത്തെപ്പുണരാൻ; മറ്റൊരു
- പോരിനുമാത്രം പോരാതാനും
- പേരാൽതന്നുടെ വേരുകണക്കെ
- പെരുതെങ്കിലുമൊരു ഫലമില്ലേതും."
- ചെവിക്കസഹ്യത പെരുകിന വാക്കുകൾ
- ശ്രവിച്ചു ഭൂപതി വിരവൊടു കൈകളി-
- ലെടുത്തു വില്ലും കണകളുമനവധി
- തൊടുത്തു ചെന്നിഹ നിശിചരവരനെ-
- ത്തടുത്തുകൊണ്ടൊരു ഗിരമുരചെയ്തു;
- "കടുത്തവാക്കുകൾ മതി മതി ഭുവനം [ 21 ]
- കെടുത്ത നിന്നുടെ കരതലവിരുതുകൾ
- അടക്കി വയ്ക്കുന്നുണ്ടതിനൊരു ശര-
- മുടക്കി വിരവിനൊടയച്ചു നിന്നുടൽ
- മുടക്കി മൂഢനെ മുഹുരപി മുഹുരപി
- മടക്കി മണ്ടിക്കുന്നതുമുണ്ടിഹ
- പടയ്ക്കുവന്നൊരു ബഹുത്വമമ്പൊടു
- കെടുത്തു മൂഢനെ എടുത്തു വടികൊ-
- ണ്ടടിച്ചു പല്ലുകൾ പൊഴിച്ചു ഞാനും
- പിടിച്ചു കെട്ടിയിരുപതു കൈകളു-
- മൊടിച്ചയയ്ക്കണമെന്നൊരു പക്ഷം;
- ഒരിക്കൽ നിന്നുടെയിരുപതു മീശകൾ
- കരിച്ചയയ്ക്കണമെന്നു വിചാരി-
- ച്ചിരിക്കവേ നീ വന്നിഹ ചാടിയ-
- തെനിക്കു നല്ലൊരു കൗതുകമധികം;
- മദിക്കകൊണ്ടും പലപല ചപലത
- കഥിക്കകൊണ്ടും സുരകുലമേറെ-
- ച്ചതിക്കകൊണ്ടും കുലതരുണികളെ-
- പ്പിടിക്കകൊണ്ടും കള്ളുകൾ വളരെ-
- ക്കുടിക്കകൊണ്ടും ഭള്ളുകൾ പലവക
- നടിക്കകൊണ്ടും നാടുകളഖിലം
- മുടിക്കകൊണ്ടും നതാംഗിമാരെ
- പ്പിടിക്കകൊണ്ടും വന്നൊരു പാതകം
- അപവാദത്തിനു മൂലമതിങ്ങനെ
- വിപദേ വന്നു ഭവിച്ചതുമിപ്പോൾ
- ഝടിതി നിന്നുടെ; തടിയടിച്ചു-
- പൊടി പൊടിച്ചു മുടിയിഴച്ചു
- പടയിലുടയ പടുത പലതു
- ഝടിതി തുടങ്ങുക സപദി മടങ്ങുക!
- കരുതിനിന്നു പൊരുതുകൊൾക രാവണ!
- പെരുതു നിന്റെ വിരുതു സജ്ജനാനാം
- ബലചരിതമൊക്കെ ദുരിതമാക്കിയൊരു ബഹു
- ദുരിതരാശിഭരിതനായ കാരണം
- ഇത്ഥമിന്നു വന്നുകൂടി സംഗതി
- രൂക്ഷഹൃദയ! രാക്ഷസാധമ! തവ"
- തൽക്ഷണത്തിലിത്ഥമോതി രോഷമോ-
- ടർജ്ജുനൻ രണത്തിനായ് തുടർന്നിതു
- ചമ്പതാളം
- നൃപതികുലനാഥനും നിര്യതികുലനാഥനും
- സപദി ബത തങ്ങളിൽ സമരമിടകൂടിനാർ [ 22 ]
- പഞ്ചശതപാണികളിലഞ്ചിതമതാകുമൊരു
- പഞ്ചശതചാപശരസഞ്ചയമെടുത്തൊരുവ-
- നഞ്ചുമുടനഞ്ചുമൊരു പാണികളിൽ വില്ലുകളു-
- മമ്പുകളുമമ്പൊടു ധരിച്ചപരനും മുദാ
- സംഗരവിധങ്ങളവർ തങ്ങളിലഭംഗതര-
- മങ്ങവർ തുടങ്ങിയിടരോടതി ഗഭീരം
- ഘോരശരമാരികളുതിർത്തഥ തിമിർത്തു ബത-
- പോരതു തുടങ്ങി നിശിചാരിനൃപവീരൻ
- പലപൊഴുതുമവർ കരുതി കുറവതു വരരുതിവിടെ
- നിരവധിക നിശിതശരമരിവരനിലരിശമൊടു
- വിട്ടു പടവെട്ടുവതിനൊട്ടു ഞെട്ടലതുമില്ല
- വടിവിനൊടുമവരുടയ ഝടഝടതയിങ്ങനെ
- ഝടിതി ഗുരുവിപ്ലവമതുടനുടനുയർന്നു;
- തുരുതുരെ വരുന്ന ബഹുശരനിര കലർന്നു നിശി-
- ചരരധികവരനധിക ശകലിതനതായി;
- അഗ്ന്യസ്തവും വരുണാസ്ത്രവും ശക്രാസ്ത്രം
- ലഘുതരം പ്രത്യസ്ത്രത്ര്യക്ഷാസ്ത്രമീവിധം
- പലവകയിലവരുടയ കലശലതു പറവതിനു
- ഫണിപതിയുമതിനു മതിയല്ലെന്നതും ദൃഡം;
- ക്ഷിതിപതിയുമഥ രജനിചരപതിയുമങ്ങനെ
- തങ്ങളിൽ സംഗരം ചെയ്തോരനന്തരം
- വീര്യം പെരുത്ത കൃതവീര്യാത്മജന്റെ ഭുജ*
- ദണ്ഡപ്രയുക്തശരഷണ്ഡങ്ങൾകൊണ്ടു ദശ-
- കണ്ഠന്റെ വീര്യമതു കുണ്ഠത്വമാർന്നു യുധി
- കണ്ടിച്ചു വില്ലുമതുമിണ്ടൽക്കു മൂലമായ്
- മണ്ടിത്തിരിപ്പതിനു മാർഗ്ഗത്തെ നോക്കിയതു
- കണ്ടിട്ടു നില്ക്കുന്ന കാർത്തവീര്യാർജുനൻ
- ഝടിതി ദശമുഖനുടയ മുടികൾ പിടിപെട്ടുട-
- നങ്ങോട്ടുമിങ്ങോട്ടുമുന്തിയും തള്ളിയും
- ഝടഝടിതിയുടനടിയുമിടികളും കൊണ്ടുടൻ
- ചാകാതെ ചത്തു തരംകെട്ടു രാവണൻ;
- ചപലമതിയവനുടയ പുഷ്പകവിമാനവും
- ചന്ദ്രഹാസാദിയും കൈക്കലാക്കി നൃപൻ;
- കരചരണമുപചരണമിരുപതു കരങ്ങളും
- ചങ്ങലകൊണ്ടു ബന്ധിച്ചു ലങ്കേശനെ
- കരചരണചലചലനരഹിതമിഹ കൊണ്ടുപോ-
- യ്ക്കാരാഗൃഹം തന്നിലിട്ടു പൂട്ടീടിനാൽ; [ 23 ]
- പത്തുമുഖങ്ങളിൽനിന്നു പുറപ്പെടു-
- മത്യുന്നതതരമുറവിളിഘോഷം
- പത്തു ദിഗന്തരമൊക്കെ മുഴങ്ങീ
- പാതാള സ്വർഗ്ഗങ്ങളിലെത്തി;
- "എന്തൊരുമുറവിളിയായിതു കൂവേ!"
- "പംക്തിഗളന്റെ കരച്ചിലുപോലും!"
- "എന്തൊരു സങ്കടമങ്ങവനിപ്പോൾ?"
- "ബന്ധനമാശു ലഭിച്ചിതുപോലും!"*
- "മറ്റുള്ളവരെക്കെട്ടിയടിച്ചു പി-
- ടിച്ചുപറിച്ചു വലയ്ക്കുന്നവനെ
- കെട്ടിയടിപ്പാനേതൊരു വമ്പൻ
- നാട്ടിലിദാനീമുണ്ടായ്‌വന്നു?"
- "കേട്ടില്ലേ താനർജുനനെന്നൊരു
- കേളി പെരുത്ത ധരിത്രീപാലൻ
- അദ്ദേഹം താനാശരവരനാ-
- മിദ്ദേഹത്തെബ്ബന്ധിച്ചതുപോൽ!"
- "ബന്ധിപ്പാനൊരു ബന്ധം വേണമ-
- തെന്തെന്നേതുമറിഞ്ഞോ ഹേ താൻ?"
- "എന്തെന്നേതുമറിഞ്ഞീലവനുടെ
- താന്തോന്നിത്തമതെന്നേ വേണ്ടൂ "
- "താന്തോന്നിത്തമതർജുനനോ ദശ
- കന്ധരനോ അതു ബോധിച്ചോ താൻ?"
- "ബോധിപ്പാനെന്തൊരു വൈഷമ്യം!
- ചോദിച്ചറിയണമെന്നില്ലല്ലോ;
- സുരകുലനാരീപീഡകൾ ചെയ്തും
- കുലതരുണികളെച്ചെന്നു പിടിച്ചും
- പല മുനിമാരെക്കെട്ടിയടിച്ചും
- വലനം ചെയ്യും നക്തഞ്ചരവര-
- ഖലനിതു വന്നു ഭവിച്ചിതിദാനീം
- ബലവാനാകിയ കൃതവീര്യജനൊടു
- കലഹിപ്പാനായ്ച്ചെന്നൊരു ശേഷം
- പാരാതവനും ഇവനെക്കെട്ടി-
- ക്കാരാഗൃഹമതിലാക്കിയടച്ചാൻ;
- അങ്ങനെയനുഭവമേറെ നടിച്ചാ-
- ലിങ്ങനെയനുഭവമുടനേ കൂടും;"
- "കൊലചെയ്യാത്തതുമെന്തേ കൂവേ?"
- "കൊല ചെയ്താൽ മതിയാമോ ഭോഷാ! [ 24 ]
- പലനാളിങ്ങനെ പട്ടിണിയിട്ടും
- പലരും കണ്ടുടനാനകളിച്ചും
- വലയിൽപ്പെട്ട കുരങ്ങുകണക്കേ
- വലയണമെന്നേ മതിയാവുള്ളൂ;
- കൊലചെയ്താൽ പുനരന്തകനവനെ
- വലയ്ക്കുന്നതിഹ നമുക്കറിയാമോ?"
- " അതു നേരാണിഹ നമ്മെക്കാളും
- അതികാരുണ്യം പെരുതു തനിക്ക്; "
- രാവണമുറവിളി കേട്ടിട്ടിങ്ങനെ
- രാവും പകലും ഘോഷിക്കുന്നു;
- ദേവകളെത്ര പ്രസാദിക്കുന്നു;
- ദേവസ്ത്രീകൾക്കതിലും മോദം;
- ഓജസ്സും തേജസ്സും പലനാ-
- ളായുസ്സും ശ്രേയസ്സും വരുവതി-
- നന്തണവരരും മുനിവരരും ദിശി
- സന്തതവും ഹേഹയനൃപവരനെ-
- പ്പാരമനുഗ്രഹമേകി നടന്നു
- പാരിലതിശ്രമമേറിയിരുന്നഥ
- ഭീതികലർന്ന ജഗത്ത്രയവാസികൾ
- ഭീതിവെടിഞ്ഞുവസിച്ചീടുന്നു
- ദേഹം മെലിഞ്ഞു പാരം കാരാഗൃഹംതന്നുള്ളിൽ
- ദാഹം വിശപ്പുകൊണ്ടും മോഹം വളർന്നു തത്ര
- സ്നേഹം തരിമ്പുമുള്ള ദേഹങ്ങളാരുമില്ല
- ആഹന്ത കഷ്ടം ! ദശകണ്ഠന്റെ വർത്തമാനം
- സ്നാനവുമില്ല മദ്യപാനവുമില്ല പാരം
- നാണവും പൂണ്ടു ദേഹക്ഷീണവുമകപ്പെട്ടു
- കൂറില്ലാത്തവരോടു ചോറുമേടിച്ചുതിന്നു
- കീറത്തുണിയുടുത്തു ചേറുമണിഞ്ഞങ്ങനെ
- ആറുമാസം കഴിഞ്ഞിട്ടാരുമൊരുത്തൻ കുറ്റം
- തീരുവാൻ ശ്രമിക്കുന്നില്ലേറുന്നു സന്താപങ്ങൾ;
- പിണ്ഡമുരുട്ടിയോരോ കിണ്ണത്തിൽ വച്ചുകൊണ്ടു
- പെണ്ണുങ്ങൾ വന്നുനിന്നീവണ്ണം പറഞ്ഞീടുന്നു;
- "ലങ്കാധിപതേ! നിന്റെ കാൽമേൽ കിടക്കും നല്ല
- ശൃംഖല കിലുങ്ങാതെ ചിങ്കുകളിച്ചെന്നാകിൽ
- പാക്കു വെറ്റില നല്ല തൂക്കുപുകയിലയും
- പാർക്കാതെ തരുന്നുണ്ടു ഭോഷ്ക്കല്ല പംക്തികണ്ഠ!'
- പത്തു മുഖങ്ങൾകൊണ്ടു പത്തു പദങ്ങൾ പാടി
- തിത്തിത്തൈ എന്നു ചാടി നൃത്തംവയ്ക്ക രാവണ! [ 25 ]
- മത്തഗജങ്ങളുടെ മസ്തകം തകർക്കുന്ന
- ഹസ്തങ്ങളെങ്ങു നിന്റെ നക്തഞ്ചരാധിനാഥാ?
- ഏണമിഴിമാരുടെ പാണി പിടിച്ചിഴയ്ക്കും
- പാണികൾകൊണ്ടു നമ്മെ താണുതൊഴുതുകൊണ്ട്
- കേണുകിടന്നിടാതെ വാണു നീയെങ്കിൽ നല്ല
- ചോറും കറിയും പുളിഞ്ചാറും കാച്ചിയ മോരും
- ആറുന്നതിനുമുമ്പേ കൂറുള്ള ഞാൻ തരുവൻ;
- മണ്ഡോദരിയെന്നൊരു പെണ്ണുനിനക്കുണ്ടെന്നു
- മന്നിടംതന്നിൽ ബഹു പെണ്ണുങ്ങൾ ചൊല്ലിക്കേട്ടു
- സന്ദേഹംമൊന്നുണ്ടതു നിന്നോടു ചോദിക്കുന്നു
- ഒന്നേയവൾക്കു മുഖമുള്ളെന്നു കേട്ടു ഞങ്ങൾ
- ഒന്നല്ല മുഖം നിനക്കഞ്ചുമഞ്ചുമുണ്ടല്ലോ
- എന്നാലെങ്ങനെയവൾ നിന്നോടു രമിക്കുന്നു!
- പത്തു പുരുഷന്മാരോടൊത്തു വിനോദിക്കുന്ന
- ധൂളിപ്പെണ്ണുങ്ങളുടെ കേൾവിയവൾക്കു വന്നു"
- "പോടീ! മഹാരാജേന്ദ്രനോടീ വിശേഷം ചെന്നു
- ചോദിച്ചിട്ടെന്താവശ്യം?" ചോദിച്ചാലെന്തുചേതം?
- ഓരോ ദിവസം മുഖമോരോന്നു ചുംബിച്ചുകൊ-
- ണ്ടാരോമൽ ക്രീഡിക്കുന്നതാരോടു കേൾപ്പിക്കുന്നു?"
- ഇത്ഥം വന്നൊരുകൂട്ടം സ്ത്രീകള-
- ബദ്ധം പറയുന്നതു കേട്ടപ്പോൾ
- നാണംപൂണ്ടു കിടന്നു ദശാസ്യൻ
- പ്രാണൻ പോകാഞ്ഞതു തൽ ഭാഗ്യം.
- എത്രയും പരസമത്വമിളച്ചു
- തത്ര വാണു ദിവസങ്ങൾ കഴിച്ചു
- ചിത്രയോധി ദശകന്ധരനോടഥ
- യാത്രചൊല്ലിയവനങ്ങു ശമിച്ചു;
- തത്ര ചെന്നഥ പുലസ്ത്യനിരിക്കും
- ആശ്രമത്തിലരികത്തിലണഞ്ഞു
- തൃക്കഴൽക്കഥ വണങ്ങിയവൻ പുന-
- രിക്കഥ കിമപി പറഞ്ഞറിയിച്ചു:
- "ഏവമെന്തു വരുവാനവകാശം?"
- "രാവണന്റെ ചരിതം ബഹു കഷ്ടം;
- ആവതെന്തു ശിവശങ്കര! പാർത്താൽ
- ദൈവകല്പിതമതാർക്കറിയാവൂ!
- ചീർത്ത വൈരമൊടു ചെന്നു ദശാസ്യൻ
- കാർത്തിവീര്യനൊടു നേർത്തു പിണങ്ങി
- ആർത്തിപൂണ്ടു സമരാർത്തി ലഭിച്ചതു [ 26 ]
- പാർത്തിടാതെയിഹ ബന്ധിതനായി
- ബന്ധുവാരുമില്ലാഞ്ഞതുകൊണ്ടവൻ
- ഹന്ത! കേണു മരുവുന്നിതു താപാൽ
- അന്തരംഗ്ഗമതിലാധി മുഴുത്തു
- സന്തതം ബത വിശന്നുവലഞ്ഞു
- പാണികാലുകളുമമ്പൊടു കെട്ടി
- ക്ഷോണിതന്നിലിളകാതെ കിടന്നു
- പ്രാണനാശമവനാശു കൊതിച്ചു
- വാണിടുന്നു ബലമോടുമിദാനീം;
- അഞ്ചുമാസമിതുപോലെ കഴിഞ്ഞിതു
- വഞ്ചനാവചനമല്ല മുനീന്ദ്ര!
- നെഞ്ചകത്തിലടിയന്നൊരുപായം
- കിഞ്ചനാസ്തിയിഹ നിൻകൃപയെന്യേ;
- മാമുനീശ്വര ഭവാൻ വിരവോടേ
- മാനവേന്ദ്രനൊടു ചന്നറിയിച്ചാൽ
- സ്വാമിതന്നെ വിടുവാൻ കല്പിക്കും
- താമസിക്കരുതെഴുന്നരുളേണം."
- ഇത്തരമുള്ളൊരു വചനം കേട്ടു പു-
- ലസ്ത്യമുനീന്ദ്രനുമപ്പോളധികം
- പൗത്രസ്നേഹവശാൽ വിവശനതായ്
- ചിത്തംതന്നിൽ വിഷാദംപൂണ്ടു:
- "എത്രയുമാപത്തല്ലോ നമ്മുടെ
- പൗത്രനു സംഗതിവന്നതു ശിവശിവ!
- ഹേഹയനരപതി വാസംചെയ്യും
- ഗേഹ വിരവൊടു ഞാനും പോരാം;
- ധീരതയേറും മന്നവനെന്നെ
- ശഠത പറഞ്ഞു മടക്കിയയയ്ക്കും,
- വാശ്ശതുമവനൊടു ക്ലേശിക്കാം പുന-
- രീശ്വരകല്പിതമാർക്കറിയാവൂ;"
- എന്നരുൾചെയ്തു കുടയുമെടുത്തു ന-
- ടന്നുതുടങ്ങി പുലസ്ത്യമുനീന്ദ്രൻ
- മന്ത്രീശ്വരനൊടുകൂടി നടന്നു
- മാഹിഷ്മതിപുരിതന്നിൽ ചെന്നു;
- കൃതവീര്യാജനെക്കണ്ടാനപ്പോൾ
- കൃതവീര്യാത്മജനാശു വണങ്ങി
- അർഘ്യാദികളും ചെയ്തു മഹീപതി
- സരസമുവാചഃ മുനീന്ദ്ര! നമസ്തേ!
- എന്തൊരു സംഗതിയാഗമനത്തിന്? [ 27 ]
- ഹന്ത ഭവാനരുൾചെയ്തീടേണം,
- നിന്തിരുവടി മമ കുലബലധനസുഖ-
- സന്തതിപുഷ്ടി വരുത്തീടേണം;
- നിന്തിരുവടിയൊന്നരുളിച്ചെയ്താ-
- ലെന്തെങ്കിലുമതു സാധിക്കുന്നേൻ;"
- ഇത്ഥം നരവരഗീരുകൾ കേട്ടതി
- നുത്തരമരുളിച്ചെയ്തു മുനീന്ദ്രീൻ;
- "സാധുമതേ! തവ ഭൂതികൾ കാൺമാൻ
- സിദ്ധാന്തിച്ചിഹ വന്നിതു ഞാനും
- സിദ്ധന്മാരൊടുകൂടി വസിപ്പാ-
- നെത്രയുമാഗ്രഹമുണ്ടു നമുക്ക്;
- ഉദ്ധതഗതിയാം നമ്മുടെ പൗത്രന-
- ബദ്ധമതല്ലാതില്ലൊരുനാളും,
- മൃത്യുഞ്ജയനുടെ വാസഗിരീന്ദ്രം
- കുത്തിയെടുത്തവനെന്തരുതാത്തു?
- അത്ര പെരുത്ത ദുരാചാരത്തെ നി-
- വൃത്തിവരുത്താനിത്തൊഴിൽ കൊള്ളാം!
- എന്നാലവനെയഴിച്ചുവിടേണം
- നന്നായ്‌വരുമിതുകൊണ്ടു നിനക്ക്
- ചെമ്മേ നിൻകൃപകൊണ്ടിതു ചെയ്താൽ
- നന്മ നിനക്കിനി മേന്മേലുണ്ടാം,"
- മാമുനിവചനം കേട്ടു നരേന്ദ്രൻ;
- മനസി ഹിതംപൂണ്ടിദമരുൾചെയ്തു
- "ഇപ്പോൾതന്നെയഴിച്ചു വിടുന്നേ-
- നപ്രിയമതുകൊണ്ടുണ്ടാകേണ്ട "
- അപ്പോൾ വന്നൊരു കിങ്കരഭടനെ *-
- ക്കല്പിച്ചമ്പൊടയച്ചു നരേന്ദ്രൻ ;
- കിങ്കരനുടനേ ചെന്നതുനേരം
- ലങ്കാപതിയുടെ കൈകാൽകളിലെ
- ശൃംഖല വിരവൊടഴിച്ചു പതുക്കെ
- തൻകരയുഗളം കൊണ്ടുതലോടി
- വെളിയിൽകൊണ്ടന്നർജ്ജുനനികടേ
- തെളിവിൽ നിറുത്തി, വണങ്ങിയിരുന്നു
- നാണംപൂണ്ടു മുഖാവലി താഴ്ത്തി
- ക്ഷീണം പൂണ്ടു വസിക്കുന്നവനൊടു
- നരപതിയരുളിച്ചെയ്തിതു: "നിന്നൊടു;
- പരിഭവമൊക്കെത്തീർന്നു നമുക്ക്
- ലങ്കാധിപതേ! പോയാലും നീ [ 28 ]
- ശങ്കരസേവയൊടിങ്ങിനി മേലില*-
- ഹങ്കരിയാതെയിരിക്കിൽ കൊള്ളാം;"
- എന്നു പറഞ്ഞു കൊടുത്തിതു പുഷ്പക
- മെന്നുള്ളൊരു രമണീയവിമാനം;
- ഉന്നതഗുണഗണമിയലിന വാളും
- സന്നതനാം ദശകണ്ഠനു നല്കി;
- കുണ്ഠിതമൊക്കെത്തീർന്നു നൃപണ ദശ-
- കണ്ഠനെ വിരവിലയച്ചു വസിച്ചു;
- കിങ്കരസംഘവുമവനൊടു സഹിതം
- ലങ്കാനഗരേ ചെന്നു വസിച്ചു;
- തുംഗസുഖേന പുലസ്ത്യമുനീന്ദ്രനു-
- മങ്ങു ഗമിച്ചു സുഖിച്ചു വസിച്ചു:
- കൃതവീര്യാത്മജനാകിയ നരപതി-
- പുംഗവനും ബഹുമംഗലമതുലം.
സമാപ്തം